Job 19
19
Job Ansa Back Bildad
1Den Job ansa back Bildad lidis:
2“How long you guys goin make me suffa,
An talk fo try bus me up inside
Wit wat you tell me?
3Ten times awready you guys talk bad fo make me come shame,
But you guys no shame fo attack me.
4Az not true dat I jam up.
But if az was true,
Den az ony my problem, not yoas.
5If az true dat you guys tink you mo betta den me,
An try fo show proof dat I get da blame fo someting,
6Den you guys gotta know dis:
Az God dat judge me da wrong way!
Jalike he throw his net ova me.
7“Eh! No matta I yell, ‘He killing me!’
Nobody tell me notting!
No matta I yell fo somebody help me,
Nobody judge me da right way!
8God block my road, so I no can pass.
He make my trail come all dark.
9God rip off all da respeck I get,
Jalike he take off da crown from my head.
10God bus me up all ova, till I almos mahke,
Jalike he bus up da wall aroun one town!
He jam up eryting I stay wait fo,
Jalike he pull up da roots from one tree.
11He stay real huhu wit me.
He tink bout me jalike I one a da guys dat stay agains him.
12Jalike his guys dat raid come afta me.
Jalike I one wall, an dey pile dirt fo come ova me.
Jalike dey make camp aroun my tent.
13“God make my braddahs go far from me.
Da guys dat was my frenz, dey donno me awready.
14My ohana no stay hea no moa.
Da ones I know foget bout me.
15Da peopo dat visit me
An da wahines dat work fo me,
Da way dey see me,
Jalike dey donno me.
16I tell my worka guy fo come, but he no come.
No matta I beg him fo come, he still no come.
17My wife no like stay nea me cuz a my haunas breat.
My braddahs tink I smell haunas.
18Even da small kids ack jalike I no good.
Wen I stan up, dey make fun a me.
19All da guys I wen trus wen we talk befo time,
Dey tink I pilau.
Da peopo dat I love turn agains me.
20My bones real weak, dey stick to my skin an muscle.
I feel jalike I goin mahke, but I no mahke yet!
21“Eh, you guys! You my frenz, aah?
Show pity fo me!
Show pity cuz God wen wack me!
22God, he stay chase me!
So how come you guys go afta me too?!
You guys goin eat me up too, o wat?!
23“I like somebody write down wat I tell.
Write um inside one book.
24I like somebody write um wit one iron tool
On da side a one cliff,
An fill up da alphabets wit lead metal,
So da words stay foeva!
25Fo me, I know da one dat goin help me fo shua stay alive,
He da One goin show proof I neva do notting wrong!
An he goin stan up fo me wen time fo da las word!
26An even afta my skin stay all wipe out
Wile I still stay alive I goin see God.
27I da one goin see him!
I goin see him wit my eyes,
An I goin know him!
I weak awready,
But I stay waiting fo see him!
28“If you guys tell, ‘Us gotta go afta Job an make him lissen!
Cuz he da one dat get da blame!’
29You guys gotta stay sked dat somebody goin kill you guys wit dea sword!
Cuz wen you guys stay huhu,
God goin use one sword fo punish you!
Den you guys goin know God da one dat judge you guys!”
Currently Selected:
Job 19: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
