Mateo 25

Chunka shipashkunaman iwalatsikïpa Jesús yachatsinqan

1<<Teyta Diospa mandakïnin imanö kashqantapis willayashqëki. Chunka shipashkunash chiwchinkunata aparkur shuyaq ëwayänaq casakuq jövin shamuptin fiestaman yëkuyänanpaq. 2Pitsqa kaq shipashkunash alli yarpëyuq kayänaq. Pitsqa kaqnash dejäda kayänaq. 3Dejäda kaqkunaqa manash aceiti ushakaptin chiwchinkunaman yapayänanpaq apayänaqtsu. 4Alli yarpëyuq kaq shipashkunaqa chiwchinpaq aceitita apayänaqshi. 5Casakuq jövin manaraq chaptinshi tsë shipashkuna shuyarëkäyashqanllachö punukäriyänaq.

6<<Pullan paqasnash juk nuna qayakamunaq: <¡Casakuq jövin shamïkannam! ¡Chaskiyänëkipaq yarqayämï!> nir. 7Tsëshi llapan shipashkuna sharkur chiwchinkunata prevenir qallëkuyänaq. 8Aktsinkuna upikaptinnash dejäda shipashkunaqa alli yarpëyuq shipashkunata mañakur niyänaq: <Aktsïkuna upirinnam. Aceitikita mañëkalläyämë>. 9Tsënö niyaptinshi alli yarpëyuq kaqkuna kënö niyänaq: <Mana pishipukunantsikpaq ëwayë raslla rantiyämunki aceiti rantikuqkunapita>.

10<<Aceiti rantiq ëwayashqanyaqshi casakuq jövin chärinaq. Tsëshi alistakushqa shuyarëkaq shipashkunawan fiestaman yëkuriyaptin punku wichqakärinaq. 11Tsëpitanash aceiti rantiq ëwaq shipashkunaqa kutir punku wichqarëkaqta tariyänaq. Tsëshi qayakuyänaq: <¡Tëtë, tëtë! ¡Punkuta kicharallämï!> 12Tsënö qayakuyaptinshi casakuq jövin ruripita kënö nimunaq: <Qamkunataqa manam reqiyaqtsu. ¡Piraq kakuyankipis!> >>#Luc. 13.25.

13Tsënö willapärirmi Jesús kënö nirqan: <<¡Qamkunapis mäkuq mäkuqlla këkäyë! Manam musyayankitsu imë junaq ni imë höra [Nunapa Tsurin kutimunanpaq kashqanta]>>.

Sirwiqninkunapaq patronnin qellëta jaqipanqan

Lucas 19.11-27

14<<Teyta Diospa mandakïnin imanö kashqantapis willayashqëki. Juk nunash karupa ewkunanpaq sirwiqninkunata qayëkur qellëninta uryatsiyänanpaq jaqinaq. 15Yachëninkuna imanö kashqantapis musyarirshi jukninpaq pitsqa talentu#25.15 Juk talentu karqan juk nuna ishkë chunka (20) wata uryar ganashqannömi. qellënin jaqinaq, jukninpaq ishkë talentu qellënin jaqinaq y jukninpaqnash juk talentu qellënin jaqinaq. Nïkurshi karu markapa ewkunaq. 16Pitsqa talentu qellëta chaskiq kaqqa negociuta rurarshi pitsqa talentu masta gananaq. 17Ishkë talentu qellë chaskiq kaqpis negociuta rurar ishkë talentu mas qellëtash gananaq. 18Juk talentu qellë chaskiq kaqnash patsata uchkurir pampëkunaq.

19<<Patronnin unëta kutïkurnash qellënin jaqinqanpita cuentata mañanaq. 20Pitsqa talentu qellë chaskiq kaqshi pitsqa talentu mas qellëta qoykur ninaq: <Tëtë, pitsqa talentu qellë jaqishqëkiwanmi pitsqa talentu masta ganarqü>.

21<<Patronninnash ninaq: <Alli sirwikuqmi kanki. Wallkallapitapis qellëta miratsishqëkipitam mas mandakuq kanëkipaq churashqëki. Wayïman yëkamï fiestata rurar kushikunantsikpaq>.

22<<Tsënöllash ishkë talentu qellë chaskiq kaqpis ninaq: <Tëtë, ishkë talentu qellë jaqimashqëkiwanmi ishkë talentu mas qellëta ganarqü>.

23<<Patronninnash ninaq: <Alli sirwikuqmi kanki. Wallkallapitapis shumaq miratsishqëkipitam mas mandakuq kanëkipaq churashqëki. Wayïman yëkamï fiestata rurar kushikunantsikpaq>.

24<<Juk talentu qellë chaskiq sirwikuqnash ninaq: <Tëtë, noqa musyämi mana ankupäkuq kashqëkita. Qamqa mana murushqëkipitam cosechanki. Mana uryashqëkipitam ëllunki. 25Tsënö kaptikim mantsakurnin qellënikita pampëkurqä. Tëtë, këmi qellëniki. Kanqanllatam apamurqü>.

