Romanos 8

Espíritu Santupa poderninchö kawanantsikpaq ninqan

1Tsëmi Jesucristuchö kaqkunaqa condenashqatsu kayanqa. [Jutsata rurakur kawayänanpa rantinqa Espíritu Santu käyitsishqannömi kawëkäyan.] 2Jutsapa munëninchö kashqantsikpitam Espíritu Santu jorqamarquntsik. Jutsapa munëninchö wanushqanö karpis Jesucristo salvamashqam alli kawëta tarintsik.

3Jutsapa munëninchö kashqam Teyta Diospa leyninkuna salvamënintsikta puëdirqantsu. Tsënö kaptinmi Tsurin Jesucristuta Teyta Dios kachamurqan noqantsiknö nuna kananpaq. Pëmi sacrificiupaq apayashqan wätanö noqantsik rëkur wanurqan. Tsënöpam jutsapa poderninpita Teyta Dios salvamarquntsik. 4Salvamarnintsikmi leyninkunata cumpliqtanöpis Teyta Dios chaskimantsik. Tsëmi jutsata rurakur kawanantsikpa rantin Espíritu Santu käyitsimashqantsiknöna kawëkantsik.

5Jutsapa poderninchö kawaqkunaqa shonqunkuna yarpashqanta rurayänanpaqmi yarpëkäyan. Espíritu Santupa poderninchö kawaqkunaqa Espíritu Santu käyitsishqannö kawayänanpaqmi yarpëkäyan.

6Jutsapa munëninchö kawaqkunaqa Teyta Diospa nöpanman manam chäyanqatsu. Espíritu Santupa poderninchö kawaqkunaqa Teyta Diospa nöpanchö wiñëpam kushishqa kawayanqa.

7Jutsapa poderninchö kawaqkunaqa Teyta Diospa contran karmi leyninkuna nishqannö kawëta munayantsu ni puëdiyantsu. 8Yapëmi kënö nï: Tsë nunakunaqa manam Teyta Dios munashqannö kawëta puëdiyantsu.

9Noqantsikqa manam jutsapa poderninchönatsu kawëkantsik. Teyta Diospa Espïritun noqantsikchö kaptinmi pëpa poderninchöna kawëkantsik. Jesucristupa Espïritun#8.9 Teyta Diospa Espïritunpaq y Jesucristupa Espïritunpaq parlarqa Espíritu Santullapaqmi parlëkan. noqantsikchö mana kaptinqa manam Jesucristupatsu kantsik.

10Jesucristo noqantsikchö kaptinmi perdonashqana këkantsik. Tsëmi jutsata rurashqantsikpita wanunantsikpaq kaptinpis Espíritu Santuna kawëta qomantsik. 11Teyta Diospa Espïritun noqantsikchö kaptinmi#1Cor. 3.16. wanushqanpita Jesucristuta kawaritsishqannö noqantsiktapis Teyta Dios kawaritsimäshun. Tsënö kawaritsimäshun noqantsikchö këkaq Espíritu Santupa poderninwanmi.

12Wawqikuna y panikuna, tsënö këkaptinqa jutsa rurëpaq shonquntsik löcuyaptinpis ama rurashuntsu. 13Jutsa rurëllachö kawashqaqa infiernumanmi Teyta Dios jitëkamäshun. Tsënö kaptinpis Espíritu Santu käyitsimashqantsiknö jutsa rurëpaq wanushqanö karqa wiñë kawëtam tarishun.

14Teyta Diospa Espïritun käyitsishqannö kawaqkunaqa llapanpis Teyta Diospa wamrankunam kayan. 15Wamran kanantsikpaqmi Espíritu Santu ëllumarquntsik. Espíritu Santuta chaskikushqana karmi patronninta sirwiqnin mantsa mantsalla mañakunqannötsu Teyta Diosta mañakuntsik, sinöqa mana mantsakushpa mañakurmi <<¡Abba, Teytallä!>> nintsik.#Mar. 14.36; Gál. 4.6.

16Kikin Espíritu Santum käyikätsimantsik Diospa wamran kashqantsikta. 17Teyta Diospa wamran karmi pë änikushqan herenciata Jesucristo chaskishqannö noqantsikpis chaskishun. Imata jiparpis Jesucristuman markäkurqa pëwanmi gloriachö kawashun.

Llapanpis mushuqman tikrananpaq ninqan

18Kë patsachö jipashqantsikkunaqa pasariqllam këkan. Gloriachö kushikunantsikpaq kaqmi wiñëpaqa kanqa. Tsëtaqa llapan shonqüwanmi creyï. 19Tsënö kaptinmi Teyta Dios wamrankunata nöpanman ëllunanta llapan kamashqankuna shuyarëkäyan.

