Job 30
30
Job Talk Moa
1“But now, get guys mo young den me,
Dat make fun a me!
I know wat kine guys dea faddahs,
An az why I neva give dea faddahs work,
Even fo take kea my dogs dat guard da sheeps.
2I neva give work to dea faddahs cuz dey not strong enuff.
Dea powa fo work, gone awready!
3Dey look weak.
Dey stay hungry an dey no mo notting.
Dey go all ova da hot dry boonies.
Dey go aroun da wasted land ery nite.
4Inside da boonies dey pull up da salt kine weeds.
Dey burn da root from da broom tree fo stay warm.
5Odda peopo kick um out an no let um stay nea dem.
Peopo yell at dem jalike dey steala guys.
6Dey gotta live in da skery cliffs inside da dry gulches.
Inside da holes in da dirt an da rocks.
7Dey make noise like animals wea get plenny bushes,
An hold each odda fo stay warm undaneat da sticka weeds.
8Dey stupid, an no mo nobody know dea name.
Peopo wack um an push um outa da land.
9“An now dea kids sing hauna kine songs bout me.
Dey joke bout me.
10Dey ack jalike I pilau,
An stay far from me.
Dey no shame spit on my face.
11God make um now so I no can fight,
An make me come notting!
Wen dey stay in front me,
Dey go buckaloose!
12From da right side, young gang guys attack me.
Dey make traps fo my feet.
Dey make way fo wipe me out!
13Dey broke up da trail I use.
Dass how dey wen wipe me out.
Dey tell, ‘No mo nobody fo help him!’
14Dey come agains me, jalike thru one wide puka dey broke down in da wall,
Same time da wall stay fall down.
Dey roll inside jalike da kine surfs
Dat crash ova an ova an wipe out eryting.
15Skery tings come all ova me.
Jalike da wind blow way all da respeck peopo wen get fo me.
All da good kine stuffs I get, gone awready jalike one cloud.
16“An now all poho my life stay now!
Make me suffa plenny ery day.
17Nite time I feel jalike someting stay digging inside my bones.
Jalike someting stay chewing on me, dat no can res.
18God get plenny powa, an jalike he grab my clotheses
An pull um tight aroun my neck.
19Jalike God throw me down in da mud,
An I come jalike dirt an ashes.
20“Eh God! I yell fo you help me, but you no do notting fo me.
I stan dea, but you ony look an no help notting.
21You change an you like hurt me.
You get plenny powa, an you ack jalike you hate me.
22You make da wind pick me up an make me ride on top um.
You throw me aroun inside da storm.
23I know you goin make me mahke,
An go da place wea erybody dat stay alive gotta go.
24“Fo shua, nobody goin wack one guy dat stay all bus up,
Wen da guy stay bum out an yell fo me help um.
25I wen cry fo da peopo dat get hard time erytime.
I wen stay sad inside fo da peopo dat no mo notting.
26But wen I wait fo da good kine stuff fo happen, bad stuff happen!
Wen I look fo light, da dark come.
27Inside me eryting come mix up an no stop.
I goin suffa long time moa.
28I come dark, but not from da hot sun.
I stan up wea da peopo come togedda, an yell fo help.
29Wen I cry, I howl
Jalike I one braddah fo da wild dogs.
I hang out wit da owls.
30My skin come black,
My body stay hot wit feva.
31Jalike my harp ony good fo play funeral kine songs,
An my flute ony fo wen peopo stay cry.”
Currently Selected:
Job 30: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
