Outa Egypt 24

Da Israel Peopo Take Da Deal Wit Da One In Charge

1Den God tell Moses, “Go come up hea on top da mountain, by me, Da One In Charge. Bring Aaron an his boys Nadab an Abihu. Bring seventy a da older leadas fo da Israel peopo. Wen you guys still far away from da top, start fo go down in front me. 2Den Moses, you da ony guy dat goin come all da way to me, Da One In Charge. Da leada guys, dey no can go nea dea. Da odda peopo, dey no can even come on top da mountain litto bit wit da leada guys.”

3Moses go by da peopo. He tell um all da tings Da One In Charge wen tell him, an all da Rules. All da peopo tell him togedda, “Eryting Da One In Charge tell we gotta do, we goin do um!” 4Den Moses write down all da tings Da One In Charge tell.

Da nex morning early, Moses tell da peopo fo help build one altar down from da mountain. He tell um fo set up twelve big stone aroun da altar, one big stone fo all da Israel ohanas. 5Den he pick some young guys from da Israel peopo, an sen um fo go kill some animals an put da bodies on top da altar an burn um up fo make one sacrifice. So dey take bulls an make da kine sacrifice dat show dat eryting good wit dem an Da One In Charge. 6Moses half half da blood from da cows. He put half inside tubs. Da odda half he throw on top da side a da altar. 7Den he take wat he wen write down bout da deal dat God make fo dem, an he read um real loud fo all da peopo hear. Da peopo tell, “Eryting Da One In Charge stay tell, us guys hear, an we goin do um!”

8 # Matt 26:28; Mark 14:24; Luke 22:20; 1Cor 11:25; Heb 10:29; Heb 9:19-20 Den Moses take da blood from inside da tubs an sprinkle um on top da peopo. He tell, “Dis blood, fo make real da deal dat Da One In Charge wen make wit you guys, bout all dese tings dat he tell!”

Moses An Da Leada Guys See God

9So den Moses go up da mountain. Aaron, Nadab, an Abihu, an da seventy older leadas fo da Israel peopo, dey go too. 10Up dea, dey see da God fo da Israel peopo! Da place he stan, get someting dat look jalike one brick floor undaneat, wit da blue kine jewelry stone dey call lapis lazuli, blue an bright jalike da clear sky. 11But no matta da leada guys fo da Israel peopo see God dea, God neva do notting fo hurt dem. Dey even eat an drink togedda in front him!

Moses Go Talk Wit God

12Den Da One In Charge tell Moses, “Go come up da mountain by me. Wait dea. I goin write da Rules an all da tings dat da peopo gotta do. I goin write um on top flat stone an give um to you fo teach to da peopo.”

13Moses an his helpa guy Joshua start fo go up God Mountain. 14Befo dey go, Moses tell da leada guys, “You guys stay hea. Wait fo me an Joshua come back by you guys. Get Aaron an Hur wit you guys fo stay in charge, fo anybody dat need fo talk to one judge go by dem.”

15Wen Moses go up da mountain, had one cloud cova da mountain. 16-17Da One In Charge stay on top Mount Sinai. He awesome to da max. Fo six day, da cloud cova da mountain. Da Israel peopo, dey no can see da awesome One In Charge up dea. Dey ony see one fire on top a da mountain dat look jalike stay burn eryting. Da day numba seven, Da One In Charge talk to Moses from inside da cloud. 18#Rules2 9:9Den Moses go inside da cloud. He go all da way up to da top a da mountain. He stay dea forty days, day time an nite time.

Currently Selected:

Outa Egypt 24: HPB

Highlight

Copy

Compare