Marcos 16

Wanunqanpita Jesús kawarimunqan

Mateo 28.1-8; Lucas 24.1-12; Juan 20.1-10

1Jamakï junaq pasariptinnam María Magdalena, Santiagupa mamänin María y Salomépis pukutaq qorakunata rantiyarqan Jesúspa ayanman jichayänanpaq. 2Tsëmi domingu qoyalla inti tsëraq yarqëkämuptin Jesús pamparashqanman ëwayarqan. 3Nänipa ëwarëkarmi niyarqan: <<¿Piraq sepultüra tsaparaq rumita kichamunqa?>>

4Chëkurnam tariyarqan sepultüra tsaparaq jatun rumi wititsishqana këkaqta. 5Sepultüra rurinman yëkurirnam rikäyarqan juk jövin yulaq ratashllashqa allawka kaq läduchö tëkaqta. Pëta rikëkurmi alläpa mantsakäyarqan. 6Tsë jövinnam nirqan: <<Ama mantsakäyëtsu. Musyämi crucifiquëpa wanutsiyashqan Jesústa rikaq shayämushqëkita. Pëqa manam këchönatsu. ¡Kawarimushqanam! Maski rikäyë mëman churayashqantapis.

7<<Kanan ëwar Pedruta y wakin discïpulukunata willayë Galileaman nöpëkashqanta. Nöpata ninqannöllam tsëchö pëkunawan tinkuyanqa>>.#Mat. 26.32; Mar. 14.28.

8Tsënö niptinmi warmikuna mantsakëwan karkaryëkar raslla ewkuyarqan. Mantsakashqa karmi rikäyashqankunata pitapis willayarqantsu.

María Magdalenata Jesús yuripunqan

Mateo 28.9-10; Juan 20.11-18

9[Domingu qoya Jesús kawarirkamurmi puntata yuripurqan María Magdalenata. Pëpitam qanchis supëkunata qarqushqa karqan. 10Yuripïkuptinnam María Magdalena ëwarqan Jesúswan puriqkunata willananpaq. Chëkurnam tarirqan llakikur waqakïkäyaqta. 11<<Jesústa kawëkaqtam rikarqü>> nir willakuptinpis manam creyiyarqantsu.

Ishkë discïpulunkunata Jesús yuripunqan

Lucas 24.13-35

12Tsëpitanam markapita ëwëkäyaptin ishkë discïpulunkunata Jesús yuripurqan. Pëqa manam puntata kashqannönatsu karqan. 13Tsëpita kutïkurnam discïpulu mayinkunata Jesús yuripunqanta willayarqan. Willayaptin pëkunatapis manam creyiyarqantsu.

Willakuyänanpaq discïpulunkunata Jesús kachanqan

Mateo 28.16-20; Lucas 24.36-49; Juan 20.19-23; Hechos 1.6-8

14Tsëpitanam chunka juk discïpulunkuna mikïkäyaptin Jesús yurirkur nirqan: <<Markäkïninnaq chukru shonqu nunakuna, kawarimushqäta willayäshuptikipis ¿imanirtaq mana creyiyarqunkitsu?>>

15Kënöpis nirqanmi: <<Mëtsëpapis ëwar llapan nunakunata alli willakïnïta willakuyanki.#Mat. 28.19-20; Hech. 1.8. 16Mëqanpis creyir bautizakuq kaqqa salvakunqam. Mana creyiqkunanam infiernuman jitashqa kayanqa. 17Creyikuqkunaqa milagrukunatapis rurayanqam. Shutïchömi supëkunatapis qarquyanqa y juk idiömakunatapis parlayanqa. 18Culebra kaniyaptinpis, venënuta qarayaptinpis manam wanuyanqatsu. Tsënöllam qeshyaqkunata yatëkur Teyta Diosta mañakuyaptin kachakäyanqa>>.

Ciëluman Jesús kutikunqan

Lucas 24.50-53; Hechos 1.9-11

19Discïpulunkunata parlapar ushariptinmi Señor Jesústa gloriaman Teyta Dios apakurqan.#Hech. 1.9. Tsëchömi Teyta Diospa allawka kaq lädunman täkurirqan. 20Tsënam discïpulunkuna mëtsëchöpis willakuyarqan. Kikin Señornintsikmi yanaparqan milagrukunatapis rurayänanpaq. Tsëta rikarmi nunakuna käyikuyarqan tsë willakuyashqan rasunpa kashqanta. Amén.]#16.20 Nöpa kaq griego copiakunachö versïculu 9-pita ushashqanyaqqa manam kantsu.

Currently Selected:

Marcos 16: qwhB

Highlight

Copy

Compare