Lucas 2

Jesús yurikunqan

Mateo 1.18-25

1Tsë witsanmi Augusto César mandakushqan nacionkunachö llapan nunakuna censakuyänanpaq mandakurqan. 2Tsë punta censutam rurayarqan Siria provinciachö Cirenio nishqan gobernador këkaptin. 3Llapan nunakunam unë castankunapa markankunaman ëwayarqan censashqa kayänanpaq.

4Unë castan rey David Belénchö yurishqa kaptinmi Josépis Galileachö këkaq Nazaretpita Judeachö këkaq Belénman censakuq ëwarqan. 5Warmin kananpaq parlashqana karmi Maríatapis pusharqan. Maríaqa qeshpikunanpaqnam këkarqan. 6Belénchö këkäyaptinnam killan tinkuriptin pachan tsaripïkurqan. 7Tsëchömi wamaqshu wawanta qeshpikurqan. Posadakuyänanpaq cuartu mana kaptinmi ayurir wätakunapa mikukuyänanllaman iskaratsirqan.#2.7 Tsë witsan wayikuna ishkë cuartuyuqllam karqan. Juk cuartum karqan visitakuna posadakuyänanpaq y juk cuartunam karqan kikin wayiyuq castankunawan punukuyänanpaq. Tsë wayiyuqpa cuartun juk kuchunchömi wätakuna mikuyänanpis karqan. Tsëmanmi nïñu Jesústa punïkatsirqan.

Üsha täpakuqkunata angelkuna yuripunqan

8Tsë paqasmi Belén markapa washaninchö mitsikuq nunakuna üshankunata täpakïkäyarqan. 9Tsëman ángel juklla yurirkuptinmi Teyta Diospa chipapënin relampagunöraq limpu aktsïkurqan. Tsëta rikëkurmi täpakuqkuna alläpa mantsakëkuyarqan. 10Angelnam nirqan: <<Ama mantsakäyëtsu. Llapan nunakuna kushikuyänanpaqmi alli willakïta apamurqü. 11Kananmi rey Davidpa markanchö juk salvador yurikushqa. ¡Pëqa Señornintsik Cristum! 12Kë willayashqaq rasunpa kanqanta musyayänëkipaqmi kanan ëwar wätakunapa mikukuyänanchö llullu wamrata ayuwan wankushqa iskarëkaqta tariyanki>>.

13Ángel tsënö nikaptinnam juklla atskaq angelkuna yurirkur Teyta Diosta alabarnin kënö niyarqan:

14<<¡Ciëluchö kaqkuna Teyta Diosta alabëkulläyätsun!

¡Kë patsachöpis Teyta Dios ankupashqan kaqkuna alli pasakïchöna këkulläyätsun!>>

15Angelkuna ciëluman kutikuyaptinnam mitsikuqkuna kënö ninakuyarqan: <<Teyta Dios willatsimanqantsiknö aku Belénman ëwar rikämushun>>.

16Tsënö nirmi raslla ëwar Joséta, Maríata y llulluta taririyarqan. Llullunam wätakunapa mikukuyänanllachö iskarëkarqan. 17Tsëta rikarirnam willakuyarqan llullupaq ángel llapan ninqanta. 18Willakuyaptinmi llapan wiyaqkuna kushikuyarqan. 19Maríaqa tsë llapanta shonqunllachömi yarpakacharqan. 20Mitsiqkunanam ángel willashqanqannölla llapanta taririr rikäyanqanpita y wiyayanqanpita Teyta Diosta alabarnin kutikuyarqan.

Jesústa templuman apayanqan

21Wamra semänayuq këkaptinnam tëtan mamäninwan compañonninchö señalatsiyarqan. Manaraq qeshyaq kaptin ángel yuripur ninqannöllam shutin churayarqan Jesústa.

22 Moisés qellqashqan leykunachö ninqannöllam María purificäkunan junaq chäriptin#Lev. 12.2-8. Teyta Diosman presentayänanpaq Joséwan María Jerusalén templuman llulluta apayarqan. 23Tsënö apayänanpaqqa Teyta Diospa leynin kënömi qellqarëkan: <<Punta yuriq ollqu tsurikiqa Teyta Diospam kanqa>>.#Éxo. 13.2, 12-13; Núm. 3.11-13, 45-47; 18.15-16.

24Tsënöllam Diospa leynin kënö qellqarëkan: <<Ishkë kullkukunata o ishkë llullu urpëkunata apamunqa>>.#Lev. 12.8. Tsë nishqantapis cumpliyänanpaqmi templuman ëwayarqan.

