Mateo 28

Wanunqanpita Jesús kawarimunqan

Marcos 16.1-8; Lucas 24.1-12; Juan 20.1-10

1Jamakï junaq pasariptinnam domingu qoya qoyallana María Magdalenawan juknin María ëwayarqan Jesús pamparashqan sepultüra rikaq. 2Ëwëkäyaptinmi Teyta Dios kachamushqan ángel ciëlupita urämuptin patsa alläpa kuyurqan. Jesús pamparashqan sepultüraman chärirmi tsaparaq rumita witiratsir jananman täkurirqan. 3Tsë ángel relampagupa aktsinnöran tillapyäkurqan. Ratashninpis rajunö yulaqmi karqan. 4Angelta rikëkurmi soldädukuna alläpa mantsakëwan karkaryëkar wanushqanö quedariyarqan.

5Warmikuna chäriyaptinnam ángel kënö nirqan: <<Ama mantsakäyëtsu. Musyämi crucificäyashqan Jesúspa ayanta rikaq shayämushqëkita. 6Manam këchönatsu. Kawarimunanpaq ninqannöllam kawarimushqa. Mëman churayashqantapis rikäyänëkipaq shayämï. 7Kananqa ëqillapa ëwar discïpulunkunata willayë Jesús kawarimunqanta. Tsënölla willayë Galileaman nöpëkashqanta y tsëchö pëwan tinkuyänanpaq kanqanta. Tsëtam qamkunata willayaq>>.

8Ángel tsënö niptinmi warmikunaqa mantsakashqa këkäyashqanpita alläpa kushishqa Jesúspa discïpulunkunaman willaq ëqillapa ëwayarqan. [Tsënö ëwëkäyaptinmi] 9Jesús yurirkur napakurirqan. Tsëmi tsë warmikunaqa Jesúspa chakinta waqurkur adorayarqan. 10Jesúsnam nirqan: <<Ama mantsayämëtsu. Ëwar wawqïkunata#28.10 Wawqïkunata willayë nirqa discïpulunkunata willananpaqmi Jesús nirqan. willayë Galileaman ëwayänanpaq. Tsëchönam pëkunawan tinkushaq>>.

Soldädukuna ulikuyänanpaq pagayanqan

11Warmikuna kutikuyaptinmi sepultürata täpakuq wakin soldädukunapis Jerusalénman ëwar ima pasashqantapis mandakuq sacerdötikunata willayarqan. 12Willayaptinmi mandakuq sacerdötikuna precisaq Israel nunakunawan ëllukëkur parlayarqan imata rurayänanpaqpis. Tsënö parlarirmi soldädukunata atska qellëta pagar 13niyarqan: <<Nunakunata niyanki Jesúspa discïpulunkuna paqaspa ëwar ayanta suwar apakuyashqanta. Tsënölla niyanki punukashqa kar imatapis mana mäkuyashqëkita. 14Pilato musyaptinqa noqakunam pëwan parlayäshaq mana castigayäshunëkipaq>>.

15Tsëmi päguta chaskirir soldädukuna ëwarnin mandakuq sacerdötikuna niyashqannölla nunakunata willayarqan. Tsënö willakuyashqantam Israel nunakuna hasta kananyaqpis creyiyan.

Willakuyänanpaq discïpulunkunata Jesús kachanqan

Marcos 16.14-18; Lucas 24.36-49; Juan 20.19-23; Hechos 1.6-8

16Jesúspa chunka juk discïpulunkunanam Galileaman chärir ëwayarqan#Mat. 26.32; Mar. 14.28. më jirkachöpis tinkuyänanpaq Jesús nishqanman. 17Tsëchömi Jesústa rikar adorayarqan. Wakinqa rikëkarpis manam creyiyarqanraqtsu Jesús kanqanta.

18Discïpulunkunaman witirirmi Jesús kënö nirqan: <<Kë patsachöpis y ciëluchöpis llapanpaq puëdiq kanäpaqmi Teyta Dios churamashqa. 19Tsëmi jinantin markakunapa ëwar nunakunata yachatsiyanki discïpulükuna kayänanpaq.#Hech. 1.8. Pëkunata bautizayanki Teyta Diospa shutinchö, Tsurinpa shutinchö y Espíritu Santupa shutinchö. 20Tsënölla yachatsiyanki llapan nishqäkunata cäsukuyänanpaq. Noqaqa qamkunawanmi waran waran këkäshaq kë patsapa ushëninyaq>>.

[Amén.]

Currently Selected:

Mateo 28: qwhB

Highlight

Copy

Compare