Gálatas 2

Jerusalénchö apostolkuna Pabluta chaskiyanqan

1Tsëpita chunka chusku watataran Tituta pusharkur Bernabéwan#Hech. 11.29-30; 15.2. Jerusalénman kutirqä. 2Tsëman kutirqä ëwanäpaq revelacionchö Teyta Dios käyitsimashqa kaptinmi. Jerusalénchö këkaq apostolkunawan kikïkunalla ëllukarmi mana Israel nunakunata imata yachatsishqätapis willarqä. Llutanta yachatsishqäta yarpäyaptinqa jiparkuryan willakushqäpis manakaqllapaqmi kanman karqan. 3Willakushqäta käyitsiptïmi alli kashqanta niyämarqan. Tsëmi mana Israel nuna këkaptinpis Tito señalakunanpaq obligayarqantsu.

4Willakushqä alli kashqanta niyaptinpis juk ishkaq nunakunam markäkuq tukur wawqikunata y panikunata yachatsiyarqan Moisés qellqashqan leykunata cumpliyänanpaq. Tsënö yachatsiyaptinpis Jesucristuta chaskikushqana këkarqa manam tsë leykunata cumplinantsikpaqnatsu këkantsik. Pëkuna niyashqanta chaskikurqa manam libriraqtsu këkantsik, sinöqa tsë leykunapa poderninchö kar esclävunöllam këkantsik. 5Noqakunaqa tsë llutan yachatsikïkunata manam chaskiyarqätsu. Chaskiyaptïqa qamkunapis chaskiyankimanmi karqan.

6Jerusalénchö apostolkunaqa willakuptï manam michäyämarqantsu (Jesucristuwan juntu purishqa kayaptinpis Teyta Diospaqqa llapantsikpis iwalmi këkantsik),#Deut. 10.17. 7sinöqa cuentatam qokuriyarqan Israel nunakunata willapänanpaq Pedruta churashqannölla mana Israel kaq nunakunata willapänäpaq noqatapis Teyta Dios churamashqanta. 8Israel nunakunapa apostolnin kananpaq Pedruta Teyta Dios churashqannömi mana Israel kaq nunakunapa apostolnin kanäpaq noqatapis churamashqa.

9Tsëmi Santiago, Pedro y Juanpis käyiyarqan willakïninta willakur purinäpaq Teyta Dios churamashqanta. (Pëkunapaqqa iglesiachö columna kayashqantam niyan.) Tsëpitanam pëkuna niyämarqan: <<Bernabéwan qam ëwayë mana Israel nunakunaman y noqakunana Israel nunakunaman ëwayäshaq>>.

Tsënö parlariyaptïmi waqupärayämarqan. 10Tsënöllam niyämarqan waktsa wawqikunata y panikunata mana qonqëta yanapayänäpaq. Tsëtaqa imëpis rurëkämi.#Hech. 11.29-30; 24.17.

Pedruta Pablo piñapanqan

11Tsëpitanam Antioquíaman Pedro chämur mana allita ruraptin piñaparqä. 12Puntataqa mana Israel wawqikunawan y panikunawan ëllukarmi mikuq.#Hech. 11.2. Tsënö kaptinpis Santiaguwan puriq nunakuna chäyämuptinqa penqapäyänanta mantsakurmi mana Israel kaqkunawan juntakarqannatsu. 13Pedruta rikëkurmi wakin wawqikuna y panikunapis y Bernabépis mana Israel kaqkunawan mikuyänanpaq juntakäyarqannatsu.

14Tsënö rurashqan mana alli kaptinmi wawqikunapa y panikunapa nöpanchö Pedruta piñapar nirqä: <<Kikikipis mana Israel nunanö Moisés qellqashqan leykunata mana cumplikarqa ¿imanirtaq munëkanki mana Israel kaqkuna tsë leykunataraq cumpliyänanta? 15Noqantsikqa manam mana Israel nunatsu kantsik, sinöqa yurikushqantsikpita patsam Israel nuna kantsik. 16Musyantsikmi Teyta Dios imanö perdonamashqantsikta. Manam Moisés qellqanqan leykunata cumplishqatsu perdonamantsik,#Sal. 143.2; Rom. 3.20. sinöqa Jesucristuman markäkushqam. Tsëmi Jesucristuman markäkïkantsik Teyta Dios perdonamänantsikpaq.#Rom. 3.22. Tsë leykunata cumplishqanpitaqa manam pitapis Teyta Dios salvantsu>>.

17Moisés qellqanqan leykunaman markäkunantsikpa rantin Jesucristuman markäkushqam wakin nunakuna yarpäyan jutsata rurashqantsikta. ¿Pëkuna yarpäyashqannötsuraq Jesucristo jutsata rurëkätsimantsik? ¡Manam! 18Sinöqa jutsayuq tikrarintsik Moisés qellqashqan leykunaman yapë markäkurmi. 19Moisés qellqashqan leykunapa poderninchö karmi tsë leykunapaq wanushqanöna rikakurqä.#Rom. 7.4. Kananqa librinam këkä#Gál. 3.19, 24. Teyta Dios munashqannö kawanäpaq. 20Noqaqa Jesucristuwan cruzchö wanushqanömi këkä.#Rom. 6.6-8; Gál. 5.24; 6.14; Col. 2.20. Manam noqanatsu kawä, sinöqa Jesucristunam noqachö kawan. Tsëmi Teyta Diospa Tsurinman markäkur kawëkä.#Fil. 1.21. Pëmi kuyamarnintsik noqantsik rëkur wanurqan.

21Manam Teyta Dios ankupämashqantsikta manakaqmantsu churëkä. Wakin nunakuna niyashqannö leyninkunata cäsukushqaraq Teyta Dios salvamashqaqa Jesucristo wanushqanpis manakaqllapaqmi kanman karqan.

Currently Selected:

Gálatas 2: qwhB

Highlight

Copy

Compare