Romanos 4

Teyta Diosman Abraham markäkunqan

1Yarpäshun awiluntsik Abrahamta Teyta Dios imanö perdonashqanta. 2Allikunata rurashqanpita Teyta Dios perdonaptinqa Abraham alabakunmanmi karqan. Tsënö kaptinpis manam allikunata rurashqanpitatsu perdonarqan, sinöqa pë nishqanta creyishqanpitam. 3Teyta Diospa palabranmi kënö nin: <<Nishqanta creyiptinmi jutsannaqtana Abrahamta Teyta Dios chaskirqan>>.#Gén. 15.6; Gál. 3.6.

4Musyashqantsiknöpis uryapukuq nunaqa uryashqanpitam pägunta chaskin. Mana uryëkar imatapis chaskirqa qarëllatam chaskin. 5Tsënöllam jutsantsikkunata Teyta Dios perdonamantsik. Manam allikunata rurashqantsikpitatsu perdonamantsik, sinöqa pëman markäkushqantsikpitam.

6Teyta Dios qarëlla perdonashqan nuna kushishqa kashqanpitam rey Davidpis kënö qellqarqan: 7<<Kushishqam kawan Teyta Dios perdonashqan nuna. Pëpa jutsankunataqa Teyta Dios manam yarpannatsu. 8Kushishqam kawan jutsannaqtana Teyta Dios chaskishqan nuna>>.#Sal. 32.1-2.

Manaraq señalakuptin Abrahamta Teyta Dios perdonanqan

9¿Señalakushqa Israel nunakunallatsuraq perdonashqa këkäyan? ¿Manatsuraq señalakunni mana Israel nunakunapis perdonashqa këkäyan? Yarpakachäshun Abrahamta Teyta Dios perdonaptin imanö kashqanta. Niyanqaqnöpis markäkuptinmi Abrahamta Teyta Dios jutsannaqtana chaskirqan. 10¿Señalakuptinraqtsuraq Abrahamta perdonarqan? Manam. Manaraq señalakuptinmi perdonarqan.

11Perdonarirran Abrahamta señalakunanpaq Teyta Dios nirqan.#Gén. 17.10. Tsënö señalakurqan Teyta Diosman markäkushqanpita perdonashqa kanqanta mana qonqananpaqmi. Tsëmi señalakunni kaqkunapis Abrahamnö markäkurqa pëpa castanna këkäyan. Tsënöpam Teyta Dios pëkunatapis perdonan.

12Tsënöllam señalakushqa kaqkunapis Abrahamnö markäkurqa Abrahampa castan këkäyan. Abrahampa castan këkäyan manam señalakushqa kayashqanpitatsu, sinöqa Abrahamnö manaraq señalakur markäkuyashqanpitam.

Abrahamnö markäkushqa salvamänantsikpaq ninqan

13Manam leykunata cumpliyashqanpitatsu Abrahamta y mirëninkunatapis kë patsata qoykunanpaq#Gén. 17.4-6; 22.17-18. Teyta Dios änirqan, sinöqa Teyta Diosman markäkuyashqanpitam. 14Leykunata cumpliqkunalla Teyta Dios änikushqanta chaskiyänan kaptinqa manakaqllapaqmi kanman karqan Teyta Diosman markäkuyashqanpis. Teyta Dios änikushqanpis manam välinmantsu karqan.#Gál. 3.18.

15Leyninkunata mana cumpliqkunataqa Teyta Dios castiganmi. Tsënö kaptinpis tsë leykunata musyëkarpis manam cumplintsiktsu. 16Tsëmi leyninkunata cumplishqantsikpitatsu Teyta Dios änimashqantsik salvacionta chaskintsik, sinöqa pëman markäkushqantsikpitam. Tsënöpam Israel nuna karpis y mana Israel nuna karpis Abrahamnö markäkushqaqa Teyta Dios ankupämarnintsik salvamantsik. Abraham creyikushqannö Teyta Diosman markäkurqa Abrahampa castanmi këkantsik.#Gál. 3.7.

17Abrahampaqqa Teyta Diospa palabranchöpis kënömi qellqarëkan: <<Atska nación nunakunapa tëtan kanëkipaqmi qamta churarquq>>.#Gén. 17.5.

Teyta Dios tsënö nirqan pëman Abraham markäkushqa kaptinmi. Teyta Diosmi wanushqakunata kawaritsimun y imapis mana kaqpitam imatapis kaman.

Teyta Dios änikunqanta Abraham creyinqan

18Abrahamta änirmi Teyta Dios nirqan: <<Atska nación nunakunapa tëtan kaptikim qampita miraqkunaqa yupëtapis mana puëdipaq kayanqa>>.

Tsë änishqanta Teyta Dios imanö cumplinanpaq kashqanta mana käyirpis Abrahamqa creyirqanmi.#Gén. 15.5. 19Tsënö änishqan witsanqa juk pachak (100) watayuqnam Abraham këkarqan. Wamran kananpaqpis awkinnam karqan. Warmin Sarapa killa qeshyanpis pärashqanam karqan. Tsënö kaptinpis Abrahamqa Teyta Diosmanmi markäkurqan. 20Manam janan shonqullatsu markäkurqan, sinöqa payllä nikurmi änishqanman llapan shonqunwan markäkurqan. 21Pëqa creyirqan änishqanta Teyta Dios cumplinanpaq puëdiq kashqantam. 22Tsënö markäkushqanpitam Teyta Dios jutsannaqtana chaskirqan.

23Qellqarëkashqanchö nishqannö manam Abrahamllatatsu Teyta Dios perdonarqan, 24sinöqa noqantsiktapis perdonamantsikmi. Tsënö perdonamantsik Señornintsik Jesucristuta kawaritsimuq Teyta Diosman markäkushqam. 25Jutsata ruranqantsikpitam Jesucristo wanunanpaq Teyta Dios permitirqan.#Isa. 53.4-5. Y perdonamänantsikpaqmi Teyta Dios kawaritsimurqan.

Currently Selected:

Romanos 4: qwhB

Highlight

Copy

Compare