Marcos 14

Jesústa wanutsiyänanpaq parlayanqan

Mateo 26.1-5; Lucas 22.1-2; Juan 11.45-53

1Jesús tsënö yachatsirqan Pascua#Éxo. 12.1-27; Deut. 16.1-8. fiesta y Levadürannaq Tanta Mikuna fiesta qallëkunanpaq ishkë junaq pishikaptinmi. Tsë junaqkunam mandakuq sacerdötikuna y ley yachatsikuqkuna parlayarqan nunakunata mana musyatsishllapa Jesústa imanöpapis tsarïkur wanutsiyänanpaq. 2Tsëmi niyarqan: <<Fiestachöqa ama tsarishuntsu. Tsëchö tsarishqaqa nunakuna contrantsikmi shärikurkuyanqa>>.

Jesúspa peqanman perfümita jichanqan

Mateo 26.6-13; Juan 12.1-8

3Betania markachö leprösu niyashqan Simónpa wayinchö Jesús këkaptinmi juk warmi chärirqan alabastro rumipita rurashqa pömuchö perfümin tsarashqa. Tsë perfümiqa nardupita rurashqa karmi alläpa chaniyuq karqan. Mësachö Jesús këkaptinmi tsë warmiqa pömupa shiminta pakirir Jesúspa peqanman jicharqan.#Luc. 7.37-38. 4Tsëta rikarmi wakin tsëchö këkaqkuna piñar niyarqan: <<¿Imapaqtaq tsë perfümita perdiratsin? 5Tsëpa rantinqa juk wata uryapukur ganashqantsikpita maschömi rantikushwan karqan.#14.5 Griëguchö nikan kima pachak (300) denariupita maschö rantikuyänanpaq kashqanta. Juk denariuqa juk junaq uryëpa chaninmi karqan. Tsë qellëwanna waktsakunata yanapashwan karqan>>.

Tsënö nirmi tsë warmita penqapäyarqan.

6Jesúsnam nirqan: <<¿Imanirtaq kë warmita penqapëkäyanki? Pëqa allitam rurashqa. 7Waktsakunaqa qamkunawanmi imëpis këkäyanqa.#Deut. 15.11. Noqaqa mananam qamkunawan kashaqnatsu. 8Pampashqa kanäpaqmi pëqa perfümita jichamur alistëkäman. 9Rasunpam niyaq: Jinantinchö willakïnïta willakurmi kë warmi perfümita jichamushqanta willakuyanqa>>.

Jesústa rantikunanpaq Judas Iscariote conträtuta ruranqan

Mateo 26.14-16; Lucas 22.3-6

10Jesúspa apostolnin Judas Iscariotim mandakuq sacerdötikunaman ëwar parlarqan Jesústa entreguëkunanpaq. 11Tsëmi sacerdötikuna kushikur pagayänanpaq äniyarqan. Judasnam yarpakacharqan imë höra Jesústa entregananpaq.

Pascua mikïta discïpulunkunawan Jesús mikunqan

Mateo 26.17-25; Lucas 22.7-14, 21-23; Juan 13.21-30

12Levadürannaq Tanta Mikuna fiesta qallëkunan junaqmi Pascuachö mikuyänanpaq mallwa üshata pishtayaq. Tsë junaqmi discïpulunkuna Jesústa kënö tapuyarqan: <<Teyta, Pascua mikïta mikunantsikpaq ¿mëchötaq alistayämushaq?>>

13Tsënö niyaptinmi Jesús ishkë discïpulunkunata kënö nirqan: <<Jerusalénman ëwayë. Tsëman chärirmi juk nuna kuntuwan yaku apëkaqta tariyanki. Tsë nunapa qepanllata ëwayanki më wayimanpis chashqanyaq. 14Tsëchö wayiyuqta kënö niyanki: <¿Mëqan cuartuchötaqshi Pascua mikïta discïpulunkunawan Jesús mikunqa?> 15Wayiyuqnam rikätsiyäshunki rarachö jatun cuartu alistashqata. Tsëchö mikunantsikpaq alistayanki>>.

