Marcos 3

Makin tsakishqa nunata jamakï junaqchö Jesús kachakätsinqan

Mateo 12.9-14; Lucas 6.6-11

1Juk kutim sinagögaman Jesús yapë yëkurirqan. Tsëchömi makin tsakishqa nunapis këkarqan. 2Tsëmi Jesústa rikarëkäyarqan jamakï junaqchö kachakätsiptinqa tsë achäquilla contran shäriyänanpaq.

3Jesúsnam makin tsakishqa nunata kënö nirqan: <<Nunakunapa chöpinman shäkuri>>.

4Tsëpitanam nunakunata tapurqan: <<Jamakï junaqchö ¿allitaku o mana allitaku rurashwan? Nuna mayintsikta ¿salvashwanku o <wanukutsunpis> nishwanku?>>

Tsënö niptin manam imatapis niyarqantsu. 5Tsëmi pëkunata Jesús piñashqa rikärirqan. Mana ankupäkuq kayashqanta musyarmi alläpa llakikur makin tsakishqa nunata kënö nirqan: <<¡Makikita pallari!>>

Pallarkuptinmi makin kachakärirqan. 6Tsëmi fariseukuna yarqurir Herodesman qaqaq nunakunawan Jesústa wanutsiyänanpaq parlayarqan.

Jesústa atskaq nunakuna qatiyanqan

7Tsëpitanam discïpulunkunawan Jesús ëwarqan qocha kuchunman. Qepantanam atskaq nunakuna Galileapita y Judeapita ëwayarqan. 8Tsënöllam Jesús rurashqankunata musyar Jerusalénpita, Idumeapita, Jordán mayu wak tsimpanpita, Tiro markapita y Sidón markapitapis tsëtsika nunakuna ëwayarqan. 9Tsëmi discïpulunkunata Jesús kënö nirqan: <<Nunakuna juntayämuptin lloqanäpaq barcuta listullana këkätsiyë>>.

10Atskaq nunakunata kachakätsishqa kaptinmi llapan qeshyaqkuna imëkanöpapis Jesústa yatëkïta munayarqan.#Mar. 4.1; Luc. 5.1-3.

11Jesústa rikëkurmi supëkuna löcuyätsishqan nunakunapis nöpanman lätëkur qaparipa niyarqan: <<¡Qamqa Diospa Tsurinmi kanki!>>

12Tsënö niyaptinmi pëkunata Jesús piñaparqan pï kashqantapis mana willakuyänanpaq.

Chunka ishkë apostolninkunata Jesús akranqan

Lucas 6.12-16

13Tsëpita jirkaman Jesús witsarkurmi wakin discïpulunkunata shutinkunapayan qayarqan. 14Tsë qayashqan discïpulunkunam chunka ishkë apostolninkuna kayarqan. Pëkunatam qayarqan pëwan puriyänanpaq, Teyta Diospa willakïninta willakuyänanpaq, 15[qeshyëkaqkunata kachakätsiyänanpaq] y nunakunapita supëkunata qarquyänanpaq. 16Pëkunam kayarqan Simón (pëpa shutintam trocarqan Pedro kananpaq) 17y Zebedeupa tsurinkuna Santiaguwan Juan. Santiagupa y Juanpa kuyë shutinkuna kananpaqmi churarqan Boanerges nir. Boanerges ninanqa <<räyupa tsurinkuna>> ninanmi. 18Wakin kaqkunam kayarqan Andrés, Felipe, Bartolomé, Mateo, Tomás, Alfeupa tsurin Santiago, Tadeo, Zelote nishqan Simón 19y Jesústa rantikuq Judas Iscariote.

Jesúspa contran parlayanqan

Mateo 12.22-32; Lucas 11.14-23; 12.10

20Tsëpita juk wayiman Jesús yëkuptinmi tsëmanpis atskaq nunakuna ëllukäyarqan. Tsëmi tiempun karqantsu discïpulunkunawan mikuyänanllapaqpis. 21Jesús tsënö këkashqanta musyarirmi löcuyashqa këkashqanta yarpar castankuna ëlluq ëwayarqan.

22Tsë junaqkunam ley yachatsikuqkuna Jerusalénpita chärir niyarqan: <<Kë nunaqa supëkunapa mandakuqnin Beelzebúpa#3.22 Beelzebúqa Satanáspa juk kaq shutinmi këkan. poderninwanmi supëkunata qarqun>>.#Mat. 9.34; 10.25.

23Tsënö niyaptinmi tsë nunakunata qayëkatsir Jesús iwalatsikïpa nirqan: <<¿Imanöpataq Satanás kikinta qarqukunman? 24Juk nacionchö nunakuna kikinkunapura chikinakurqa ¿manatsuraq wanutsinakur ushakäyanman? 25Jina juk wayichö täraqkuna chikinakurqa ¿manatsuraq wakpa këpa ewkur ushakäyanman? 26Satanáspis kikinpa contran shärirqa ushakanqam. 27Kallpayuq nunata manaraq pankarqa manam pipis wayinman yëkur imankunatapis apakunmantsu. Pankëkurqa imankunatapis apakunqa.#3.27 Kallpayuq nunamanmi Satanásta iwalatsin. Imankunamanmi poderninchö tsarashqan nunakunata iwalatsin. Satanásta pankaq nunamanmi Jesucristo kikinta iwalatsikun. Tsënöpam käyitsirqan Satanáspita mas puëdiq kashqanta.

28<<Rasunpam niyaq: Nunakuna jutsata rurayashqanta y Diospa contran parlayashqantapis Teyta Dios perdonanqam. 29Peru Espíritu Santupa contran parlayashqantaqa imëpis manam perdonanqatsu>>.#3.29 Espíritu Santuqa jutsantsikta jaqirir Jesucristuta chaskikunantsikpaqmi käyitsimantsik (Juan 16.8-11). Tsëmi Espíritu Santupa contran parlarqa pë käyitsishqanta mana chaskikur Jesucristuta imëpis chaskikuntsu (Hech. 7.51). Tsënö kaptinpis Jesucristuta chaskikuq kaqqa perdonta tarinqam.#Luc. 12.10.

30Jesús tsënö nirqan supë yanapëkashqanta niyaptinmi.

Jesúspa mamänin y wawqinkuna pikuna kayanqanpis

Mateo 12.46-50; Lucas 8.19-21

31Tsëpitanam Jesúspa mamänin y wawqinkuna wayiman chëkur waqtallapita Jesústa qayatsiyarqan. 32Tsëmi Jesúswan tëkaqkuna kënö willayarqan: <<Mamëki y wawqikikunam waqtachö shuyëkäyäshunki>>.

33Jesúsnam nirqan: <<Mamänï y wawqïkuna ¿pikuna kayashqantapis musyayankiku?>>

34Tsënö nirmi pëwan tëkaqkunata rikärir nirqan: <<Këchömi mamänï y wawqïkuna këkäyan. 35Pipis Teyta Dios munashqannö kawaq kaqmi wawqï, panï y mamänï kayan>>.

Currently Selected:

Marcos 3: qwhB

Highlight

Copy

Compare