Romanos 12
12
Teyta Diosta sirwinantsikpaq churamanqantsik
1Wawqikuna y panikuna, qamkunatam rowayaq Teyta Diospa poderninman kawënikikunata jaqiriyänëkipaq. Pë ankupëkäyäshuptikiqa kawëkaq santu sacrificiu këkulläyë. Tsënö karmi Teyta Dios munashqannö rasunpa sirwiyanki. 2Wakin nunakuna jutsata rurayaptinpis qamkunaqa ama jutsata rurayëtsu. Yarpënikikunapis nöpata kanqannöqa ama katsuntsu, sinöqa Teyta Dios munanqannöna katsun. Tsënö kawarmi käyiyanki pë munashqannö kawëqa kuyëpaq kashqanta.
3Teyta Diosmi ankupämar willakuqnin kanäpaq churamashqa. Tsëmi llapëkita niyaq: Ama yarpäyëtsu wakinpita mas precisaq kayashqëkita. Pëman markäkunantsikpaq Teyta Dios yanapëkämashqaqa käyikushun llapantsikpis precisaq kashqantsikta. 4Cuerpuntsikchö atska partintsikkuna karpis juk cuerpullachömi këkan. Tsënö karpis manam tsë rurëllatatsu rurayan. 5Tsënöllam Jesucristuta chaskikuqkuna atskaq karpis juknintsik juknintsikpis juk cuerpunölla këkantsik.#1Cor. 12.12.
6Tsënö kashqam Teyta Dios juknintsik juknintsikta churamantsik pë munashqannö sirwinantsikpaq. Profëta kanantsikpaq churamashqaqa pëman markäkur willakïninta willakushun. 7Yanapakunantsikpaq churamashqaqa yanapakushun. Yachatsikunantsikpaq churamashqaqa yachatsishun. 8Kallpatsanantsikpaq churamashqaqa kallpatsashun. Imatapis qoykunantsikpaq churamashqaqa llapan voluntänintsikwan qoykushun. Mandakunantsikpaq churamashqaqa alli yarpënintsikwan mandakushun. Ankupäkuq kanantsikpaq churamashqaqa kushishqalla pitapis yanapashun.#1Cor. 12.4-11.
Imanö kawanantsikpaqpis käyitsinqan
9Janan shonqulla kuyanakuyänëkipa rantin llapan shonqïkikunawan kuyanakuyë.
Llutankunata rurayänëkipaqqa ama ichikllapis yarpäyëtsu. Tsëpa rantinqa allillata rurar kawayë.
10Castëkikunawan kuyanakushqëkinö kuyanakuyë. Tsënölla jukniki jukniki respetanakuyë. Kikikikunalla alli kawayänëkipaq yarpakachäyänëkipa rantin wakinkunapis alli kawayänanpaq yarpakachäyë.
11Ama qela kayëtsu, sinöqa ankash ankashlla Teyta Diosta sirwiyë.
12Teyta Diosta shuyäkur kushi kushilla kawakuyë.
Imata jiparpis pëman markäkuyë.
Imëpis pëta mañakuyë.
13Jesucristuman markäkuq mayiki pishipakuqta rikarqa yanapëkuyë. Wayikikunaman chäyämuptinpis posadakatsiyë.#Heb. 13.2; 1Ped. 4.9.
14Chikishuqnikipa wasan ama rimayëtsu. Tsëpa rantinqa Teyta Diosta mañakuyë yanapananpaq.#Mat. 5.44; Luc. 6.28.
15Kushishqa kaqkunawan kushikuyë. Waqaq kaqkunawan waqakuyë.
16Jukniki juknikipis shumaq kawayë. Nuna tukuyänëkipa rantin qollmi shonqu kaqkunawanpis kuyanakur kawayë. Ama yachaq tukuyëtsu.#Prov. 3.7.
17Chikiyäshuptikipis qamkunaqa ama chikiyëtsu. Tsëpa rantinqa pïmëpis rikänanpaq allillata rurar kawayë 18Imëkanöpapis llapan nunakunawan alli kawëta tïrayë.
19Kuyë wawqikuna y panikuna, chikiyäshuqnikikunapa contran ama venganzata ashiyëtsu. Tsëpa rantinqa Teyta Dios juzgananpaq pëpa poderninman churëkuyë. Teyta Diospa palabranchöpis kënömi qellqarëkan: <<Mana allikunata rurayashqanpita kikïmi juzgashaq>>.#Deut. 32.35.
20Jina kënömi nikan:
<<Chikishuqniki mallaqaptinqa mikïnin qarëkï.
Yakunaptinqa yakun makyëkï.
Tsënö rurashqëkipitam pasëpa penqakunqa>>.#Prov. 25.21-22.
21Nunakuna llutanta rurayaptinpis qamkunaqa allillata rurayë.
Currently Selected:
Romanos 12: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
