Job 16
16
Job Ansa Back Elifaz
(Philippi 1:19)
1Den Job tell:
2“Befo time I wen hear plenny stuff jalike wat you guys tell.
You guys donno how fo make me feel mo betta!
You ony stay presha me out moa!
3You guys all mout!
You guys sick, o wat?!
Cuz you no stop argue!
4I can talk jalike you guys too, you know.
If you guys wen suffa jalike me,
I can put togedda words agains you guys too,
An shake my head jalike someting wrong wit you guys.
5But me, I no make lidat.
Da way I talk can make you guys feel mo strong.
I no hold back fo tell how you guys can come so notting bodda you.
6“But if I talk lidat now, I still feel hurt.
An if I no talk, I still stay suffa.
7God, fo shua you wear me out awready.
You wen wipe out all my peopo dat stay tight wit me.
8You wen tie me up.
Now I ony stay skin an bones.
Cuz I so skinny, dat show I get da blame.
9God stay huhu an bus me up,
Jalike one wild animal go afta da animals he kill.
Jalike he make mad face cuz he hate me plenny.
He give me stink eye cuz he stay agains me.
10Peopo make fun a me.
Dey slap my head.
Dey gang up on me.
11God turn me ova to da bad guys.
An he let da criminals do bad kine stuff to me.
12Eryting was good fo me.
But God bus me up!
He grab my neck an poun me.
He use me jalike I his target!
13Jalike his guys wit bows an arrows
Come all aroun fo shoot me.
Da arrows split my kidneys,
An he no kea!
Dey hit my liva
An da bile spill out on da groun.
14Ova an ova he broke down my wall.
He run ova me jalike he one strong army guy!
15“I wen sew burmbag cloth ova my scabby skin
Fo make um stay dea long time.
I bury my face inside da dirt,
Fo show I stay all wipe out.
16I cry plenny, so my face come all red.
I get dark circle aroun my eyes.
17But I neva bus up nobody.
An wen I pray, I stay clean inside.
18“No let me mahke an da groun cova up my blood,
Cuz no good if nobody hear me yell fo God do da right ting fo me!
19 #
Job 19:25
Right now, you know, get somebody inside da sky
Dat see wat I do.
He da One dat can tell wat he see me do.
20My frenz, dey da ones talk bad bout me!
But I stay cry in front God.
21Da one dat can tell wat he see me do,
I like fo him show proof
Fo show who stay right—one guy, o God.
Az jalike somebody put his hand
On one guy an his fren, same same.
22“Not too many year befo I mahke,
An befo I no can come back no moa.”
Currently Selected:
Job 16: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