26<<Patronninnash ninaq: <¡Qamqa mana markäkïpaq qela sirwikuqmi kanki! Mana murushqäpita cosechashqäta musyëkarqa y mana uryashqäpita ëllushqäta musyëkarqa 27qellënïta bancullamanpis churankiman karqan kutimur wachënintawan ëllunäpaq>.

28<<Tsëchö këkaq nunakunatanash kënö ninaq: <¡Tsararanqan qellënïta qochirkur qoykuyë chunka talentu qellë tsaraqta! 29Markäkïpaq kaqtaqa mastam qoykushaq. Mana markäkïpaq kaqtaqa ichiklla katsinqantapis qochishaqmi.#Mat. 13.12; Mar. 4.25; Luc. 8.18. 30Kë yarpëninnaq sirwikuqta mantsëpaq tutapëman jitarkuyë. Tsëchömi alläpa waqar kiruntapis ruchuchütsinqa> >>.#Mat. 8.12; 22.13; Luc. 13.28.

Juiciu junaq imanö kananpaq kanqan

31<<Nunapa Tsurin chipapëkar santu angelninkunawan shamurmi#Mat. 16.27. chipapëkaq trönunman täkurinqa.#Mat. 19.28. 32Tsë junaqmi jinantin nacionkunapita llapan nunakuna nöpanman ëllukäyanqa. Tsëmi mitsiq nuna üshakunata chiwakunapita rakiqnö nunakunata rakinqa. 33Üshakunatam allawka kaq läduman rakinqa y chiwakunatanam itsuq kaq läduman rakinqa.

34<<Allawka kaq läduchö kaqkunatam kënö ninqa: <Qamkunataqa alläpam Teytä kuyayäshunki. Teyta Diospa mandakïninman yëkuyänëkipaq shayämï. Mandakïnintaqa kë patsatapis manaraq kamarmi qamkunapaq Teytä alistashqa. 35Qamkunaqa mallaqëkaptïpis qarayämarqunkim. Yakunëkaptïpis yakuta makyayämarqunkim. Juk markapita këkaptïpis posadatsiyämarqunkim. 36Ratashninnaq këkaptïpis ratashnï qoyämarqunkim. Qeshyaptïpis jampiyämarqunkim. Carcelchö llawirëkaptïpis watukayämarqunkim>.#Heb. 13.3.

37<<Tsënö niptinmi tsë alli ruraqkuna kënö tapuyanqa: <Teyta, ¿imëtaq mallaqëkaptiki qarayarquq? ¿Imëtaq yakunëkaptiki yakuta makyayarquq? 38¿Imëtaq juk markapita këkaptiki posadakatsiyarquq? ¿Imëtaq ratashninnaq këkaptiki ratashta qoyarquq? 39¿Imëtaq qeshyëkaptiki o carcelchö llawirëkaptiki watukaqniki shayämurqü?> 40Tsënö niyaptinmi rey kënö ninqa: <Rasunpam niyaq: Pitapis tsënö jipaqkunata ankuparqa noqatam ankupäyämarqunki>.#Eze. 18.7.

41<<Itsuqninchö këkaq nunakunatanam ninqa: <¡Maldiciädukuna, nöpäpita witikuyë! ¡Diablupaq y angelninkunapaq alistashqa imëpis mana upiq ninaman ëwayë! 42Qamkunaqa mallaqëkaptïpis manam qarayämarqunkitsu. Yakunëkaptïpis manam yakuta makyayämarqunkitsu. 43Juk markapita këkaptïpis manam posadakatsiyämarqunkitsu. Ratashninnaq këkaptïpis manam ratashnï qoyämarqunkitsu. Qeshyëkaptïpis y carcelchö llawirëkaptïpis manam watukayämarqunkitsu>.

44<<Tsënö niptinmi itsuqninchö këkaq nunakunapis kënö tapuyanqa: <Teyta, ¿imëtaq mallaqëkaqta, yakunëkaqta, juk markapita këkaqta, ratashninnaqta, qeshyëkaqta, carcelchö llawirëkaqta rikëkar yanapayarquqtsu?> 45Pëkunatanam ninqa: <Rasunpam niyaq: Pitapis tsënö jipaqkunata mana ankuparqa noqatam ankupäyämarqunkitsu> >>.#1Cor. 8.12.

46Tsëpitanam Jesús nirqan: <<Tsë mana ankupäkuq nunakunaqa imëyaqpis castigashqam kayanqa. Teyta Dios munashqannö ankupäkuq nunakunaqa wiñë kawëtam tariyanqa>>.#Dan. 12.2.

Currently Selected:

Mateo 25: qwhB

Highlight

Copy

Compare