1 SAMUEL 3
3
TOTECO quinojnotzqui Samuel
1Huan nopa piloquichpiltzi Samuel quipalehuiyaya Elí huan quej nopa quitequipanohuayaya TOTECO. Huan ipan nopa tonali nelhuejhuejcaica TOTECO quinnojnotzayaya masehualme para quinilhuis se camanali. Amo tlatoctzitzi quincamanalhuiyaya quen achtihuiya. 2Huan Elí ya eliyaya nelhuehuentzi huan ya popoyotiyaya. Huan se tonal Elí mosiyajquetztoya ipan ichaj, 3huan Samuel cochtoya ipan itiopa TOTECO campa icaxa Toteco Dios. Huan tlajco yohual quema nopa tlahuili catli tiopan calijtic noja tlahuijtoya, 4TOTECO quinojnotzqui Samuel:
―¡Samuel!
Huan Samuel tlananquili:
―Nica niitztoc.
5Huan nimantzi mejqui huan yajqui quiitato Elí huan quiilhui:
―Nica niitztoc. ¿Para tlen technotztoc?
Huan Elí quinanquili:
―Na amo nimitznotztoc. Xiya ximotecati sempa.
Huajca Samuel sempa motecato. 6Huan TOTECO sempayano quinojnotzqui huan quiijto:
―¡Samuel!
Huan Samuel sempa yajqui quiitato Elí huan quiilhui:
―Nica niitztoc. ¿Para tlen technotztoc?
Huajca Elí quinanquili:
―Na amo nimitznotztoc. Xiya ximotecati sempa.
7Huan Samuel ayamo quiiximatiyaya TOTECO pampa amo quema quinojnotztoya. 8Huan TOTECO sempa quinojnotzqui Samuel ica expa, huan sempa Samuel yajqui quiitato Elí huan quiilhui:
―Nica niitztoc. ¿Tlaque tijnequi ma nijchihua?
Huajca Elí quimachili para eliyaya TOTECO catli quinojnotzayaya Samuel, 9huajca quiilhui:
―Xiya huan ximoteca. Huan sintla sempa mitznojnotzas, huajca xiquijto: ‘TOTECO, techilhui tlaque tijnequi pampa nimotequipanojca huan nimitzcactoc.’
Huajca quej nopa Samuel yajqui huan motejqui sempa.
10Huan TOTECO hualajqui sempa, huan moquetzqui nopona huan quinojnotzqui quen achtihuiya. Huan quiilhui:
―¡Samuel, Samuel!
Huajca Samuel quinanquili:
―TOTECO, techilhui tlaque tijnequi pampa nimotequipanojca huan nimitzcactoc.
11Huajca TOTECO quiilhui Samuel:
―Xiquita, nijchihuas se tlamantli ipan tlali Israel, huan aqui quicaquis hasta itlacaquilis quicocos. 12Nijchihuas nochi tlamantli fiero catli niquilhuijtoc Elí para nijchihuas ica ichaj ehuani. 13Niquilhuijtoc para niquintlatzacuiltis nochi ichaj ehuani para nochipa por inintlajtlacol itelpocahua catli ya quimati. Itelpocahua nechahuilmajtoque huan yaya amo quintlacahualtijtoc. 14Huan ya niquilhuijtoc Elí para amo quema niquintlapojpolhuilis nopa tlajtlacoli catli quichijtoque masque nechmacase miyac tlacajcahualistli o ofrendas para ma nimoyoltlali.
15Teipa Samuel motejqui sempa hasta tlanesqui. Huan huajca mejqui huan caltlapo ipan tiopamitl quen momajtoya quichihua nochipa, pero majmahuiyaya quipohuilis Elí catli TOTECO quiilhuijtoya. 16Pero Elí quinotzqui huan quiilhui:
―¡Nocone, Samuel!
Huajca Samuel quinanquili:
―Nica niitztoc.
17Huajca Elí quiilhui:
―¿Tlaque mitzilhuijtoc Toteco Dios? Nimitztlajtlanía para amo techtlatili niyon se tleno catli TOTECO mitzilhuijtoc. Sintla techtlatilis se tlenijqui, ma TOTECO mitztlatzacuilti.
18Huajca Samuel quiilhui Elí nochi catli TOTECO quiilhuijtoya huan amo tleno quitlatili. Huajca Elí quiilhui:
―Yaya TOTECO catli mitznojnotztoc. Ma quichihua catli yaya quiita para cuali quichihuas.
19Huan Samuel moscaltijtiyajqui huan TOTECO itztoya ihuaya huan quipalehuiyaya. Huan panoc nochi nopa camanali catli TOTECO quiilhuijtiyajqui Samuel para teyolmelahuas. 20Huan nochi israelitame tlen tlali Dan ica huejcapa huan hasta altepetl Beerseba ica tlatzintla quimatque para nelía Samuel eliyaya se itlajtol pannextijca TOTECO catli itztoc xitlahuac. 21Huan TOTECO monextijtinenqui iixpa Samuel ipan altepetl Silo para ma quiiximati. Huan quimacayaya camanali para teyolmelahuas.
Currently Selected:
1 SAMUEL 3: nhwW
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved
