Mateo 26
26
Jesústa wanutsiyänanpaq parlayanqan
Marcos 14.1-2; Lucas 22.1-2; Juan 11.45-53
1Tsënö yachatsikur usharirnam discïpulunkunata Jesús kënö nirqan: 2<<Musyayanqëkinöpis Pascua fiesta#Éxo. 12.1-27; Deut. 16.1-8. qallëkunanpaq ishkë junaqllanam pishikan. Tsëchömi prësu tsarïkur Nunapa Tsurinta crucificäyanqa>>.
3Tsëpitanam mandakuq sacerdötikuna, [ley yachatsikuqkuna] y precisaq Israel nunakuna sumo sacerdöti Caifáspa wayinman ëllukäyarqan. 4Tsëchömi parlayarqan nunakunata mana musyatsishllapa Jesústa tsarïkur wanutsiyänanpaq. 5Tsëmi niyarqan: <<Fiestachöqa ama tsarishuntsu. Tsëchö tsarishqaqa nunakuna contrantsikmi shärikurkuyanqa>>.
Jesúspa peqanman perfümita jichanqan
Marcos 14.3-9; Juan 12.1-8
6Betania markachö leprösu niyashqan Simónpa wayinchö Jesús këkaptinmi 7juk warmi chärirqan alabastro rumipita rurashqa pömuchö perfümin tsarashqa. Tsë perfümiqa alläpa chaniyuqmi karqan. Mësachö këkaptinmi tsë warmiqa Jesúspa peqanman perfümita jicharqan.#Luc. 7.37-38. 8Tsëta rikarmi discïpulunkuna piñarnin niyarqan: <<¿Imapaqtaq tsë perfümita perdiratsin? 9Tsëpa rantinqa alli chaninchö rantikurmi tsë qellëwan waktsakunata yanapashwan karqan>>.
10Tsënö niyashqanta musyarirmi Jesús kënö nirqan: <<¿Imanirtaq kë warmita penqapëkäyanki? Pëqa allitam rurashqa. 11Waktsakunaqa qamkunawanmi imëpis këkäyanqa.#Deut. 15.11. Noqaqa mananam qamkunawan kashaqnatsu. 12Pampashqa kanäpaqmi pëqa perfümita jichamur alistëkäman. 13Rasunpam niyaq: Jinantinchö willakïnïta willakurmi kë warmi perfümita jichamushqanta willakuyanqa>>.
Jesústa rantikunanpaq Judas Iscariote conträtuta ruranqan
Marcos 14.10-11; Lucas 22.3-6
14Jesúspa apostolnin Judas Iscariotim mandakuq sacerdötikunaman ëwar 15nirqan: <<Jesústa prësu tsariyänëkipaq pushayaptiq ¿ëkatataq pagayämankiman?>>
Tsënö niptinmi kima chunka (30) qellëta pagayänanpaq äniyarqan. 16Tsëpitanam Judas yarpakacharqan imë höra Jesústa entregananpaq.
Pascua mikïta discïpulunkunawan Jesús mikunqan
Marcos 14.12-21; Lucas 22.7-14, 21-23; Juan 13.21-30
17Levadürannaq Tanta Mikuna fiesta qallëkunan junaqmi discïpulunkuna Jesústa kënö tapuyarqan: <<Teyta, Pascua mikïta mikunantsikpaq ¿mëchötaq alistayämushaq?>>
18Jesúsnam nirqan: <<Jerusalénman ëwayë. Juk nunapa wayinman chëkur kënö niyanki: <Jesúsmi kachayämashqa. Höranshi chëkämunna. Wayikichöshi Pascua mikïta discïpulunkunawan mikuyanqa> >>.
19Jesús käyitsishqannöllam discïpulunkuna ëwar Pascua mikïta alistayarqan.
20Patsa tsaqëkaptinnam chunka ishkë discïpulunkunawan mësaman Jesús täkuriyarqan. 21Mikïkarnam Jesús kënö nirqan: <<Rasunpam niyaq: Qamkunapita juknikim prësu tsariyämänanpaq entregamanqa>>.
