Miqueas 4
4
Mëtsë nacionpitapis Jerusalénman Diosta adoraq ëwayänanpaq ninqan
Isaías 2.2-4
1Shamuq watakunachömi Teyta Diospa wayin këkashqan jirkaqa wakin jirkakunapitapis alläpa precisaq kanqa.
Tsëmanmi mëtsë nacionpitapis nunakuna ëwayanqa Teyta Diosta adorayänanpaq.
2Tsënöllam Sión jirkapita Teyta Diospa yachatsikïninta mëtsëmanpis apayanqa.
Jerusalénpita patsam palabranta willakuyanqa.
Mëtsë nacionpita nunakuna Jerusalénman ëwarmi niyanqa:
<<Llapantsik witsäshun Teyta Dios akrashqan jirkaman.
Jacobpita miraq nunakuna creyikuyashqan Teyta Diospa wayinman yëkushun.
Tsëchömi kikin yachatsimäshun mandamientunkunata imanö cumplinantsikpaq kashqantapis.
Tsënöpam pë munashqannö llapantsik kawakushun>>.#Isa. 56.6-7; Zac. 8.20-22.
3Atska nación nunakuna chikinakuyaptinpis Teyta Diosmi arreglanqa.
Tsë nacionkuna jatun këkaptinpis y alläpa karuchö këkaptinpis pëmi juzganqa.
Juk markawan juk marka guërrata manam rurayanqanatsu.
Mëtsëchöpis nunakuna espädankunapita yapyakuyänanpaq puntatanam ruratsiyanqa.
Lanzankunapitanam ösita ruratsiyanqa.#Joel 3.10.
Guërrachö pelyayänanpaqpis manam alistakuyanqanatsu.
4Tsënö rurayaptinmi nunakuna mana mantsakushpana kawakuyanqa.
Üvas montipa y hïgus montipa chakinchö yamënam jamakuriyanqa.#Zac. 3.10.
Llapanta mandaq Teyta Diosmi tsënö kananpaq kashqanta nin.
5Wakin marka nunakuna diosninkunaman markäkuyaptinpis noqantsikqa poderyuq Teyta Diosnintsikmanmi imëpis markäkushun.
Israel nunakuna markanman kutiyänanpaq ninqan
6 Teyta Diosmi nin:
<<Tsë junaqqa chakin pakishqa y oqrakashqa këkaq üshakunata ëlluqnömi castigashqä Israel nunakunata ëllumushaq.
7Chakin pakishqa üshanö këkäyaptinpis
y juk lädu markaman qarqushqa këkäyaptinpis
yanapashaq markanman kutïkur poderyuq tikrayänanpaqmi.
Tsëmi Sión jirkapita imëyaqpis reyninkuna kashaq.#Sof. 3.19.
8<<Sión marka, üshakunata rikachakuna törrinö karmi Teyta Dios kuyashqan nunakunata alli rikëkanki.
Qamqa yapëmi poderyuq kanki.
Kuyashqä Jerusalénpitaqa yapëmi reykuna mandakuyanqa.
9Tsënö kananpaq këkaptin ¿imanirtaq qaparikanki qeshpikï nanëwan qapariq warminö?
¿Manaku mandakuqniki rey kan?
¿Yachaq nunakuna wanushqaku?
10Tsënö kaptinpis qamchö täraq nunakunata jirkakunapa prësu aparmi Babilonia nacionman chätsiyanqa.
Ay Sión, tsënö kananpaq këkaptinqa alläpa nanatsikur qeshpikï nanëwan warmi qapariqnö qapari.
Juk lädu nacionman apayäshuptikipis contrëkikunapa makinpitam Teyta Dios salvayäshunki>>.
11Kananqa atska nación nunakunam ëllukëkur contrëki shäriyashqa.
Pëkunaqa kënömi willanakïkäyan:
<<¡Sión ushakëkaqta rikëkur alläpam kushipäshun!>>
12Tsënö willanakurpis tsë nunakunaqa manam käyikuyantsu Teyta Dios imata yarpëkashqantapis.
Manam musyayantsu trïguta wilunanpaq ëraman ëlluqnö pëkunata ëllurkur castigananpaq kashqanta.
13Teyta Diosmi kënö nin:
<<Sión, trïgu manöjuta jalutsir ushakätsiyashqannö tsë nacionkunata ushakäratsi.
Noqam yanapashqëki fiërru waqrayuq y bronci shilluyuq törunö kar atska nacionkunata ushakätsiyänëkipaq.
Tsëpitanam suwar apakuyashqan riquëzankunata ëllumunki.
Tsëtanam kë patsapa duëñun kaptï noqa Teyta Diospaq apamunki>>.
Currently Selected:
Miqueas 4: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
