Mateo 12

Jamakï junaqpaq Jesús poderyuq kanqan

Marcos 2.23-28; Lucas 6.1-5

1Jamakï junaqchömi murushqa trïgukuna kuchunpa discïpulunkunawan Jesús pasëkäyarqan. Tsëpa pasarmi discïpulunkuna mallaqar espïgata pallarir uchuyarqan.#Deut. 23.25. 2Tsëta rikarmi fariseukuna kënö niyarqan: <<Rikë. Leynintsikta mana cäsurmi discïpulïkikuna jamakï junaq këkaptin trïguta pallëkäyan>>.

3Jesúsnam nirqan: <<¿Manaku imëllapis leyiyarqunki yanapaqninkunawan mallaqar David imata rurashqantapis? 4Davidshi Teyta Diospa wayinman yëkur Diospaq churayashqan tantata mikunaq.#1Sam. 21.1-6. Tsë tantaqa manam David ni pëwan këkaq nunakuna mikuyänanpaqtsu karqan, sinöqa sacerdötikunalla mikuyänanpaqmi.#Lev. 24.9. 5Tsënöllam Moisés qellqashqan leykunachö nikan sacerdötikuna templuchö jamakï junaq uryarpis jutsayuq mana kayashqanta. ¿Manaku tsëtapis leyiyashqanki?#Núm. 28.9-10. 6Tsëmi niyaq: Noqam templupitapis mas puëdiq kä.#12.6 Sacerdötikuna jamakï junaq templuchö uryayashqan jutsa mana kashqannömi Jesúspa discïpulunkuna jamakï junaqchö trïguta pallayashqanpis jutsatsu karqan.

7<<Teyta Diospa palabranchömi nin: <Sacrificiuta kayayashqëkipitapis masqa munä alläpa ankupäkuq kayänëkitam>. Tsëta käyikurqa manam discïpulükunata penqapäyankimantsu.#Ose. 6.6; Mat. 9.13. 8Nunapa Tsurinqa jamakï junaqpaqpis poderyuqmi këkan>>.#12.8 Tsënö nirqa jamakï junaqchö nuna imata rurananpaq y mana rurananpaqpis poderyuq kanqantam Jesús nirqan.

Makin tsakishqa nunata jamakï junaqchö Jesús kachakätsinqan

Marcos 3.1-6; Lucas 6.6-11

9Tsëpita ewkurmi sinagögaman Jesús yëkurirqan. 10Tsëchömi makin tsakishqa nuna këkarqan. Tsëmi Jesústa tapuyarqan: <<Jamakï junaq këkaptin qeshyëkaqta ¿kachakätsishwanku o manaku?>>

Tsënö tapuyarqan kachakätsiptinqa tsë achäquilla Jesúspa contran shäriyänanpaqmi.

11Jesúsnam nirqan: <<Mëqëkipapis üshëkikuna pözuman jeqaptin jamakï junaq këkaptinpis ¿manaku tsë höra jorquq ëwayanki?#Luc. 14.5. 12Nunaqa üshapitapis masmi välin. Tsënö këkaptinqa jamakï junaqchöpis nuna mayintsikta kachakätsinantsikmi>>.

13Tsëpitanam makin tsakishqa nunata kënö nirqan: <<¡Makikita pallari!>>

Pallarkuptinnam juk kaq makinnö sänuna tikrarirqan. 14Tsëpitanam fariseukuna yarqurir Jesústa wanutsiyänanpaq parlayarqan.

Jesúspaq profëta Isaías qellqanqan

15Tsënö parlayashqanta musyarirnam tsë markapita Jesús ewkurqan. Ewkuptinmi atskaq nunakuna qepanta ëwayarqan. Qeshyaq kaqtaqa llapantam Jesús kachakätsirqan. 16Kachakätsirmi Jesús kënö nirqan: <<Noqa kachakätsiyashqaqta ama pitapis willayankitsu>>.

17Tsënöpam profëta Isaías kënö qellqashqan cumplikarqan:

18<<Sirwimaqnï imanö kashqanta käyikuyë.

Pëtam akrarqü.

Pëtam kuyä.

Pëpitam alläpa kushikü.

Espïritütam pëman kachamushaq.

Pëmi jinantin nación nunakuna munashqänö kawayänanpaq willapanqa.

19Pëqa manam liryanqatsu ni qayapanqatsu.

Cällikunachöpis manam qaparikachar purinqatsu.

20Tsillishqa shoqushtapis manam juk paqwë pakirinqatsu.

