Mateo 13

Murukuq nunaman Jesús iwalatsinqan

Marcos 4.1-9; Lucas 8.4-8

1Tsë junaqllam wayipita yarqurir Jesús ëwarqan Galilea qocha kuchunman. Chärirmi yachatsikunanpaq täkurirqan. 2Jesús yachatsikushqanta wiyëta munarnam atskaq nunakuna tsëman ëllukäyarqan. Alläpa kichkïyaptinnam qocha kuchunchö këkaq barcuman lloqarkur Jesús täkurirqan.#Luc. 5.1-3.

3Tsëpitanam imawanpis iwalatsikïpa atska yachatsikïkunata yachatsikur nirqan: <<Juk nunash trïgu muruq ëwanaq. 4Muruta ramaptinshi näniman wakin pintiyänaq. Tsëtash pishqukuna shamur upshakurkuyänaq. 5Wakin murunash ranraman pintiyänaq. Tsëchö allpa mana kaptinshi ras jeqaramurpis 6sipin#13.6 Wakin nunakunaqa watsin o jawan niyanmi. mana kaptin achachëwan tsakiriyänaq. 7Wakin murunash kashakuna rurinman pintiyänaq. Jeqaramuptinnash kashakuna nitiriptin qarwashyar wanuriyänaq. 8Wakin murunash alli allpaman ishkiyänaq. Tsëchö alli winamurshi alli espïgayuq kayänaq. Wakin espïgash juk pachak (100) trïguta wayunaq, wakin espïgash joqta chunka (60) trïguta wayunaq y wakinnash kima chunka (30) trïguta wayunaq. 9Rinriyuq kaqkunaqa nishqäkunata wiyakuyë>>.

Iwalatsikïpa imanir Jesús yachatsinqanpis

Marcos 4.10-12; Lucas 8.9-10

10Tsëpitanam discïpulunkuna Jesústa kënö tapuyarqan: <<Tëtë, ¿imanirtaq iwalatsikïpa yachatsikunki? Käyïkatsilläyämë>>.

11Jesúsnam kënö nirqan: <<Qamkunataqa Teyta Diospa mandakïnin imanö kashqantapis shumaqmi käyitsiyashqëki. Qamkunata käyitsirpis wakinkunataqa manam käyitsishaqtsu. 12Yachatsishqäta cäsukuqkunaqa masmi käyiyanqa. Mana cäsukuqkunaqa ichiklla käyiyashqanllatapis qonqëkuyanqam.#Mat. 25.29; Mar. 4.25; Luc. 8.18; 19.26. 13Tsëmi imawanpis iwalatsikïpa willapëkä. Pëkunaqa rikëkarpis manam mäkuyantsu y wiyëkarpis manam käyiyantsu. 14Tsënö kananpaq kashqanta musyarmi profëta Isaías kënö qellqarqan:

<<Tsëläya wiyëkarpis manam käyiyankitsu.

Imëkanö rikëkarpis manam cuentata qokuyankitsu.

15Tsë nunakunapa shonqunkuna chukruyashqam.

Rinrinkunapis latukashqam.

Nawinkunapis wiskuyashqam.

Tsëmi rikäyantsu, wiyayantsu, käyikuyantsu ni jutsankunata jaqiriyantsu.

Tsënö kayaptinmi noqapis kachakätsishaqtsu.#13.15 Manam qeshyallapita kachakätsinanpaqtsu nikan, sinöqa jipakïkunapita, llakikïkunapita y jutsa rurëkunapita salvananpaqmi nikan.#Isa. 6.9-10.

16<<Qamkunataqa Teyta Dios yanapëkäyäshunkim rikäyashqëkita y wiyayashqëkita käyikuyänëkipaq. 17Rasunpam niyaq: Unë profëtakunapis y Teyta Dios munashqannö kawaq nunakunapis rikäyanqëkikunata rikëta munarpis manam rikäyarqantsu. Wiyayanqëkita wiyëta munarpis manam wiyayarqantsu.#Luc. 10.23-24.

Murukuqman iwalatsinqanta Jesús käyitsinqan

Marcos 4.13-20; Lucas 8.11-15

18<<Murukuq nunaman iwalatsikïpa yachatsikunqäta kanan käyitsiyashqëki 19Trïgu muruqa Teyta Diospa mandakïninpa willakïninmi. Wakin nunakunaqa chukru näniman murushqanömi kayan. Tsëmi Teyta Diospa willakïninta wiyarpis mana chaskikuyaptin Satanás shamur wiyayashqantapis qonqaratsin.

20<<Wakin nunakunaqa ranra chakraman murushqanömi kayan. Pëkunaqa Diospa willakïninta wiyar kushishqam chaskikuyan. 21Kushishqa chaskikurpis sipinnaq#13.21 Wakin nunakunaqa watsinnaq o jawannaq niyanmi. trïgunömi këkäyan. Tsëmi Diospa palabranta chaskikuyashqanpita nunakuna chikiyaptin markäkïninta jaqiriyan.

