SALMOS 94
94
1X̱ana' Dios, Le' žezi'kzo' wzón benne' ka'.
Le' žebéj yichjo' benne' wen da' ẕinnj ka'.
2Ẕchi'a ḻažo'o Le' da' žongak yógo'te benne' ka'.
Wzó ža', bsaka' benne' ka' kan žaḻa' gak chégake', benne' ka' ẕka'n ẕen kwíngake'.
3X̱ana' Dios, ¿to chi'ize gongak benne' wen da' ẕinnj ka' ki?
¿To chi'ize yebégekle benne' ẕbej yíchjgake' Le'?
4¿To chi'ize wká'n ẕen kwíngake', na' nne zí'gake'?
¿To chi'ize wká'n ẕen kwingak benne' ka' žebéj yíchjgake' Le'?
5Benne' ki ẕžia yí'gake' benne' chio' ka', X̱ana' Dios
na' žsaka' zí'gake' benne' ka' wžekzo' Le'.
6Žótgake' no'le wzebe ka', na' benne' zi'to' ka',
na' žóngake' ga gatgak bi' wzebe ka'.
7Ẕnnágake': “Bi be ẕḻe'el Dios, X̱angak benne' ka',
dan' Dios chegak benne' Israel ka' bi ži'e wnné yoe chégake'.”
8Le chejní'il, ḻe'e, benne' ḻaẕdo' zide ka', ḻe'e, benne' nat ḻaže' ka'.
¿To chi'ize bi chejní'ilele?
9Dios bene' nagžo.
¿Bi ženle' da' ẕnnale?
Dios bene' yej ḻawžo.
¿Bi ẕḻe'ele' da' žonle?
10Dios žsaka' zi'kze' benne' yež ka'.
¿Bi tiḻe' ḻe'e?
Dios nake' Bennen' ẕzejni'ile' benách ka'.
¿Bi gákbe'ele' da' yo'o yichj ḻáẕdo'le?
11X̱anžo Dios nnezkzle' da' yo'o yichj ḻáẕdo'gak yógo'te benách.
Nnezle' zej naken da' yaḻze.
12X̱ana' Dios, ba nez ẕen naken che bennen' ẕzejni'ilo' Le',
na' žsedlo' ḻe' ka nak da' bchi'lo' neto'.
13Ga'n bennen' chawe' kate' za' ža gak bi da' sake'e,
na' ža na' gáche'gak benne' wen da' ẕinnj ka' yežw ba.
14Batkle kwej yichj X̱anžo Dios benne' chie' ka',
na' bi wsán ḻaže'e benne' ka' ba wžekze' Ḻe',
15san gone' ga wchi'a ḻáže'gak benne' ka' ḻo da' naken chawe',
na' yógo'te benne' ḻi ḻaže' ka' si' ḻo ná'gaken'.
16¿Noẕkze benne' gákḻene' neda' nich tíḻ-ḻenžo benne' wen da' ẕinnj ka'?
¿Noẕkze benne' gónḻene' neda' tẕen nich wžía yi'žo benne' wen da' ẕinnj ka'?
17Chela' bi gokḻen X̱anžon' neda',
ba bejgacha'a yežw ba.
18Kate' wnnía': zoa' chejchégoa'a, na' Le', X̱ana' Dios,
ḻo yeḻa' ži'i ḻaže' chio' gókḻeno' neda'.
19Kate' ži'a wnné yoe, na' že' zedla',
žeyón ẕenkzo' neda', na' žono' ga žebéḻe'ela'.
20Batkle gako' toze ḻen benne' ka' ẕchi'a ḻáže'gake' benách ka' ḻo da' bi nak chawe',
benne' ka' ẕzóagake' cheḻa'ale da' naken chawe', na' da' bchi'lo' Le' neto'.
21Benne' ki žóngake' toze diža' bi da' góngake' che no benne' nake' chawe',
na' ẕchóggake' chie' gate', na' bi be ẕia nbage'e,
22san X̱anžo Dios nake' ka to yo'o gan zoa chawa'a.
Dios chia' nake' ka to yej x̱e da' žon chochen neda'.
23Ḻe' yebi'e chegak benne' wen da' ẕinnj ka' ka nakkze da' ẕinnj da' béngake'.
Wžía yi'e benne' ka' ni'a che da' bi nak chawe' da' žóngake'.
X̱anžo Dios wžía yi'e benne' wen da' ẕinnj ka'.
Currently Selected:
SALMOS 94: zty
Highlight
Share
Compare
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