22Tsënö niptinmi alläpa llakikur juknin juknin kënö tapuyarqan: <<Teyta, ¿noqatsuraq këkä?>> nir.
23Jesúsnam nirqan: <<Plätuchö noqawan tantata tullpuq kaqmi entregamanqa.#Sal. 41.9. 24Rasunpam Nunapa Tsurinqa qellqarëkashqannö jipar wanunqa. Tsënö kaptinpis pëta entregaq nunaqa alläpa ankupëpaqmi kanqa. Tsë nunaqa ama yurikunmanpistsu karqan>>.
25Tsënö niptinmi rantikuq kaq Judas kënö nirqan: <<Rabí, ¿noqatsuraq käman?>>
Jesúsnam nirqan: <<Kikikim nikanki>>.
Mushuq pactupaq Jesús yachatsikunqan
Marcos 14.22-26; Lucas 22.14-20; 1 Corintios 11.23-25
26Tsëpitanam tantata tsarirkur Teyta Diosta Jesús payllä nikurqan. Tantata pakirirnam discïpulunkunata makyar nirqan: <<Kë tantata mikuyë. Këqa cuerpümi>>.
27Tsënöllam vïnuyuq cöpata tsarirkur Teyta Diosta payllä nikurqan. Nïkurnam discïpulunkunata makyar nirqan: <<Llapëki këpita upuyë. 28Kë vïnuqa Teyta Dios [mushuq] pactuta rurananpaq#Jer. 31.31-34. ramashqa yawarnïmi. Atskaq nunakuna jutsankunapita perdonashqa kayänanpaqmi yawarnïta ramar wanushaq.#Éxo. 24.8; Zac. 9.11. 29Noqam niyaq: Kananpitaqa vïnuta manam yapë upushaqnatsu hasta Teytäpa mandakïninchö qamkunawan mushuq vïnuta upushqantsikyaq>>.
30Discïpulunkunawan salmukunata qotsurirnam Olivos jirkaman ewkuyarqan.
Pedro negananpaq kaqta Jesús willakunqan
Marcos 14.27-31; Lucas 22.31-34; Juan 13.36-38
31Tsëpitanam Jesús kënö nirqan: <<Kanan paqasmi llapëki jaqirayämar ewkuyanki. Teyta Diospa palabranchöpis kënömi qellqarëkan: <Üsha mitsiqta wanuratsiptïmi üshankuna wakpa këpa ewkuyanqa>.#Zac. 13.7. 32Tsënö kaptinpis wanushqäpita kawarirkamurmi qamkunapita mas puntata Galileaman ëwashaq>>.#Mat. 28.16.
33Pedrunam nirqan: <<Wakinkuna jaqiriyäshuptikipis noqaqa manam jaqishqëkitsu>>.
34Jesúsnam nirqan: <<Rasunpam niq: Kanan paqas gällu manaraq cantaptinmi kima kuti negamanki>>.
35Pedrunam nirqan: <<Ishkantsikta wanuratsimänantsik kaptinpis manam negashqëkitsu>>.
Wakin discïpulunkunapis tsënöllam niyarqan.
Getsemaníchö Jesús mañakunqan
Marcos 14.32-42; Lucas 22.39-46
36Getsemaní nishqanman discïpulunkunawan chärirmi Jesús kënö nirqan: <<Teyta Diosta mañakamushqäyaq këllachö këkäyë>>.
37Tsëpitanam Pedruta y Zebedeupa tsurinkunata wak läduman pusharqan. Tsëchömi alläpa llakikur 38nirqan: <<Wanïpanöran llakikï tsarimashqa. Mana punukashllapa këllachö shuyarëkäyämë>>.
39Tsëpita mas washaninkunaman ëwëkurmi patsaman lätëkur Teyta Diosta mañakur nirqan: <<Teytallä, cöpachö winarëkaq castïguïkita ama upïkatsillämëtsu.#Sal. 75.8; Isa. 51.17; Jer. 25.15-29; Hab. 2.16. Tsënö kaptinpis noqa munashqänöqa ama katsuntsu, sinöqa qam munashqëkinö këkullätsun>>.
