Job 33
33
Elihu Talk Fo Real Kine To Job
1“Kay den, Job, lissen wat I goin tell you!
Try lissen good, ery word!
2I ready fo talk.
I know wat I gotta tell.
3Wat I tell, show dat inside, I tink da right way.
I tell wat I know, an notting wrong bout dat.
4Da Spirit from God wen make me.
Da God Wit All Da Powa, wen he breave, he make me stay alive.
5Eh Job, if you can argue wit me, den tell me.
You gotta show proof an talk wit me in my face.
6Eh! I jalike you, da way God see me.
He wen make me outa dirt too.
7No need you come sked a me!
I not goin come down hard on you.
8“But you wen tell dis,
An I hear eryting you tell:
9‘Me, I stay clean an no do notting bad.
I no mo da blame fo notting.
10But you know wat?
God wen find stuff he tell I get blame fo.
He tink I agains him.
11 #
Job 13:27
He put one leg chain on my feets.
He watch me ery place I go!’
12“But I goin tell you dat you no stay right bout dat,
Cuz God mo big den peopo.
13How come you squawk to him?
Cuz he no ansa nobody dat argue wit him!
14Cuz fo real, God talk—
He can tell someting one way, an den anodda way,
No matta peopo donno az God stay talking to dem.
15 #
Job 4:13
Wen da peopo pass out sleep on top dea beds,
God use dreams, o someting jalike one dream nite time.
16Dass wen God tell peopo stuff dey donno.
Dass how he make shua dey no foget how he tell dem fo watch out.
17He do dat fo turn peopo away from da kine stuff dey do.
He no let dem get big head.
18Dass how he make shua dey no fall down inside da Deep Dark Hole.
He help dem no mahke from swords.
19Get one time wen God make peopo come sick.
He make um stay in bed an suffa.
Dea body stay hurt all da time,
But dass how he teach um someting.
20Da sick guy no like eat notting,
Not even da bestes kine food, notting.
21His body come real skinny.
No matta no can see his bones befo,
Now dey stick out.
22His spirit come nea da Deep Dark Hole.
He alive, but da killa spirits stay wait fo him.
23“Maybe da sick guy get one angel messenja guy by him,
One helpa guy dat talk fo him.
God get tousans a messenja guys
Fo tell peopo wass right fo dem do, you know.
24Da messenja stay dea fo give chance to da sick guy, an tell God,
‘Okay fo let um go! No need fo him go down inside da Deep Dark Hole!
I wen find da way fo get him outa trouble.’
25Den da guy dat was sick,
His body goin come new jalike one small kid.
Jalike wen he was young.
26He tell God wat he need, an God like um cuz he do dat.
He come in front God, an yell cuz he stay good inside.
God bring him back
Fo him get um right wit God, jalike befo time.
27Den da guy go in front erybody an tell,
‘I wen do bad kine stuff.
I wen jam up wat stay right.
But God neva punish me fo pay me back!
28God wen pay da price,
So I no need go inside da Deep Dark Hole!
An I goin stay alive fo see da light!’
29“Fo real, God do all dis fo one guy.
He even do um two-three time.
30He do um fo bring back da guy from da Deep Dark Hole.
Fo him live fo real kine
Jalike da light shine on top him.
31“Kay den, Job! lissen good!
No talk! I da one goin talk.
32If you get someting fo tell, den tell me.
Tell me, cuz I like show peopo you get um right.
33But if you no mo notting fo tell,
Stay quiet, an I goin teach you
How fo know wat fo do erytime.”
Currently Selected:
Job 33: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
