Job 21
21
Job Ansa Back Zofar One Mo Time
1Job ansa back Zofar lidis:
2“Eh you guys! Lissen up real good wat I tell:
If you guys lissen,
You goin make me feel mo betta.
3Hang in dea wen I stay talking.
Afta I pau talk, you guys can make fun a me some moa.
4“Me, you tink I squawk bout peopo, o wat?!
No ways! I squawk bout God!
An if dass how stay,
I no can wait fo him do someting!
5Tink bout wat wen happen to me!
Dat goin make yoa jaws drop.
Put yoa hand ova yoa mout cuz goin shock you!
6Wen I tink bout wat stay happen,
Bodda me plenny!
I stay shake all ova.
7“How come da guys dat do real bad kine stuff
Stay live long time?
Wen dey come ol, dey get even mo an mo powa.
8Dey see dat dea kids stan solid aroun dem,
Dey can look how dea kids an grankids stay.
9Dea houses stay safe, an dey no need stay sked.
God no punish dem.
10Da bad guys, dea bull erytime make bebes wit da cows.
Dea young cows born bebes dat no mahke befo dey born.
11Dey let dea kids run aroun jalike da sheeps an goats.
Dea small kids skip aroun.
12Da bad guys sing wit tammorines an harps.
Dey feel good wen dey hear flutes.
13All da time da bad guys live, eryting go good fo dem.
Den dey go quick to da Mahke Peopo Place.
14Still yet, da bad guys tell God, ‘Go way, no bodda us!
Us no like find out how you like us live!
15Who dis God Dat Get All Da Powa, aah?
Dat us gotta work fo him?!
Wat good ting goin happen to us guys
If us aks him fo help us?’
16But you know wat?
Da peopo dat do bad kine stuff, dey not da ones
Dat make eryting go good fo dem!
No way I goin tink az good, wat dey tell peopo fo do!
I goin stay far from dem!
17“But you tink da bad guys light come pio? Not!
You tink dey get hard time? Not even!
You tink God stay huhu wit dem an punish dem? No ways!
18You tink dey stay jalike da junk kine stuff from da wheat
Dat blow away? Not!
19Get peopo dat tell, ‘God wait, an layta
He punish da bad guys kids fo wat dea faddahs wen do.’
Eh! Mo betta God pay back da bad guy!
So da bad guy goin know az God dat do um!
20Mo betta da bad guy see wat happen wen God wipe him out.
Let him be da one find out az God come huhu wit him,
Da God Dat Get Mo Powa Den All Da Odda Gods.
21Dat kine guys dat do wass bad,
Dey no give a rip bout da ohana dey leave behind dem,
Wen da time fo dem stay alive come pau.
22“You guys tink somebody can teach God stuff dat he donno?
God, he da Judge even fo da ones dat live inside da sky!
23Get guys dat mahke wen dey stay real strong,
Wen no mo notting bodda dem, an no mo worries.
24Dey get plenny food fo eat,
Dea body stay real strong.
25Get odda guys mahke wen dey stay all bum out inside,
An no stay good inside eva.
26Still yet, dose two kine guys lay nex to each odda inside da dirt,
An get worms all ova dem.
27“Eh you guys! I know wat you tink!
I know how you guys make one plan fo jam me up!
28You guys tell, ‘Eh, gone awready, da house wea one real importan man live befo time!
Fo shua, da tents wea da crooks wen live, no moa!’
29You guys neva aks da peopo dat go far away, wat dey see ova dea?
You guys neva lissen wat dey tell, o wat?!
30Dey can tell you guys, dat wen get big trouble,
Da bad kine peopo no suffa.
Wen God come huhu, dey outa dea awready!
31No mo nobody face da bad guys an poin finga dem how dey ack.
No mo nobody pay dem back cuz a wat dey wen do.
32Wen da bad guys mahke, peopo carry dem to da graveyard,
An put security guard an take kea dea tomb.
33Even da dirt in da valley, nice place fo dem.
Erybody goin follow da mahke guy to da grave side,
An plenny mo peopo goin go firs.
34“So! How you guys goin make me feel mo betta,
Afta I hear all da stuff dat no mean notting dat you guys tell?!
Da way you guys talk to me, no help me notting!
You guys ony bulai!”
Currently Selected:
Job 21: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