22<<Wakin nunakunaqa kasha kasha chakraman murushqanömi kayan. Pëkunaqa Diospa willakïninta wiyarpis kë vïdachö imëkapaqpis llakikur y rïcu kananllapaq yarpakacharmi Diospa willakïninta qonqëkur mana wayuq trïgunö kayan.

23<<Wakin nunakunaqa alli allpaman murushqanömi kayan. Pëkunaqa Teyta Diospa willakïninta chaskikurmi Teyta Dios munashqannö kawayan. Tsëmi alli allpachö juk murullapita juk pachak (100) trïgu o joqta chunka (60) trïgu o kima chunka (30) trïgu wayushqannö kayan>>.

Trïguwan ballïgu jeqayämunqanpita Jesús yachatsinqan

24Tsëpitanam iwalatsikïpa yapë yachatsir Jesús kënö nirqan: <<Teyta Diospa mandakïnin imanö kashqantapis iwalatsikïpam yachatsiyashqëki. Juk nunash chakranchö trïguta murunaq. 25Murukur ushariptinnash chikiqnin nuna paqaspa ëwëkur trïgu murushqan jananman ballïguta maqtsïkunaq. 26Trïgu winamur espïgar qallëkuptinnash ballïgupis espïgaramunaq.

27<<Tsënash sirwiqninkuna ëwëkur patronninta kënö niyänaq: <Tëtë, akrëkur murïkaptikiqa ¿imanöparaq ballïgu jeqamushqa?>

28<<Tsënö willayaptinnash kënö ninaq: <Mëqanpis chikimaqnïmi tsëta maqtsishqa kanqa>.

<<Sirwiqninkunanash kënö tapuyänaq: <¿Munankiku tsë ballïguta llupikacharkuyänäta?>

29<<Niyaptinnash ninaq: <Ama llupiyëtsu. Ballïguta llupirqa trïgutapis llupiriyankim. 30Trïgu seguë tiempuyaq tsëllachö jaqiriyë. Cosëchachönam segaqkunata nishaq: <<Puntata ballïguta ëllurkur tersuyë kayanantsikpaq. Tsëpitana trïguta ëllurir qollqäman qotuyë>> > >>.

Mostäza muruman Jesús iwalatsinqan

Marcos 4.30-32; Lucas 13.18-19

31Yapëpis iwalatsikïpa yachatsirmi Jesús kënö nirqan: <<Teyta Diospa mandakïninqa mostäza muruta juk nuna chakranman murushqannömi këkan. 32Llapan murupita mas ichikllan këkarpis winamurqa wakin qorakunapitapis mas jatunmi winan. Tsëmi rämankunachö pishqukunapis qeshunkuna rurayan>>.#13.32 Tsënö nirmi Jesús kënö nirqan: Taksha murullapita mostäza jeqaramur winashqannömi Teyta Diospa mandakïninpis mëtsëmanpis chanqa.

Levadüraman Jesús iwalatsinqan

Lucas 13.20-21

33Iwalatsikïpa yapë yachatsirmi Jesús kënö nirqan: <<Teyta Diospa mandakïninqa imëka levadüranömi. Tantata rurananpaq kima tupu jarinaman levadürata winarkuptinmi masa atskaman jakan>>.#13.33 Tsënö nirmi Jesús kënö nirqan: Ichiklla levadüra masata jakatsishqannömi Teyta Diospa mandakïninpis mëtsëmanpis chanqa.

Imapaq iwalatsikïpa Jesús yachatsinqan

Marcos 4.33-34

34Tsënömi Jesús imawanpis iwalatsikïpa nunakunata yachatsirqan. Imëkamanpis mana iwalatsikïpaqa manam imëpis yachatsirqantsu. 35Tsënö yachatsirqan Teyta Diospa profëtan kënö nishqan cumplikänanpaqmi:

<<Imawanpis iwalatsikïpam willapäyashqëki.

Kë patsata kamashqanpita pipis mana käyishqankunatam willakushaq>>.#Sal. 78.2.

Ballïguman iwalatsikïpa yachatsinqanta Jesús käyitsinqan

36Tsëpitanam nunakunata ewkuyänanpaq nirirna Jesús juk wayiman yëkurirqan. Tsëchömi discïpulunkuna rowayarqan ballïguman iwalatsikïpa yachatsishqanta käyitsiyänanpaq.

37Tsëmi Jesús kënö nirqan: <<Trïguta muruq kaqqa Nunapa Tsurinmi. 38Chakraqa jinantin patsam. Trïguqa Teyta Diospa mandakïninchö kawaqkunam. Ballïguqa Satanás munashqannö kawaqkunam. 39Ballïguta maqtsiqqa diablum. Cosëchaqa juiciu junaqmi. Cosëchata ëlluqkunanam angelkuna.