25Tsë witsanmi Jerusalénchö juk nuna tärarqan Simeón shutiyuq. Pëqa allillata rurarmi Teyta Diosman markäkur kawakurqan. Pëmi shuyararqan Cristo shamuptin Israel nación librashqa kananpaq kaqta. Teyta Diospa Espíritu Santunmi pëchö karqan. 26Espíritu Santum pëta musyatsirqan Teyta Dios kachamushqan Cristuta rikärirraq wanukunanpaq. 27Tsënö käyitsiptinmi templuman Simeón ëwarqan. Tsëmannam Joséwan María Jesústa chäratsiyarqan ley mandakushqannö rurayänanpaq. 28Simeónnam wamrata mellqarkur Diosta alabarnin kënö nirqan:

29<<Teyta Diosllä, änillämashqëkitam kanan cumplirillarqunki.

Kananmi sï kushishqana wanukulläshaq.

30Kachamushqëki salvadorta rikärillätaq.

31Pëta kachamurqunki jinantinchö täkuq nunakunata salvanëkipaqmi.

32Mana Israel nunakunapaqpis aktsim kanqa.

Pë rëkurmi kuyashqëki Israel nunakunapis alläpa reqishqa kayanqa>>.

33Simeón nishqanta wiyarninnam Joséwan María kushikuyarqan. 34Tsënam Teyta Diosta Simeón mañakurqan bendicionninta pëkunaman churananpaq. Jesúspa mamänin Maríatanam nirqan: <<Kë wawëki rëkurmi wakin Israel nunakuna condenakuyanqa y wakin kaqkunanam salvakuyanqa. Pëtaqa atskaq nunakunam chikiyanqa. 35Tsënöpam nunakuna musyatsikuyanqa shonqunkunachö imanöpis kayanqanta. Pë rëkurmi jipanki imëka cutsilluwan shonqïkita tuksikayämuptin nanatsikuqnöraq>>.

36Templupa patiunchömi Teyta Diospa profëtan chakwan Anapis këkarqan. Pëpa tëtanqa Aser trïbupita Fanuelmi karqan. Pëqa qanchis watallam qowanwan täräyarqan. 37Qowan wanuriptinnam puwaq chunka chusku (84) watana japallanlla täkurqan. Templupa patiunpita mana yarqïtam paqaspa y junaqpa ayunar Teyta Diosman mañakur kakuq. 38Simeón mañakïta ushariptinnam Anapis Jesús këkanqanman yurirkur Teyta Diosta payllä nikurqan. Tsëpitanam Teyta Dios kachamunqan Cristuta shuyäkuqkunata kënö nirqan: <<Kë llullum shuyäkunqantsik salvadorqa>>.

39Teyta Diospa leyninchö mandakushqanta rurar usharirnam Joséwan María Galileachö Nazaret markankunaman kutikuyarqan. 40Teyta Dios imëkachöpis yanapaptinmi Jesús gentiyarnin alläpa yachëyuq y kallpayuq tikrarqan.

Templuchö Jesústa tariyanqan

41Wata watam Jesúspa tëtanwan maman Pascua fiestaman Jerusalénta ëwayaq. 42Jesús chunka ishkë watayuq këkaptinnam Israel nunakunapa costumbrinkunamannö Pascua fiestaman Jesústapis pushayarqan. 43Fiesta ushariptinnam Joséwan María markankunaman kutikuyarqan. Jesúsnam Jerusalénchö quedakushqa kanaq mana mäkuyanqanyaq. 44Pëkuna yarpäyänaq: <<Kë atskaq nunakunawanchi shamïkan>> nir. Qanyasninpi ëwëkarnam pullan nänichö tardiyäkïkuptinna Jesústa ashiyarqan castankunata y reqinakuyashqankunata tapukurnin. 45Mana tarirninnam Jerusalénman kutikuyarqan ashirnin.

46Kima junaq ashiyanqanchönam templuchö këkaqta Jesústa tariyarqan. Tsëchömi ley yachatsikuqkunawan tapunakur tëkarqan. 47Jesús alli yachaq kar tapuyanqankunata shumaq yaskiptinmi wiyaqninkunapis espantakuyarqan. 48Tsëchö rikarirnam tëtanwan mamänin espantakuyarqan. Mamäninnam nirqan: <<Ä wawä, ¿imanirtaq këta rurayämanki? Alläpa llakishqam ashiyarquq>>.

49Tsënam Jesús nirqan: <<¿Imanirtaq ashiyämarqunki? ¿Manaku musyayanki Teytäpa wayinchö kanäpaq kashqanta?>>

50Tsënö niptinpis pëkunaqa imapaq nishqantapis manam käyiyarqantsu.

51Tsëpitanam pëkunawan Nazaretman kutikur mandayanqankunata rurar karqan. Mamäninnam shonqunllachö llapan pasanqankunata yarpakacharqan. 52Gentiyarninnam Jesúsqa alli yachaq karqan. Diospaq y nunakunapaqpis alläpa allim karqan.

Currently Selected:

Lucas 2: qwhB

Highlight

Copy

Compare