Popular Bible Verses from Romanos 12

Share

Wakin nunakuna jutsata rurayaptinpis qamkunaqa ama jutsata rurayëtsu. Yarpënikikunapis nöpata kanqannöqa ama katsuntsu, sinöqa Teyta Dios munanqannöna katsun. Tsënö kawarmi käyiyanki pë munashqannö kawëqa kuyëpaq kashqanta.

Wawqikuna y panikuna, qamkunatam rowayaq Teyta Diospa poderninman kawënikikunata jaqiriyänëkipaq. Pë ankupëkäyäshuptikiqa kawëkaq santu sacrificiu këkulläyë. Tsënö karmi Teyta Dios munashqannö rasunpa sirwiyanki.

Teyta Diosta shuyäkur kushi kushilla kawakuyë. Imata jiparpis pëman markäkuyë. Imëpis pëta mañakuyë.

Nunakuna llutanta rurayaptinpis qamkunaqa allillata rurayë.

Castëkikunawan kuyanakushqëkinö kuyanakuyë. Tsënölla jukniki jukniki respetanakuyë. Kikikikunalla alli kawayänëkipaq yarpakachäyänëkipa rantin wakinkunapis alli kawayänanpaq yarpakachäyë.

Janan shonqulla kuyanakuyänëkipa rantin llapan shonqïkikunawan kuyanakuyë. Llutankunata rurayänëkipaqqa ama ichikllapis yarpäyëtsu. Tsëpa rantinqa allillata rurar kawayë.

Imëkanöpapis llapan nunakunawan alli kawëta tïrayë.

Kuyë wawqikuna y panikuna, chikiyäshuqnikikunapa contran ama venganzata ashiyëtsu. Tsëpa rantinqa Teyta Dios juzgananpaq pëpa poderninman churëkuyë. Teyta Diospa palabranchöpis kënömi qellqarëkan: <<Mana allikunata rurayashqanpita kikïmi juzgashaq>>.

Ama qela kayëtsu, sinöqa ankash ankashlla Teyta Diosta sirwiyë.

Teyta Diosmi ankupämar willakuqnin kanäpaq churamashqa. Tsëmi llapëkita niyaq: Ama yarpäyëtsu wakinpita mas precisaq kayashqëkita. Pëman markäkunantsikpaq Teyta Dios yanapëkämashqaqa käyikushun llapantsikpis precisaq kashqantsikta.

Chikiyäshuptikipis qamkunaqa ama chikiyëtsu. Tsëpa rantinqa pïmëpis rikänanpaq allillata rurar kawayë

Jukniki juknikipis shumaq kawayë. Nuna tukuyänëkipa rantin qollmi shonqu kaqkunawanpis kuyanakur kawayë. Ama yachaq tukuyëtsu.

Jina kënömi nikan: <<Chikishuqniki mallaqaptinqa mikïnin qarëkï. Yakunaptinqa yakun makyëkï. Tsënö rurashqëkipitam pasëpa penqakunqa>>.

Chikishuqnikipa wasan ama rimayëtsu. Tsëpa rantinqa Teyta Diosta mañakuyë yanapananpaq. Kushishqa kaqkunawan kushikuyë. Waqaq kaqkunawan waqakuyë.

Jesucristuman markäkuq mayiki pishipakuqta rikarqa yanapëkuyë. Wayikikunaman chäyämuptinpis posadakatsiyë.

Cuerpuntsikchö atska partintsikkuna karpis juk cuerpullachömi këkan. Tsënö karpis manam tsë rurëllatatsu rurayan. Tsënöllam Jesucristuta chaskikuqkuna atskaq karpis juknintsik juknintsikpis juk cuerpunölla këkantsik.