40<<Ballïguta ëllurir ninaman jitëkushqannömi juiciu junaqpis kanqa. 41Juiciu junaqchömi angelninkunata Nunapa Tsurin kachamunqa jutsata ruratsiqkunata y jutsa ruraqkunatapis mandakïninpita ëllïkur 42rawrakïkaq ninaman jitëkuyänanpaq. Tsëchömi alläpa waqar kirunkunatapis ruchuchütsiyanqa. 43Teyta Dios munashqannö kawaqkunaqa Teyta Diospa mandakïninchö intinöran atsikyäyanqa.#Dan. 12.3. Rinriyuq kaqkunaqa nishqäkunata wiyakuyë.

Pamparaq qellëman Jesús iwalatsinqan

44<<Teyta Diospa mandakïninqa chakrachö qellë pamparaqmanmi iwalan. Juk nunash chakrachö atska qellë pamparëkaqta tarikunaq. Tsë qellëta tarïkurshi kashqanllaman pampëkunaq. Tsëpitanash llapan imëkantapis rantikïkur tsë qellë pamparëkaq chakrata kushishqa rantikurkunaq.#13.44 Tsënö nirmi Jesús kënö nirqan: Tsë chakrachö tarishqan qellë llapan imëkanpitapis mas alli kashqannömi Diospa mandakïninman yëkunantsikpaq kashqanpis llapan imëkantsikpitapis mas alli këkan.

Perlakunaman Jesús iwalatsinqan

45<<Tsënöllam Teyta Diospa mandakïninqa kuyëllapaq perlaman iwalan. Juk negociantish alli kaq perlata rantinanpaq ashinaq. 46Mas allin kaqta tarïkurnash llapan imëkantapis rantikïkur tsë perlata rantinaq>>.#13.46 Tsënö nirmi Jesús kënö nirqan: Tsë rantishqan perla llapan imëkanpitapis mas alli kashqannömi Diospa mandakïninman yëkunantsikpaq kashqanpis llapan imëkantsikpitapis mas alli këkan.

Atarräyaman Jesús iwalatsinqan

47<<Jina Teyta Diospa mandakïninqa atarräyamanmi iwalan. Lamarman atarräyata jitarmi tukïläya pescäduta tsariyan. 48Atarräya juntariptinnam lamar kuchunman jorquyan. Tsëchömi alli kaq pescäduta canastaman winayan y mana alli kaqtanam jitariyan. 49Tsënöllam juiciu junaqchö angelkuna shamur alli nunakunapita jutsa ruraq nunakunata rakiyanqa. 50Jutsa ruraqkunatam rawrëkaq ninaman jitëkuyanqa. Tsëchömi alläpa waqar kirunkunatapis ruchuchütsiyanqa>>.

Maran kaq y mushuq kaq mikïman Jesús iwalatsinqan

51Tsënö yachatsikurirnam discïpulunkunata Jesús tapurqan: <<¿Kë yachatsiyashqaqkunata käyiyankiku?>> nir.

Pëkunanam niyarqan: <<Awmi teyta>>.

52Jesúsnam nirqan: <<Teyta Diospa mandakïninpita yachatsiq nunaqa maran kaq mikïkunata y mushuq kaq mikïkunata jorqaramur qaraqnömi këkan>>.#13.52 Maran kaq mikïkunata iwalatsin Moisés qellqashqanman y profëtakuna willakuyashqanmanmi. Mushuq kaq mikïkunatanam iwalatsin Jesucristo yachatsishqanman.

Nazaretchö Jesús willakunqan

Marcos 6.1-6; Lucas 4.16-30

53Imawanpis iwalatsikïpa yachatsikurirnam Jesús tsëpita ewkurqan. 54Markanman chëkur sinagögachö yachatsikuptinnam marka mayinkuna espantakur kënö niyarqan: <<Tsënö yachatsikunanpaq ¿mëchöraq yachakamushqa? ¿Imanöparaq milagrukunata ruran? 55Pëqa ¿manaku carpintëru Josépa tsurin? Mamäninpis ¿manaku María? Wawqinkunapis ¿manaku Santiago, José, Simón y Judas? 56Llapan paninkunapis ¿manaku këchö täräyan? Tsënöpa yachatsikunanpaq ¿mëchöraq yachakamushqa?>>

57Tsënö nirmi Jesús yachatsikushqankunata chaskiyarqantsu. Tsëmi Jesús kënö nirqan: <<Wakin markakunachö profëtata chaskiyaptinpis castankunaqa y marka mayinkunaqa manam chaskiyantsu>>.#Juan 4.44.

58Tsënö mana chaskiyaptinmi alläpaqa milagrukunata tsëchö rurarqantsu.

Currently Selected:

Mateo 13: qwhB

Highlight

Copy

Compare