Nahum 3
3
1¡Nínive nunakuna, kananmi musyayämanki!
Qamkunaqa nunapa yawarninta ramëpam ramayarqunki.
Ulikurllam y nunakunata wanutsirllam purikäyanki.
Mana jamëpam suwakïllaman churakashqa kakïkäyanki.
2Tsëmi wiyayanki chikutikunata pashtatsiyaqta,
carrëtakunapa ruëdankuna büllata ruraqta,
cawallukuna patatëllapa ëqiyaqta
y carrëtakuna jaqrararllana ëwëkäyaqta.
3Tsënöllam rikäyanki cawallun montashqa soldädukuna atacayäshunqëkita,
chipapëkaq espädankuna y lanzankuna tsarashqa shamïkäyaqta,
tsëtsika nunakuna dañakushqa këkäyaqta,
waranqapayan ayakuna jitaräkïkaqta
y yupëtapis mana puëdipaq wanushqa nunakuna këkäyaqta.
Tsëmi mëman japarkuyänëkipaqpis sitiu kanqatsu.
4 Prostitüta warmi kuyëllapaq kar nunata engañanqannömi atska markakunata engañayarqunki.
Brüjukunanömi juk nación nunakunatapis creyitsiyarqunki.
Tsënö kayashqëki rëkurmi tsë desgraciakuna pasayäshunki.
5Tsëmi llapanta mandaq Teyta Dios niyäshunki:
<<Qamkunapa contrëkim këkä.
Imëka nunakunapa nöpanchö ruripanta qalipaptin warmi penqakunqannöllam qamkunapis markakunapa nöpanchö penqakuyanki.
6Jina imëka ismëta jalukurkur nuna penqakunqannöllam qamkunapis penqakuyanki.
7Llapan rikäyäshuqniki nunakunam safar niyanqa:
<¡Nínive marka pasëpam ushakärishqa!
Kananqa ¿piraq tsë markata ankupanqa?
¿Pillaraq tsëchö täraq nunakunata shoqanqa?>
8<<Nínive nunakuna, ¿imanirtaq yarpäyanki Tebas nunakunapita mas poderyuq kayashqëkita?
Tebas markaqa këkan Nilo mayupa lädunchömi.
Tsë mayum markapa jinantin kuchunpa jirurur imëka perqanö këkan.
9Pipis mana atacayänanpaqmi Etiopía y Egipto nacionkuna Tebas markaman imëpis qaqäyarqan.
Tsënöllam Fut y Libia nacionkunapis tsë markata yanapayarqan.
10Tsënö këkaptinpis juk nación nunakunam vencirir Tebas nunakunata prësu apakuyarqan.
Tsënöllam wamrankunatapis urusnin pinchiqpaqyan cälli esquïnakunachö sheqir ushayarqan.
Tsëchö këkaq yachaq nunakunata prësu apakuyänanpaqmi sortiyayarqan.
Jina anciänukunatapis cadinarkurmi prësu apakuyarqan.
11<<Nínive nunakuna, qamkunapis Tebas marka nunakunanöllam mantsakëwan imëka machashqa nunanö tashtapëkäyanki.
Contrëkikuna mana tsariyäshunëkipaqmi ratakur ëqikachäyanki.
12Imëka hïgus montita kuyurkatsir ishkiriq wayïninta mikur ushayashqannömi qamkunatapis ushariyäshunki.
Poqushqa hïgus shikwanqannöllam ratakuna törrikikunapis juchur ushakäyanqa.
13Soldädïkikunapis pasëpa warmi cuentam kayanqa.
Punkïkikunata nina rawrar ushariptinmi mankarëkar quedanqa contrëkikuna yëkayämunanpaq.
14<<Upuyänëkipaq yakuta churayaptikipis,
marka tumariq perqa mas anchu kananpaq perqayaptikipis,
leqitata jalïkur tikawan shumaq segurayaptikipis
15markëkikunata kayarninmi qamkunatapis kayayäshunki.
Safaq kaqtam espädawan wanutsiyäshunki.
Chakra murukïta mallunya kuru pitsëpa usharinqannöllam qamkunatapis ushakätsiyäshunki.
Tsënö kananpaq këkaptinqa ¡soldädïkikuna tsëtsika kayänanpaq ëlluyë!
¡Pintiq kurukuna tsëtsika kashqannö kayänëkipaq qamkunapis mirayë!
16<<Qamkuna kaqchö negociantikuna qoyllurnöran mirayashqa.
Tsënö këkarpis imëka pintiq kurukuna shoqpikurir pärir#3.16 Wakin nunakunaqa bolar niyanmi. ewkuyanqannöllam pëkunapis ewkuyanqa.
17Markëkita täpaq soldädukuna y capitannikikunapis tsëtsika pintiq kurukunanömi këkäyan.
Alalaptin perqachö pintiq kurukuna laqaräyashqannömi capitannikikunapis këkäyan.
Intïramuptin pintiq kurukuna bolar ëwakuyanqannöllam soldädïkikunapis safar ewkuyanqa.
Mëchö kayashqanpis manam musyakanqatsu.
18<<Asiria nacionpa reynin, käyikï ima pasashunëkipaq kashqantapis.
Yanapashuqnikikuna y soldädïkipa capitanninkunapis wanurmi ushakäyanqa.
Soldädïkikunapis jirkakunapa witsikaptin pipis manam ëllunanpaq kanqatsu.
19Qampaqqa wanïpis janëkichönam këkan.
Qamqa pïmëtapis mana ankupashpam jipatsirqunki.
Tsëmi desgracia pasashushqëkita musyarir pïmëpis asipäyäshurniki paqchipäyäshunki>>.
Currently Selected:
Nahum 3: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