16Tsëmi Jerusalénman discïpulunkuna ëwar Jesús nishqannölla tariyarqan. Tsëchömi Pascua mikïta alistayarqan.

17Patsa tsaqëkaptinnam chunka ishkë discïpulunkunawan tsë wayiman Jesús chäriyarqan. 18Mikïkarnam Jesús kënö nirqan: <<Rasunpam niyaq: Qamkunapita juknikim prësu tsariyämänanpaq entregamanqa. Tsënö entregamanqa noqawan juntu mikïkaqmi>>.#Sal. 41.9.

19Tsënö niptinmi llakikur juknin juknin Jesústa kënö tapuyarqan: <<¿Noqatsuraq käman?>> nir.

20Jesúsnam nirqan: <<Qamkunapita juknikim këkan. Pëmi noqawan juntu tantata plätuchö tullpïkan. 21Rasunpam Nunapa Tsurinqa qellqarëkashqannö jipar wanunqa. Pëta entregaq nunanam alläpa ankupëpaq kanqa. Tsë nunaqa ama yurikunmanpistsu karqan>>.

Mushuq pactupaq Jesús yachatsikunqan

Mateo 26.26-30; Lucas 22.15-20; 1 Corintios 11.23-25

22Mikïkäyaptinmi tantata tsarirkur Teyta Diosta Jesús payllä nikurqan. Tantata pakirirnam discïpulunkunata makyar nirqan: <<Kë tantata mikuyë. Këqa cuerpümi>>.

23Tsënöllam vïnuyuq cöpatapis tsarirkur Teyta Diosta payllä nikurqan. Nïkurnam discïpulunkunata makyarqan llapan upuyänanpaq. 24Tsëpitanam kënö nirqan: <<Kë vïnuqa Teyta Dios [mushuq] pactuta rurananpaq#Jer. 31.31-34. ramashqa yawarnïmi. Atskaq nunakuna jutsankunapita perdonashqa kayänanpaqmi yawarnïta ramar wanushaq.#Éxo. 24.8; Zac. 9.11. 25Rasunpam niyaq: Kananpitaqa vïnuta manam yapë upushaqnatsu hasta Teyta Diospa mandakïninchö mushuq vïnuta upushqäyaq>>.

26Tsënö nirnam discïpulunkunawan salmukunata qotsurir Olivos jirkaman ewkuyarqan.

Pedro negananpaq kaqta Jesús willakunqan

Mateo 26.31-35; Lucas 22.31-34; Juan 13.36-38

27Tsëpitanam Jesús kënö nirqan: <<[Kanan paqasmi] llapëki jaqirayämar ewkuyanki. Teyta Diospa palabranchöpis kënömi qellqarëkan: <Üsha mitsiqta wanuratsiptïmi üshankuna wakpa këpa ewkuyanqa>.#Zac. 13.7. 28Tsënö kaptinpis wanushqäpita kawarirkamurmi qamkunapita mas puntata Galileaman ëwashaq>>.#Mat. 28.16.

29Pedrunam nirqan: <<Wakinkuna jaqiriyäshuptikipis noqaqa manam jaqishqëkitsu>>.

30Jesúsnam nirqan: <<Rasunpam niq: Kanan paqas ishkë kuti gällu manaraq cantaptinmi kima kuti negamanki>>.

31Pedrunam nirqan: <<Ishkantsikta wanuratsimänantsik kaptinpis manam negashqëkitsu>>.

Wakin discïpulunkunapis tsënöllam niyarqan.

Getsemaníchö Jesús mañakunqan

Mateo 26.36-46; Lucas 22.39-46

32Getsemaní nishqanman discïpulunkunawan chärirmi Jesús kënö nirqan: <<Teyta Diosta mañakamushqäyaq këllachö këkäyë>>.

33Tsëpitanam Pedruta, Santiaguta y Juanta wak läduman pusharqan. Tsëchömi alläpa llakikur 34nirqan: <<Wanïpanöran llakikï tsarimashqa. Mana punukashllapa këllachö shuyarëkäyämë>>.

