Joel 1
1
Murukïkunata pintiq kurukuna chipyëpa ushariyanqan
1 Teyta Dios revelashqantam Petuelpa tsurin Joel willakur nirqan:
2Anciänukuna, kanan niyashqaqta shumaq wiyayämë.
Judá nacionchö täraq nunakunapis, kanan willakushqäta wiyayämë.
Kë castïgutanöqa ¿imëllapis rikäyarqunkitsuraq?
Tëtëkikuna tiempuchö kënö mantsaripaq castïgu ¿imëllaqa kashqatsuraq?
3Kë castïgu imanö kashqantapis tsurikikunata willayanki.
Tsurikikunapis tsurinkunata willapäyanqa.
Tsënölla willkëkikunapis tsurinkunata willapäyanqa.
4Jatusaq pintiq kurukuna katuyashqantapis akapa pintiq kurukunam ushakurkuyashqa.
Akapa pintiq kurukunapita quedaqninllatapis mallunya kurukunam mikukurkuyashqa.
Tsëpita sobraqninllatapis wisuq kurukunam ushakurkuyashqa.#Deut. 28.38; Joel 2.2-11; Amós 4.9; 7.1.
5Upyallachö kakuq nunakuna, käyikuyë.
Machashqalla purikuq nunakuna, waqakuyë.
Pintiq kurukuna üvasta ushakurkuyashqa kayaptinmi vïnupis kannatsu upuyänëkipaq.
6Yupëtapis mana puëdipaq soldädukunanömi tsë pintiq kurukuna markantsikman chäkarayämushqa.
Colmillu kirunkunapis leonpanöran fïnu këkan.#Apoc. 9.8.
7Llapan üvaskunatapis chakrëpam ushayashqa.
Hïgustapis pasëpam ushakurkuyashqa.
Yurantapis rämankunatapis tullunllatam jaqiriyashqa.
8Imëka casakunanpaq änishqan jövin wanukuptin doncëlla novian lütu ratashta yakakurkur waqashqannö jiktsuyanqëkiyaq waqakuyë.
9Sacerdötikunapis waqakïkäyanmi tsaki mikï ofrendata ni vïnuta Teyta Diospa templunman pipis manana apaptinmi.
10Trïgupis manam kannatsu.
Üvaspa yurankunapis tsakishqam këkäyan.
Olïvu montikunapis ushakashqam këkäyan.
Llapan chakrachöpis pasëpam mana imapis kallantsu.
11Chakrachö uryaqkuna, üvasta cosechaqkuna, makillëkikunata choqpakurkur waqakuyë.
Trïgutapis cebädatapis manakaqllapaqmi muruyarqunki.
12Üvaspa yurankunapis tsakiriyashqanam.
Hïguskunapis ushakäyashqanam.
Granadïllapa, palmërapa, manzänapa montinkunapis y llapan plantakunapis tsakishqanam këkäyan.
Tsëmi alläpa mantsakashqa kayan.#Ose. 4.3; Amós 4.6-9.
13Teyta Diosta altarchö sirwiq sacerdötikuna, lütu ratashta yakakurkur waqakuyë.
Tsaki mikïpis ni vïnupis Teyta Diosnintsikpa wayinman apayämunanpaq manam kannatsu.
14Anciänukunata y llapan nunakunata Teyta Diosnintsikpa wayinman ëllukäyänanpaq qayatsiyë.
Teyta Diosta mañakur llapëki ayunayë.
15¡Allaw noqantsik, Teyta Dios juzganan junaq chëkämunnam!
Tsë junaq chämuptin ¡imanöraq nunakuna jipalläyanqa!
Tsë junaqllam llapanpaq poderyuq Teyta Dios tsëtsika nunakunata ushakätsinqa.#Isa. 13.6; Eze. 30.2-3; Sof. 1.14-18.
16Mikïnintsik ushakäriptin alläpa muchïchönam këkantsik.
Tsëmi Teyta Diosnintsikpa templunman ëwarpis kushikuntsiknatsu.
17Murushqantsik trïgupis manam jeqamushqanatsu.
Mikïkuna churaräkunan wayikunachöpis vientullam purikan.
18Qewata mëchöpis mana tarirmi wäkakunapis pasëpa ankupëpaq waqakïkäyan.
Tsëmi üshakunapis chiwakunapis wanur ushakëkäyan.
19¡Teyta Dios, yanapëkalläyämë!
Jirkachö qewatapis, montitapis y qorakunatapis ninam usharishqa.
20Uranpa ëwaq yakupis tsakirishqam.#Amós 7.4-5.
Chusyaq jirkachö qewakunatapis ninam usharishqa.
Tsëmi jirka animalkunapis rowakur waqapëkäyäshunki.
Currently Selected:
Joel 1: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
