Hageo 2

Mushuq templu kuyëllapaq kananpaq kanqanta willakunqan

1Tsë watallachömi qanchis killa ishkë chunka juk (21) junaqchö#2.1 Calendariuntsikchöqa tsë junaq 17 de octubri wata 520 a. C. karqan. profëta Hageuta Teyta Dios kënö nirqan: 2<<Judápa gobernadornin Zorobabelta, sumo sacerdöti Josuéta y wakin nunakunatapis kënö ninki:#Esd. 3.1-2. 3<Punta kaq templuta rikaqkuna musyayanmi kuyëllapaq kashqanta. Kananqa ¿imanötaq këkan? ¿Manaku manakaqpaq churashqa këkan?>#Esd. 3.12.

4<<Teyta Diosmi kënö nin: <¡Kallpata tsari, Zorobabel! Sumo sacerdöti Josué, ¡qampis kallpata tsari! Kë nacionchö täraqkuna, ¡llapëki kallpatsanakuyë! Qamkunawan këkaptïqa kallpatsanakur llapëki uryayë. 5Unë castëkikuna Egiptupita yarqayämuptinmi imëpis yanapanäpaq pëkunawan pactuta rurarqü.#Éxo. 29.45-46. Tsëmi qamkunawanpis Espïritü këkan. Tsënö qamkunawan këkaptïqa ama mantsakuyëtsu.

6<< <Ichikllanam pishin ciëluta, patsata y lamartapis karkaryäratsinäpaq.#Heb. 12.26. 7Tsënöllam llapan nacionkunatapis karkaryätsishaq. Tsënö ruraptïmi imëka riquëzankunatapis kë templuman apayämunqa. Tsënöpam kë templu kuyëllapaq kaqkunawan juntashqa kanqa. Noqa llapanta mandaq Teyta Diosmi tsënö nï.

8<< <Noqapam qellëpis, qoripis këkan. 9Kanan shärikätsiyashqëki templuqa punta kaq templupitapis mas kuyëllapaqmi kanqa. Tsëmi këchö llapëkipis yamë kawakuyanki. Noqa llapanta mandaq Teyta Diosmi tsënö nï> >>.

10Ishkë wata rey Darío mandakuq këkaptinmi isqun killa ishkë chunka chusku (24) junaqchö#2.10 Calendariuntsikchöqa tsë junaq 18 de diciembri wata 520 a. C. karqan. profëta Hageo Teyta Diospa willakïninta kënö nir willakurqan: 11<<Llapanta mandaq Teyta Diosmi nin: <Leynïkunapita sacerdötikunata tapur kënö ninki: 12<<Pipis sacrificiuta kayananpaq sagrädu ëtsata ratashninwan wankushqa apaptin tsë ratashninpa kuchun vïnuta o aceitita o ima mikïtapis tenqiptin#2.12 Wakin nunakunaqa topaptin niyanmi. ¿tsë vïnu, aceiti o ima mikïpis sagrädutsuraq kanqa?>> > >>

Tsënö tapukuptin sacerdötikuna <<manam>> niyarqam.

13Tsënam Hageo yapë tapurqan kënö nir: <<Juk nuna ayata yatashqanpita impüruyärir#Núm. 19.11-13. mikïkunata yataptin ¿tsë mikïkunapis impürutsuraq kanqa?>>

Tsënö tapukuptinmi sacerdötikuna kënö niyarqan: <<Awmi, impürum kanqa>>.

14Tsëmi Hageo kënö nirqan: <<Teyta Diosmi kënö nin: <Tsënömi kë nunakunapis impüru këkäyan. Tsënöpam llapan rurayashqankuna y noqapaq apayämushqanpis impüru këkan.

15<< <Templüta sharkatsita manaraq qallarnin kananpita ima pasayäshunqëkitapis shumaq yarpakachäyë. 16Ishkë chunka (20) säcu mikïta ëlluyänëkipaq mururpis cosëchachöqa chunka säcullatam ëlluyarqëki. Pitsqa chunka (50) kuntu vïnuta jorqïta yarparpis ishkë chunka (20) kuntullatam jorquyarqëki. 17Usyawan, ranchawan y runtu tamyawanmi llapan murukuyashqëkitapis ushakätsirqü. Tsënö rurëkaptïpis qamkunaqa manam templüta sharkatsiyarqunkitsu.

18<< <Kanan këkantsik isqun killa ishkë chunka chusku (24) junaqchömi. Kanan junaqmi templupa cimientunkunata altsëta qallëkuyarqunki. 19Tsëmi kananpita bendicionnïta llapan uryayashqëkiman churamushaq. Tsënö churamuptïmi churakuyänëkikunachö mikïkuna ushakanqatsu y üvasniki, hïgusniki, granadïllëki y olïvusnikipis shumaqmi wayunqa> >>.

Zorobabelpaq Teyta Dios ninqan

20Tsë junaqllam Hageuta Teyta Dios yapë kënö nirqan: 21<<Judápa gobernadornin Zorobabelta willë ciëluta y patsata karkaryätsimunäpaq kashqanta. 22Reykunatam manakaqpaq churashaq. Puëdiq nacionkunatapis vencishqa kayänanpaqmi permitishaq. Guërra carrëtankunatapis manijaqnintinmi ushakätsishaq. Cawallun montashqa ëwaqkunapis kikinpuram wanutsinakuyanqa. 23Salatielpa tsurin sirwimaqnï Zorobabel, tsë junaqmi sellakunä sortïjänö kanëkipaq churashqëki.#2.23 Sortïjänö kanëkipaq churashqëki nishqanqa noqapa shutïchömi mandakunki ninanmi. Tsënö kanëkipaqmi qamta akrarquq. Noqa llapanta mandaq Teyta Diosmi tsënö nï>>.

Currently Selected:

Hageo 2: qwhB

Highlight

Copy

Compare