40Tsëpita discïpulunkuna kaqman kutirmi punukashqa këkäyaqta tarirqan. Tsëmi Pedruta kënö nirqan: <<¿Manaku juk hörallapis riyakïta puëdiyanki? 41Riyakuyë. Teyta Diosta mañakuyë Satanás mana tentayäshunëkipaq. Cäsumëta munarpis kikikikunallapitaqa manam puëdiyankitsu>>.
42Tsënö nirmi yapë ëwar Teyta Diosta mañakur nirqan: <<Tëtë, kë cöpachö winarëkaq castïguïkita upunäta munaptikiqa munashqëkinö këkullätsun>>.
43Yapë Jesús kutirmi discïpulunkuna jina punukashqata tarirqan. Pëkunaqa punï venciyaptinmi pununëta awantayarqantsu. 44Tsëpita yapë ëwarmi puntata mañakushqannölla Teyta Diosta mañakurqan. 45Discïpulunkunaman yapë kutïkurmi nirqan: <<¿Jinallaku punïkäyanki? Höra chämushqanam Nunapa Tsurinta jutsasapa nunakunapa makinman entreguëkunanpaq. 46¡Sharkuyë, ëwashunna! Traicionëru shamïkannam>>.
Jesústa prësu tsariyanqan
Marcos 14.43-50; Lucas 22.47-53; Juan 18.3-12
47Jesús tsënö parlëkaptinmi espädankunawan y garrutinkunawan atskaq nunankuna pushashqa apostolnin Judas Iscariote chärirqan. Tsë nunakunatam mandakuq sacerdötikuna y Israel anciänukuna kachayarqan. 48Manaraq charmi pushashqan nunakunata käyitsir Judas nirqan: <<Mëqantapis mutsar napashqä kaqmi Jesús kanqa. Pëta prësu tsariyanki>>.
49Chärirnam <<rabí, ¡yamëllaku këkanki!>> nir Jesústa mutsëkurqan.
50Jesúsnam nirqan: <<Yanasa, ruranëkipaq kaqta jukllana rurë>>.
Tsënö niptinmi Jesústa prësu tsaririyarqan.
51Tsarikurkuyaptinmi juk discïpulun espädanta jorqurir sumo sacerdötipa sirwiqninpa rinrinta wallïkurqan. 52Tsëmi Jesús kënö nirqan: <<¡Espädëkita kutitsi! Pitapis espädawan wanutsiq kaqtaqa espädawanmi wanutsiyanqa. 53¿Manaku musyanki Teytäta mañakuptï washämänanpaq chunka ishkë legión#26.53 Juk legión complëtuqa joqta waranqa (6,000) soldädukunam karqan. Tsëmi Jesús nirqan qanchis chunka ishkë waranqa (72,000) angelkunapita masta kachamunanpaq kashqanta. angelkunapita masta kachamunanpaq kashqanta? 54Tsënö mañakuptïqa ¿imanöparaq cumplikanqa nunakuna wanutsiyämänanpaq Teyta Diospa palabran nishqanpis?>>
55Tsëpitanam nunakunata Jesús kënö nirqan: <<¿Imanirtaq suwamannöpis espädëkikunawan y garrutikikunawan shayämurqunki? Waran waran templupa patiunchö [qamkunawan] këkaptïqa#Luc. 19.47; 21.37. ¿imanirtaq tsëchö tsariyämarqëkitsu? 56Imanö kaptinpis prësu tsarikäyämanki profëtakuna qellqayashqan cumplikänanpaqmi>>.
Jesústa prësu tsaririyaptinnam discïpulunkunaqa jaqirir safar ewkuyarqan.
Jesústa sumo sacerdöti tapunqan
Marcos 14.53-65; Lucas 22.54-55, 63-71; Juan 18.13-14, 19-34
57Tsëpitanam Jesústa apayarqan sumo sacerdöti Caifáspa wayinman. Tsëchömi ley yachatsikuqkuna y precisaq Israel nunakunapis ëllukashqa këkäyarqan. 58Karupëllapa Pedro ëwarmi sawan ruriyaq yëkurqan. Yëkurirmi templu täpakuq wardiakunawan tëkarqan ima pasashqantapis rikänanpaq.