35Tsëpita mas washaninkunaman ëwëkurmi patsaman lätëkur Teyta Diosta mañakurqan wanïpita salvananpaq. 36Mañakurmi nirqan: <<Abba, Teytallä, qampaqqa imapis manam sasatsu. Cöpachö winarëkaq castïguïkita ama upïkatsillämëtsu.#Sal. 75.8; Isa. 51.17; Jer. 25.15-29; Hab. 2.16. Tsënö kaptinpis noqa munashqänöqa ama katsuntsu, sinöqa qam munashqëkinö këkullätsun>>.

37Tsëpita discïpulunkuna kaqman kutirmi punukashqa këkäyaqta tarirqan. Tsëmi Pedruta kënö nirqan: <<Simón, ¿imanirtaq punukïkanki? ¿Manaku juk hörallapis riyakïta puëdinki? 38Riyakuyë. Teyta Diosta mañakuyë Satanás mana tentayäshunëkipaq. Cäsumëta munarpis kikikikunallapitaqa manam puëdiyankitsu>>.

39Tsënö nirirmi yapë ëwar puntata mañakushqannölla Teyta Diosta mañakurqan. 40Tsëpita yapë kutirmi discïpulunkuna jina punukashqata tarirqan. Pëkunaqa punï venciyaptinmi pununëta awantayarqantsu. Tsënö këkaqta tarïkuptinmi ima nitapis puëdiyarqantsu. 41Kima kuti Diosta mañakushqanpita kutirnam kënö nirqan: <<¿Jinallaku punïkäyanki? ¡Riyakuyëna! Höra chämushqanam Nunapa Tsurinta jutsasapa nunakunapa makinman entreguëkunanpaq. 42¡Sharkuyë, ëwashunna! Traicionëru shamïkannam>>.

Jesústa prësu tsariyanqan

Mateo 26.47-56; Lucas 22.47-53; Juan 18.3-12

43Jesús tsënö parlëkaptinmi espädankunawan y garrutinkunawan atskaq nunankuna pushashqa apostolnin Judas Iscariote chärirqan. Tsë nunakunatam mandakuq sacerdötikuna, ley yachatsikuqkuna y Israel anciänukuna kachayarqan. 44Manaraq charmi pushashqan nunakunata käyitsir Judas nirqan: <<Mëqantapis mutsar napashqä kaqmi Jesús kanqa. Pëta prësu tsariyanki>>.

45Chärirnam <<¡rabí!>> nir Jesústa mutsëkurqan. 46Tsënö mutsëkuptinmi Jesústa prësu tsaririyarqan. 47Tsarikurkuyaptinmi juk discïpulun espädanta jorqurir sumo sacerdötipa sirwiqninpa rinrinta wallïkurqan.

48Prësu tsariyaptinnam nunakunata Jesús kënö nirqan: <<¿Imanirtaq suwamannöpis espädëkikunawan y garrutikikunawan shayämurqunki? 49Waran waran templupa patiunchö qamkunawan këkaptï#Luc. 19.47; 21.37. ¿imanirtaq tsëchö tsariyämarqëkitsu? Teyta Diospa palabran nishqannöllam këkuna pasëkäman>>.

50Jesústa prësu tsaririyaptinnam discïpulunkunaqa jaqirir safar ewkuyarqan. 51Juk jövinllam säbanan aqshukushqa qepanta ëwarqan. Tsë jövinnam prësu tsarita munayaptin 52aqshurashqan säbanata jaqirïkur qalapächulla safar ewkurqan.

Jesústa sumo sacerdöti tapunqan

Mateo 26.57-68; Lucas 22.54-55, 63-71; Juan 18.13-14, 19-24

53Tsëpitanam sumo sacerdötiman Jesústa apayarqan. Tsëmanmi ëllukäyarqan mandakuq sacerdötikuna, precisaq Israel nunakuna y ley yachatsikuqkunapis. 54Karupëllapa ëwarmi ruri patiuyaq Pedro yëkurqan. Yëkurirmi templu täpakuq wardiakunawan ninachö qoñükur tëkarqan.

