Jesus Guys 27

Paul Ride Sail Boat Fo Rome

1Da leadas tell us goin ride boat Italy side, an dey turn ova Paul an some odda prisona guys to one captain Julius from Cesar army guys. 2We go inside one boat from Adramyttium dat stay ready fo go da port towns on da West Asia coast, an we go out on da ocean. Aristarkus from Macedonia, Tessalonika side, go wit us. 3Da nex day we come Sidon, an we go on top da land. Julius like do someting good fo Paul, an he let um go by his frenz fo dem take kea him. 4We go from ova dea out on da ocean one mo time an pass nea Cyprus Islan on da leeward side cuz da wind blow agains us. 5We go out da open ocean by da Cilicia an Pamfylia coast, an come Myra, Lycia side, an go on top da land. 6Ova dea da captain find one boat from Alexandria dat goin go Italy side, an he put us on top um.

7Plenny days we go slow, an had hard time fo come by Knidus Islan. Da wind neva let us go da way we like, so we ride boat by Crete Islan, leeward side, unda Salmone Head. 8Had hard time wen we go by da coast side. An we come by one place dey call “Safe Harbor” nea Lasea town.

9We lose plenny time, an da Spesho Day Fo No Eat So Can Pray come awready. Da ocean stay too rough fo ride boat dat time. So Paul tell um, 10“Eh, you guys. Mo betta we no ride boat. If we ride boat bumbye garans we goin get one rough time. We goin get wipe out, an we goin lose da boat an all da stuffs too.” 11But da captain neva like lissen Paul. He do wat da local navigata guy an da boat owna tell um fo do. 12Da port town no stay good fo da winta time, an almos all da guys tink mo betta fo go. Dey figga dey can go Phoenix an stay ova dea winta time. Phoenix one port town Crete side dat face da southwest an da northwest.

Da Storm On Da Ocean

13Get litto bit wind start fo blow from da south, an dey tink dass da one dey need. So dey pull up da anchor an ride boat close by da Crete coast. 14Afta short time one wind dass real strong jalike one hurricane blow on um from da islan. Dat wind get da name “Da Northeast” (Jesus Guys 27:14). 15Da storm grab da boat, an dey no can handle um in da wind. Az why we give up, an da wind blow us. 16Wen we pass by one small islan Cauda, on da leeward side, we almos no can bring da lifeboat up. 17Da guys bring um up on top da big boat, an dey tie ropes good aroun da big boat fo hold um togedda. Dey sked dat dey goin scrape on da sand bar by Syrtis inside Africa. Dey put out da sea anchor an let da boat go wit da wind. 18Da wind poun us real hard, an da nex day da guys start fo throw da stuffs dey carry on da boat ova inside da ocean. 19Day numba three, da guys even throw da stuff fo make da boat work inside da ocean. 20Plenny days da sun an da stars neva come out, an da storm stay real strong. Az wen us lose fight an tink we no goin get outa dis.

21Da guys neva eat plenny days, an den Paul stan up in front dem an tell, “Eh, you guys, you neva like lissen me wen I tell we betta not ride boat from Crete. If you guys wen lissen, we neva get all dis trouble an lose all da stuffs, but you neva lissen. 22Now I tell you guys, no give up, cuz you all goin come outa dis. We ony goin lose da boat. 23I stay tight wit God an work fo him, you know. Las nite one angel messenja guy from God stan by me. 24He tell, ‘No sked, Paul. You gotta stan in front da Big King Cesar. God stay do plenny good kine stuff fo you, an now he goin let all da guys dat ride boat wit you come outa dis okay. Dey no goin mahke.’ 25You guys, no give up! Cuz I trus God dat he goin do jalike wat he tell me he goin do. 26But da boat goin come all bus up on one islan.”

27Afta fourteen nites da wind still blow us across da Adriatic Sea. Bout midnite da saila guys figga dey come nea land. 28Dey drop one line fo find out dat da watta stay one hundred an twenny feet deep. Afta short time dey find out dat da watta stay ninety feet deep. 29Dey come sked dat da wind goin poun us agains da rocks. So dey put down four anchors from da back an pray dat da day time goin come fas. 30Da saila guys try fo escape from da boat, an put da lifeboat down inside da ocean. Dey ack jalike dey goin put down da anchors from da front a da big boat. 31Paul tell da captain an da army guys, “If dese guys no stay by da boat, you no goin come outa dis.” 32So da army guys cut da ropes fo da lifeboat an let da lifeboat go.

33Jus befo da sun come up, Paul beg da guys fo eat. He tell, “Fourteen days you guys wait, an you neva eat notting. 34Now I beg you guys fo eat someting. You need um fo stay alive. You guys no goin lose even one hair from yoa head.” 35Wen he tell dat, he take some bread an tell God “Mahalo plenny!” in front all dem. Den he broke da bread an start fo eat. 36Dat kokua dem, an dey all eat. 37(Had two hundred seventy-six guys on top da boat.) 38Wen dey eat all da stuff dey like, dey throw da wheat inside da ocean an make da boat mo light.

Da Boat Come Bus Up

39Wen da sun come up, dey neva know da land dey come to. But dey spock one bay an one sandy beach. Dey figga az mo betta fo make da boat crash ova dea. 40Dey cut da ropes fo da anchors an leave um inside da ocean. Same time dey hemo da ropes from da ruddas. Den dey put up all da sails in front to da wind an steer um to da beach. 41But da boat hit one side current. Da front come stuck in da rocks an no can move. Da back come all bus up cuz da surf stay poun um.

42Da army guys like kill da prisona guys fo dem no swim away an escape. 43But da captain like take Paul outa dea alive, az why he neva let da army guys take ova da prisonas. He tell da guys dat can swim fo jump ova inside da ocean firs an swim to da land. 44He tell da odda guys fo hang on da boards o da pieces from da boat. Az how all da guys come to da land, an nobody mahke.

Currently Selected:

Jesus Guys 27: HPB

Highlight

Copy