Upinëkaq aktsitapis manam upirinqatsu.#12.20 Kë textuchömi llakikuqkunata iwalatsirqan tsillishqa shoqushman y upinëkaq aktsiman. Tsëmi kë textuchö nikan llakishqa kawëkaq nunakunata manakaqpaq churananpa rantin Jesucristo ankupänanpaq kashqanta.

Pëqa llapanpaqpis alli justiciatam ruranqa.

21Juk lädu nacionchö täraqkunapis pëmanmi markäkuyanqa>>.#Isa. 42.1-4.

Jesúspa contran parlayanqan

Marcos 3.20-30; Lucas 11.14-23; 12.10

22Tsëpitanam supë wiskuyätsishqan müduyätsishqan nunata Jesús kaqman pushayarqan. Tsë nunata kachakäratsiptinmi rikarqanna y parlarqanna. 23Tsëta rikarmi nunakuna kushikur kënö niyarqan: <<¿Kë nunaqa Davidpa Tsurintsuraq?>>

24Tsënö niyashqanta wiyarmi fariseukuna kënö niyarqan: <<Kë nunaqa supëkunapa mandakuqnin Beelzebúpa#12.24 Beelzebúqa Satanáspa juk kaq shutinmi. poderninwanmi supëkunata qarqun>>.#Mat. 9.34; 10.25.

25Pëkuna mana alli yarpäyashqanta musyarmi Jesús kënö nirqan: <<Juk nacionchö nunakuna kikinkunapura chikinakurqa ¿manatsuraq wanutsinakur ushakäyanman? Jina juk markachö täraqkunapis o juk wayichö täraqkunapis chikinakurqa ¿manatsuraq wakpa këpa ewkur ushakäyanman? 26Tsënöllam Satanáspis kikinpa contran shärirqa rakikashqa kayanqa. Tsënö kaptinqa mandakïninpis ushakanqam.

27<<Beelzebúpa poderninwan supëkunata qarquptïqa ¿pipa poderninwantaq qatiräshuqnikikunaqa supëkunata qarquyan? Diospa poderninwan supëkunata qarquyashqanta käyikarqa ¿imanirtaq käyiyankitsu noqapis Diospa poderninwan qarqushqäta? 28Diospa Espïritunwan supëkunata qarquptïmi Teyta Diospa mandakïnin qamkunaman chämushqanta musyayanki>>.

29<<Kallpayuq nunata manaraq pankarqa manam pipis wayinman yëkur imankunatapis apakunmantsu. Pankëkurqa imankunatapis apakunqa.#12.29 Kallpayuq nunamanmi Satanásta iwalatsin. Kallpayuq nunapa imankunamanmi poderninchö tsararashqan nunakunata iwalatsin. Satanáspita mas kallpayuq nunamanmi Jesucristo iwalatsikun. Tsënöpam käyitsirqan Satanáspita mas puëdiq kashqanta.

30<<Pipis noqawan mana karqa conträmi këkan. Noqawan mana ëllumuq kaqqa qarqukacharkunmi.#12.30 Tsënö parlarqa Jesús kënö ninantam nirqan: Teyta Diospa mandakïninchö nunakuna kawayänanpaq noqawan mana ëlluq kaqqa atäjutam churapëkäman. 31Tsëmi niyaq: Nunakuna jutsata rurayashqanta y Diospa contran parlayashqantapis Teyta Dios perdonanqam. Peru Espíritu Santupa contran parlayashqantaqa manam perdonanqatsu. 32Nunapa Tsurinpa contran parlayaptinqa perdonanqam. Peru Espíritu Santupa contran parlayaptinqa imëpis manam kë vïdachöpis ni wak vïdachöpis perdonanqatsu.#12.31-32 Espíritu Santuqa jutsantsikta jaqirir Jesucristuta chaskikunantsikpaqmi käyitsimantsik (Juan 16.8-11). Tsëmi Espíritu Santupa contran parlarqa pë käyitsishqanta mana chaskikur Jesucristuta imëpis chaskikuntsu (Hech. 7.51). Tsënö kaptinpis Jesucristuta chaskikuq kaqqa perdonta tarinqam.#Luc. 12.10.

