Gálatas 5

Llutan yachatsikuqkunata mana chaskipäyänanpaq ninqan

1Jesucristo libramashqam Moisés qellqashqan leykunapa munëninchö kashqantsikpita librina këkantsik.#Juan 8.32-36. Tsënö këkaptinqa tsë leykunata cumpliyänëkipaq obligayäshuptiki ama cäsuyëtsu. 2Noqa kënömi niyaq: Señalakuyaptikiraq Teyta Dios salvayäshushqëkita yarpäyaptikiqa Jesucristuman markäkuyashqëkipis manakaqllapaqmi kanqa. 3Yapëpis kënömi niyaq: Pipis señalakuq kaqqa Moisés qellqashqan leykunata llapantam cumplinman. 4Tsë leykunata cäsur pipis salvakïta munaqqa Jesucristupitapis y Teyta Diospa kuyakïninpitapis witikuriyashqam.

5Noqantsikqa Espíritu Santu käyitsimashqam musyantsik Jesucristuman markäkurnin salvakunantsikpaq kashqanta. 6Jesucristuta chaskikushqana këkashqaqa manam señalashqa kanqantsiktsu ni mana señalashqa kashqantsiktsu precisan, sinöqa pëman markäkur kuyanakurnin kawashqantsikmi precisan.

7Jesucristuman markäkur allim këkäyarqëki. ¿Pitaq engañayäshurqunki rasunpa kaq willakïta mana cäsuyänëkipaq? 8Pëkuna yachatsikuyashqanqa manam qayamaqnintsik Teyta Diospitatsu këkan. 9Tsë llutan yachatsikïqa ichiklla levadüra atska masata jakatsishqannömi këkan.#1Cor. 5.6. 10Teyta Diostam mañakïkä tsë llutan yachatsikuqkunata manana chaskiyänëkipaq. Tsë nunakunataqa pï kayaptinpis Teyta Diosmi juzganqa.

11Wawqikuna y panikuna, señalakuyänanpaq yachatsiptïqa pipis manam chikimar qatikachëkäyämanmantsu ni Jesucristo noqantsik rëkur cruzchö wanushqanta willakushqäpita chikiyämanmantsu. 12<<Señalakurninran salvakuyanki>> nir yachatsiyäshuqnikikunaqa paqwë kutanpitapis compañonninkunata roquriyätsun.

Espíritu Santupa poderninchö kawanantsikpaq yachatsinqan

13Wawqikuna y panikuna, Teyta Dios qayayäshurqunki librina kayänëkipaqmi. Tsënö kaptinpis <<librinam kä>> nir ama jutsata rurakïkäyëtsu, sinöqa jukniki juknikipis kuyanakur yanapanakuyë.#Mat. 20.26. 14Diospa leyninchö kënömi nikan: <<Kikiki kuyakushqëkinö nuna mayikitapis kuyanki>>.

Tsënö nishqanta cumplirqa llapan leyninkunatam cumplikäyanki.#Lev. 19.18; Mat. 22.39; Mar. 12.31; Rom. 13.8-10; Stg. 2.8. 15Tsënö këkaptin paqtam chikinakuyankiman. Chikinakurqa llakitsinakurmi qarqunakuyanki.

16Tsëmi niyaq: Espíritu Santu käyitsiyäshushqëkinölla kawakuyë. Tsënö kawarqa manam shonqïkikuna munashqannö jutsata rurayankitsu.#5.16 Wakin castellänu traduccionkunachömi nin: Espíritu Santu käyitsiyäshushqëkinölla kawakuyë. Shonqïkikuna llutanta yarpashqanta ama rurayëtsu. 17Llutan yarpëkunaqa Espíritu Santupa contranmi y Espíritu Santunam llutan rurëkunapa contran. Tsëmi ishkan contranakuyaptin alli rurëta munarpis puëdiyankitsu.#Rom. 7.15-23. 18Espíritu Santu käyitsiyäshushqëkita cäsukurqa manam leykunapa munëninchönatsu këkäyanki.#Rom. 7.5, 8.

19Llutan yarpëkunata ruraqkunaqa casakushqa këkarmi [jukwan jukwan purikuyan,] fornicación jutsata rurayan, melanëpaq kaqkunata rurayan, achachapäkurmi penqakïpaq jutsata rurayan, 20ïdulukunatam adorayan, nuna mayintam brüjatsiyan, nuna mayintam chikiyan, liryakuyan, cëlanakuyan, imallapitapis piñakuyan, qayapänakuyan, qarqunakuyan, sientitsinakuyan, 21imbidiösu kayan, [nuna mayinta wanutsiyan,] machakïllachö kakuyan, macharkur llutankunata rurayan y tsënöllam ima jutsatapis masta rurayan. Nöpata nishqänöllam kananpis niyaq: Tsënö kawaqkunaqa Teyta Diospa mandakïninman manam chäyanqatsu.

22Espíritu Santupa poderninchö kawarmi kuyanakuntsik, kushikuntsik, alli pasakïchö kawantsik, pacienciakuntsik, qollmi shonqu kantsik, yanapakuq kantsik, änikushqantsikta cumplintsik, 23manshu nuna kantsik y allillata ruranantsikpaq käyikuntsik. Tsënö kawarqa manam ima leytapis manakaqpaq churëkantsiktsu.

24Jesucristupana karmi unë kawënintsiktaqa cruzchö wanuratsishqana këkantsik.#Mar. 8.34; Rom. 6.3-14; Gál. 2.20; 6.14. Tsëmi jutsa rurëkuna yarpënintsikman shamuptinpis cäsuntsiknatsu. 25Espíritu Santupa munëninchö këkarqa pë käyitsimashqantsiknö kawakushun. 26Tsënö kawarqa pitapis piñatsir ama nuna tukur imbidiösu kashuntsu.

Currently Selected:

Gálatas 5: qwhB

Highlight

Copy

Compare