59Tsëchömi mandakuq sacerdötikuna, [precisaq Israel nunakuna] y llapan Sanedrín juezkuna Jesústa wanutsita munar testïgukunata ashiyarqan ulikur Jesúspa contran parlayänanpaq. 60Manakaqkunata atskaq niyaptinpis wanutsishqa kananpaqqa manam ima jutsantapis tariyarqantsu. Tsënam ishkaq uli nunakuna witïkur 61niyarqan: <<Kë nunam templuta juchuratsir kima junaqllata yapë sharkatsinanpaq nirqan>>.#Juan 2.19.
62Tsëmi sumo sacerdöti sharkur Jesústa tapurqan: <<Tsënö niyäshuptiki ¿manaku imallatapis ninki? ¿Rasun kaqtaku nikäyan o manaku?>>
63Tsënö tapuptinpis manam imatapis Jesús parlakurqantsu. Tsëmi sumo sacerdöti kënö nirqan: <<Wiñëpa kawaq Teyta Diospa shutinchömi qamta kënö tapuq: ¿Rasunpaku Diospa Tsurin Cristo kanki o manaku?>>
64Jesúsnam nirqan: <<Nishqëkinömi kä. Kananpitam Nunapa Tsurinta rikäyanki puëdiq Diospa allawka kaq lädunchö tëkaqta y pukutë jananchö ciëlupita shamïkaqta>>.#Dan. 7.13.
65Tsënö niptinmi sumo sacerdötiqa alläpa piñar sotänantapis rachir nirqan: <<¡Kë nunaqa Teyta Diospa contranmi parlëkan! ¿Imapaqnataq mas testïgutapis ashishun? Wiyayarqunkinam mana allikunata parlëkashqanta. 66Kanan ¿imataq niyanki?>>
Tsënö niptinmi llapan kënö niyarqan: <<¡Jutsayuqmi këkan! ¡Wanutsishqa katsun!>>#Lev. 24.16.
67Tsënö nirmi Jesúspa qaqllanchö toqapur kutayarqan. Wakinnam laqyar#Isa. 50.6. 68niyarqan: <<Rasunpa Cristo karqa pï maqashunqëkitapis mä niyämë>>.
Jesústa Pedro neganqan
Marcos 14.66-72; Lucas 22.56-62; Juan 18.15-18, 25-27
69Tsëyaqqa patiuchömi Pedro tëkarqan. Pëta rikarmi juk sirwikuq shipash ëwar kënö nirqan: <<Qampis Galileapita Jesúswanmi purirqunki>>.
70Tsënö niptinmi llapan nunakuna wiyëkäyaptin Pedro kënö nirqan: <<Manam musyätsu imapita parlëkashqëkitapis>>.
71Tsënö nirmi patiu punkumanna witikurirqan. Tsëchöpis juk sirwikuq shipashmi pëta rikëkur tsëchö këkaqkunata kënö nirqan: <<Kë nunataqa Nazaretpita Jesúswan puriqtam rikarqü>>.
72Yapëpis negarmi Pedro jurarnin nirqan: <<¡Tsë nunata manam reqïtsu!>>
73Tsëpita unëllatanam tsëchö këkaq wakin nunakuna Pedruman witïkur niyarqan: <<Qamqa rasunpam pëwan puriq kanki. Galilea nunakunanömi parlankipis>>.
74Tsënö niyaptinmi Pedro yapë jurarqan: <<¡Tsë nunataqa manam reqïtsu!>>
Tsë höram gällu cantarirqan. 75Tsënö cantariptinmi Pedro yarpärirqan Jesús kënö nishqanta: <<Manaraq gällu cantaptinmi kima kuti negamanki>>.
Tsëmi waqtaman yarqurir alläpa llakikur waqarqan.
Currently Selected:
Mateo 26: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