55Tsëchömi mandakuq sacerdötikuna y llapan Sanedrín juezkuna Jesústa wanutsita munar testïgukunata ashiyarqan ulikur Jesúspa contran parlayänanpaq. Mëläya ashirpis wanutsishqa kananpaqnöqa manam ima jutsantapis tariyarqantsu. 56Manakaqkunata parlar contran atskaq shärirpis kikinpuram jukta jukta ninakuyaq. 57Tsënam wakin nunakuna manakaqta parlar Jesúspa contran shärir niyarqan: 58<<Noqakunam wiyayarqü kë nuna kënö parlaqta: <Noqaqa templuta juchuratsirmi kima junaqllachö juk templutana sharkatsishaq. Tsë templutaqa manam nunakunatsu sharkatsiyanqa> >>.#Juan 2.19.

59Jesúspa contran tsënö niyaptinpis manam wakin testïgukuna niyashqannötsu karqan.

60Tsëmi sumo sacerdöti sharkur Jesústa tapurqan: <<Tsënö niyäshuptiki ¿manaku imallatapis ninki? ¿Rasun kaqtaku nikäyan o manaku?>>

61Tsënö tapuptinpis manam imatapis Jesús parlakurqantsu. Tsëmi sumo sacerdöti yapë tapurqan: <<¿Qamku Diospa Tsurin Cristo kanki?>>

62Jesúsnam nirqan: <<Noqam Kä.#14.62 Noqam Kä nirqa Jesucristo käyitsirqan kikin Dios kashqantam. Tsëpita masta musyanëkipaq leyinki Éxo. 3.14; Juan 10.30-33. Kananpitam Nunapa Tsurinta rikäyanki puëdiq Diospa allawka kaq lädunchö tëkaqta y pukutë jananchö ciëlupita shamïkaqta>>.#Dan. 7.13.

63Tsënö niptinmi sumo sacerdöti alläpa piñar sotänantapis rachir nirqan: <<¿Imapaqnataq mas testïgutapis ashishun? 64Wiyayarqunkinam Teyta Diospa contran parlëkashqanta. Kanan ¿imataq niyanki?>>

Tsënö niptinmi llapan niyarqan Jesústa wanutsiyänanpaq.#Lev. 24.16. 65Tsëmi wakinkuna toqapur nawinta vendarkur kutayarqan: <<¡Mä niyämë pï kutashushqëkitapis!>> nir. Tsënöllam templu täpakuq wardiakunapis maqayarqan.

Jesústa Pedro neganqan

Mateo 26.69-75; Lucas 22.56-62; Juan 18.15-18, 25-27

66Ruri patiuchö Pedro këkaptinmi sumo sacerdötipa sirwiqnin warmi chärirqan. 67Ninachö qoñukïkaqta rikëkurnam Pedruta nirqan: <<Qampis Nazaretpita Jesúswanmi purirqunki>>.

68Pedrunam negar nirqan: <<Noqa manam pëta reqïtsu, ni käyïtsu imapita parlëkashqëkitapis>>.

Tsënö nirirmi patiu yëkunaman witikurqan. Tsë höram gällu cantarirqan. 69Tsëchöpis tsë sirwikuq warmi Pedruta yapë rikëkurmi tsëchö këkaq nunakunata kënö nirqan: <<¡Kë nunaqa Jesúswanmi purishqa!>>

70Tsënö niptinmi Pedro yapë negarqan. Tsëpita mas rätullatam tsëchö këkaq nunakuna Pedruta yapë kënö niyarqan: <<Qamqa rasunpam pëwan puriq kanki. Galilea nunam kankipis. [Galilea nunakunanömi parlankipis]>>.

71Pedrunam jurarnin nirqan: <<¡Tsë nunataqa manam reqïtsu!>>

72Tsë höram gällu yapë cantarirqan. Tsëmi Pedro yarpärirqan Jesús kënö nishqanta: <<Manaraq ishkë kuti gällu cantaptinmi kima kuti negamanki>>.

Tsëta yarparkurmi alläpa llakikur waqarqan.

Currently Selected:

Marcos 14: qwhB

Highlight

Copy

Compare