Parlakïninpita nunata reqinqantsikta Jesús ninqan

Lucas 6.43-45

33<<Alli montiqa alli frütatam wayun. Mana alli montiqa mana alli frütatam wayun. Wayïninpitam montitaqa reqintsik.#12.33 Tsënö parlar Jesucristo kënömi nirqan: Montita wayïninpa reqishqantsiknömi nunatapis parlakïninpita musyantsik alli kashqanta o mana alli kashqantapis.#Mat. 7.20; Luc. 6.44. 34¡Culebra casta nunakuna!#Mat. 3.7; 23.33; Luc. 3.7. Mana alli nuna këkarqa ¿imanöparaq allita parlayankiman? Nunaqa shonqunchö yarpanqantam allita o mana allitapis parlan.#Mat. 15.18; Luc. 6.45. 35Alli nunaqa shonqun allita yarpashqantam parlan y mana alli nunaqa shonqun mana allita yarpashqantam parlan. 36Tsëmi niyaq: Imatapis llutankunata parlayashqanpitam juiciu junaqchö Teyta Dios juzganqa. 37Allikunata parlaqtaqa salvanqam. Llutankunata parlaqtaqa infiernumanmi jitëkunqa>>.

Milagrutaraq Jesús rurananta munayanqan

Marcos 8.11-12; Lucas 11.29-32

38Tsënö niptinnam wakin fariseukuna y ley yachatsikuqkuna Jesústa niyarqan: <<Rabí, Dios rasunpa kachamushushqëkita musyayänäpaq ima milagrullatapis ruraramï>>.#Mat. 16.1; Mar. 8.11; Luc. 11.16.

39Jesúsnam nirqan: <<¡Mana wiyakuq jutsasapa nunakuna! Milagruta ruranäta munayaptikipis#Mat. 16.4; Mar. 8.12. manam ima milagruta rurashaqtsu. Tsëpa rantinqa profëta Jonásta salvar milagruta rurashqannömi Teyta Dios juk milagruta ruranqa. 40Kima junaq kima paqas jatun pescädupa pachanchö Jonás kashqannömi#Jon. 1.17. Nunapa Tsurinpis kima junaq kima paqas pamparanqa.

41<<Jonás willapäkushqanta chaskirmi Nínive nunakuna jutsa rurëta jaqiriyarqan.#Jon. 3.5. Kananqa Jonáspita mas poderyuq kaqmi willapëkäyäshunki.#12.40-41 Nunapa Tsurinpaq parlar y Jonáspita mas poderyuq kaqpaq parlarqa kikinpaqmi Jesucristo parlarqan. Tsëmi juiciu junaqchö Nínive nunakuna shärimur kanan witsan nunakunata shimpiyanqa>>.

42<<Salomón yachatsikushqanta wiyaqmi sur kaq lädu karu nacionpita juk reinapis shamurqan.#1Rey. 10.1-10; 2Crón. 9.1-12. Kananqa Salomónpita mas yachëyuq kaqmi willapëkäyäshunki.#12.42 Salomónpita mas yachëyuq kaqpaq parlarqa kikinpaqmi Jesucristo parlarqan. Tsëmi juiciu junaqchö tsë reina shärimur kanan witsan nunakunata shimpinqa.

Täranqan nunaman supë kutinqan

Lucas 11.24-26

43<<Nunapita supë yarqurirmi mëchöpis täränanpaq ashir chusyaq jirkakunapa purin. Mana tarirnam 44kënö nin: <Yarqamushqä wayïmanmi kutikushaq>. Kutirirnam tarin pitsapakushqa y shumaq churapakushqa jayäkïkaqta. 45Tsënöta tarïkurnam supë mayinkunaman ëwar pëpita mas mana alli qanchis supëkunata pusharkur tsë tärashqanman kutïkun. Tsëmi nöpata kashqanpitapis mas peor tsë nuna tikrakurin. Tsënömi pasanqa kanan witsan aksë nunakunawanpis>>.

Jesúspa mamänin y wawqinkuna pikuna kayanqan

Marcos 3.31-35; Lucas 8.19-21

46Jesús tsënö yachëkätsiptinnam pëwan parlëta munar mamänin y wawqinkuna punkuchö shuyarëkäyarqan. 47Tsëmi Jesústa juk nuna kënö willarqan: <<Mamëki y wawqikikunam waqtachö shuyëkäyäshunki>>.

48Jesúsnam nirqan: <<Kananmi mamänï y wawqïkuna pikuna kayashqantapis willayashqëki>>.

49Tsënam discïpulunkunaman makinwan apuntëkur nirqan: <<Pëkunam mamänï y wawqïkuna këkäyan. 50Pipis ciëluchö këkaq Teytä munashqannö kawaq kaqmi wawqï, panï y mamänï kayan>>.

Currently Selected:

Mateo 12: qwhB

Highlight

Copy

Compare