Romanos 7

Diospa leyninkunapa poderninpita yarqukunqantsik

1Wawqikuna y panikuna, Diospa leyninkunata yachakushqa karmi musyayanki kawaqkunalla leykunata cumpliyänanpaq kashqanta. 2Tsënöllam qowayuq warmipis qowan kawashqanyaqlla qowanpa poderninchö këkan. Qowan wanukuptinqa librinam tikrarin. 3Qowan kawëkaptin jukwan kakurqa qowantam engañan. Qowan wanuriptinran tsë leypita librina kar juk nunawanpis kakïta puëdin.

4Wawqikuna y panikuna, Jesucristo cruzchö wanushqa kaptinmi noqantsikpis Diospa leyninkunapaq wanushqa cuentana këkantsik. Tsënam tsë leykunapa poderninchö kanqantsikpa rantinqa Jesucristupa poderninchöna këkantsik. Pëtam wanushqanpita Teyta Dios kawaritsimurqan pë munashqannöna kawanantsikpaq.

5Nöpataqa jutsa rurëpa poderninchö kawashqam Teyta Diospa leyninkuna yarpätsimarqantsik jutsata mas ruranantsikpaq. Tsënö jutsata rurakurmi wanushqa cuenta karqantsik. 6Kananqa tsë leykunapa poderninchö kashqantsikpita yarqukurmi tsë leykunapaq wanushqanöna këkantsik. Tsënö karqa manam tsë leykunata cumplirtsu Teyta Diosta sirwikantsik, sinöqa Espíritu Santu yanapamaptintsikmi.

Jutsa rurë poderninchö tsararämanqantsik

7Tsënö kaptinpis ama yarpäshuntsu Diospa leyninkuna mana alli kashqanta. Diospa leyninkunaqa allim këkan. Tsë leykunata mana musyarqa jutsa ima kashqantapis manam musyämantsu karqan.

Tsë leykunachömi nin: <<Ama nuna mayikipa imëkankunatapis munapankitsu>>.#Éxo. 20.17; Deut. 5.21.

Tsënö mana niptinqa jukpa imantapis munapashqä jutsa kashqanta manam musyämantsu karqan. 8Tsënö këkaptinpis tsë leyta jutsa rurë inshiptinmi masraq imëkatapis munaparqä. Diospa leyninkunata mana musyaptïqa jutsa rurë wanushqa kar manam yarpätsimanmantsu karqan.

9Nöpataqa tsë leykunata manaraq musyarmi yamë kawakurqä. Tsënö kaptinpis Diospa leyninkunata musyarirnam jutsa rurë poderyuq tikraptin wanushqanö karqä. 10Tsëmi Teyta Diospa leyninkunata musyarpis alli kawëman chänäpa rantin wanïman charqä. 11Tsënöpam jutsa rurë engañamar Diospa leyninkunata inshirqan wanutsimänanpaq.

12Tsënö këkaptinpis Teyta Diospa leyninkuna y mandamientunkuna rasunpa allim y sagrädum këkan. 13Wanushqa cuenta tikranäpaq manam Diospa leyninkunatsu jutsayuq këkan, sinöqa jutsa rurëmi. Jutsa rurëmi Diospa leyninkunata inshir wanïman apamarqan. Tsënöpam käyï jutsa rurë alläpa mana alli kashqanta.

14Musyantsikmi Teyta Diospa leyninkuna alli kashqanta. Tsënö kaptinpis noqaqa nunalla karmi jutsa rurëpa poderninchö këkä. 15Tsënö karmi imanir jutsata rurashqätapis käyïtsu. Allita rurëta munarpis mana munashqä kaqtam rurä.#Gál. 5.17. 16Mana munashqä kaqta rurarmi tsë leykuna alli kashqanta musyarï.

17Jutsa rurëta mana munaptïpis shonqüchö këkaq jutsa rurëmi mana allikunata ruratsiman. 18Noqaqa allikunata rurëta munarpis manam puëdïtsu. Tsëmi musyä shonqüchö imapis allillaqa mana kanqanta. 19Tsënö karmi Teyta Dios munashqanta rurëta munëkarpis mana allikunata rurä. 20Jutsa rurëta mana munaptïpis shonqüchö jutsa rurëmi jutsata ruratsiman.

21Tsënömi imëpis pasaman. Allita rurëta munarpis mana allitam rurä. 22Teyta Diospa leyninkunata shonqüchö cäsukïta munaptïpis 23jutsa rurëmi alli yarpënïwan pelyëkan. Vencimarmi prësutanö tsarämar jutsa rurëman ishkitsiman. 24-25Noqaqa Teyta Diospa leyninkunata cäsukïta munarpis jutsa rurëpa poderninllachömi këkä. ¡Allaw noqallä! Alläpa ankupëpaqmi këkä. Wanushqanö këkashqäpita ¿pillaraq salvëkamanqa? ¡Payllä, Teyta Dios! ¡Señornintsik Jesucristum salvëkaman!

Currently Selected:

Romanos 7: qwhB

Highlight

Copy

Compare