20Shuyaräyashqanyaqqa pë kamashqankuna maldisishqam këkäyan. Manam kikinkunapitatsu maldisishqa këkäyan, sinöqa Teyta Dios maldisishqanpitam.#Gén. 3.17; Rom. 5.12. Kanan maldisishqa kaptinpis 21wamrankunata mushuqman Teyta Dios tikraratsishqannöllam llapan kamashqankunatapis mana ushakänanpaq mushuqman tikraratsinqa.

22Tsëyaqmi Teyta Dios llapan kamashqankunapis warmi qeshpikur jipashqannö jipar llakikïkäyan. 23Manam kamashqankunallatsu tsënö llakikïkäyan, sinöqa Teyta Dios raslla ëllumänantsikta munarmi noqantsikpis llakikïkantsik. Espíritu Santuta primiciatanö chaskishqa karmi#8.23 Primiciaqa punta poquqmi këkan. Punta poquqta rikar cosëcha kananpaq kashqanta musyashqantsiknömi Espíritu Santuta chaskir musyantsik gloriaman chänapaq kashqanta. shuyäkïkantsik cuerpuntsiktapis mushuqmanna tikratsinanpaq.#2Cor. 5.2-4.

24Mushuqman tikratsimänantsikpaqmi Teyta Dios salvamarquntsik. Tsënö kaptinpis tsë höra manam chämunraqtsu. Mushuqman tikrashqana këkarqa manachi shuyarashwannatsu. 25Mushuqman manaraq tikrarmi imata jiparpis shuyarëkantsik.

26Teyta Diosta mañakurpis manam shumaqllaqa puëdintsiktsu pë munashqannö mañakïta. Tsëmi Espíritu Santu Teyta Diosta waqapëpa favornintsik mañakun. 27Mañakurmi Teyta Dios munashqannölla imëpis mañakun. Espíritu Santu noqantsikpaq mañakushqankunatam Teyta Dios musyëkan. Pëqa shonquntsik imata yarpashqankunatapis musyanmi.

Teyta Dios kuyamanqantsikta pipis mana michänanpaq ninqan

28Musyantsikmi ima pasaptinpis Teyta Diosta kuyaqkunapaqqa llapanpis alli kananpaq kashqanta. Pëkunataqa Teyta Dios qayarqan kikin munashqannö kananpaqmi. 29Unëpita patsa reqirmi destinarqan Tsurin Jesucristunö kayänanpaq. Tsënöpam Jesucristo këkan llapan markäkuqkunapa mayor wawqinkuna. 30Dispunishqan kaqkunatam Teyta Dios qayarqan. Qayashqan kaqkunatanam perdonarqan. Perdonashqan kaqkunatanam gloriaman pushanqa.

31Tsënö këkaptinqa ¿imatanataq munashun? Teyta Dios noqantsikpaq këkaptinqa ¿pinataq contrantsik kanqa? 32Noqantsik rëkur wanunanpaq kuyë Tsurintapis kachëkämurqa ¿manatsuraq llapan änimashqantsiktapis pëwan Teyta Dios cumplinqa?

33Kikin Teyta Dios akrëkämashqaqa y jutsantsikkunatapis perdonëkämashqaqa ¿pinaraq nöpanchö acusamäshun? 34Jesucristo wanushqanpita kawarirkamur Teyta Diospa allawka kaq lädunchö tëkar noqantsikman qaqaptinqa ¿piraq castigashqa kanantsikpaq acusamäshun?

35Jesucristupa kuyakïninpita ¿piraq rakimäshun? Pëqa kuyamantsikmi jipashqapis, llakikushqapis, nunakuna chikimashqapis, mallaqashqapis, ratashninnaq kashqapis, ima pasamashqapis y nunakuna wanutsimashqapis.

36Teyta Diospa palabranchöpis kënömi qellqarëkan:

<<Munashqëkinö kawayaptïmi chikiyämar imëpis wanutsiyäman.

Pishtayänanpaq üshanömi këkäyä>>.#Sal. 44.22.

37Tsëkuna pasamashqapis Teyta Dios kuyamashqam imëpis kushishqa markäkuntsik.

38Teyta Diosqa kuyamantsikmi kawashqapis, wanushqapis, ima pasamashqapis y ima pasamänantsikpaq kaptinpis. Tsëmi angelkunapis, ni supëkunapis, ni ima puëdiq kaqkunapis, 39ni ciëluchö kaqkunapis, ni patsa rurinchö kaqkunapis, ni Teyta Dios ima kamashqankunapis pëpa kuyakïninpita rakimäshuntsu. Tsënö kuyamashqantsikta käyitsimarquntsik noqantsik rëkur wanunanpaq Señornintsik Jesucristuta kachamurmi.

Currently Selected:

Romanos 8: qwhB

Highlight

Copy

Compare