Éxodo 30

Inciensu sawmana altarta ruratsinanpaq käyitsinqan

Éxodo 37.25-28

1<<Inciensuwan sawmayänëkipaq altarta acacia qerupita ruratsinki. 2Tsë altarpa largunpis anchunpis chusku chunka pitsqa (45) centïmetrum kanqa. Altunnam kanqa isqun chunka (90) centïmetru. Chuskun kuchunkunachö altarwan juk piëzalla kananpaq waqratanö ruratsinki. 3Tsë altarta jananpapis, lädunkunapapis y waqrankunatapis qoriwan laqatsinki. Tsënöllam qoripita rebëtita ruraratsir tumariq churatsinki. 4Tsë rebëti chakinpana cada esquïnanman qoripita argöllakunata churatsinki. Tsë argöllakunapa mantëkunata pasatsiyanqa altarta puritsiyänanpaq. 5Tsë mantëkunata acacia qerupita rurarkatsir qoriwan laqatsinki. 6Tsëpitana tsë altarta Pactu Baúlta tsapaq cortïna waqtanman churanki. Tsë baúlpa tsapanan kaqchömi qamwan tinkushun.

7<<Cada qoyam candelabruta alistarkur Aarónqa tsë altarchö inciensuwan sawmar pukutätsinqa. 8Tsënöllam cada tardipis candelabruta tsaritsinqan höra tsë altarchö yapë inciensuwan sawmanqa. Aarón, tsurinkuna y pëkunapita miraqkunapis nöpächö imëpis tsënö rurayätsun. 9Tsë inciensuwan qoyätsina altarchöqa ama lluta inciensuwanqa qoyätsinkitsu.#Éxo. 30.34-38. Tsë altarchöqa ama kayana sacrificiuta ni tsaki mikï ofrendakunatapis kayankitsu. Vïnutapis ama tsëmanqa jichankitsu.

10<<Purificätsina sacrificiuta kayar watachö juk kutillam wätapa yawarninta altarpa waqrankunaman Aarón llushinqa. Tsë altar sagrädu kaptinmi purificätsina sacrificiuta cada wata imëyaqpis tsënö kayayanqa>>.

Sagrädu Toldupa gastunkunapaq qellëta ëlluyanqan

11Jina kënömi Moisésta Teyta Dios nirqan: 12<<Israel nunakunata censaptikim noqa Teyta Diospaq juknin jukninpis ofrendata apayämunqa. Tsënöpam censu asuntu ni ima qeshyawan ushakäyanqatsu. 13Llapan censashqa kaqkunam noqa Teyta Diospaq pullan siclo#30.13 Juk siclo qellëqa juk killa uryar gananqannömi karqan. qellëta apayämunqa. Ofrendayanqan qellëkunataqa Tinkuna Tolduchö këkaq pësakunawanmi pesayanqa. Tsë pësakunawan pesayaptinmi juk siclo qellë chunka juk grämu kanqa. 14Ishkë chunka (20) watayuq witsëpa censashqa kaqkunaqa llapanmi noqa Teyta Diospaq ofrendata apayämunqa. 15Mana ushakäyänanpaq ofrendata apamurqa rïcu karpis manam masta apamunmantsu ni waktsa karpis mënustaqa apamunmantsu. Tsëpa rantinqa llapanpis iwalllam pullan siclo qellëta apayämunqa. 16Tsë qellëta Israel nunakunapita chaskirqa churanki Tinkunantsik Toldupa gastunkunapaq. Tsënöpam censakuyanqëkipita ushakätsiyashqëkitsu>>.

Broncipita lavatoriuta ruratsinanpaq käyitsinqan

Éxodo 38.8

17Jina kënömi Moisésta Teyta Dios nirqan: 18<<Paqakuyänanpaq lavatoriutapis täkuyänantawan broncipita ruratsinki.#Éxo. 38.8. Tsë lavatoriuta Tinkunantsik Toldupita altarman ëwana chöpinman tëkatsir yakuta winatsinki. 19Tsë lavatoriupita yakuta jorqarirmi Aarónwan tsurinkunaqa makinkunatawan chakinkunata paqakuyanqa. 20Tinkunantsik Tolduman manaraq yëkurmi paqakuyanqa mana wanuyänanpaq. Tsënöllam paqakuyanqa altarchö noqapaq sacrificiuta manaraq kayar. 21Makinkunata chakinkunata mana paqakurqa wanuyanqam. Tsë ninqaqkunaqa imëyaqpis leymi kanqa Aarónpaq, tsurinkunapaq y pëpa mirëninkunapaqpis>>.

Sagrädu aceitita ruratsinanpaq käyitsinqan

Éxodo 37.29

22Jina kënömi Moisésta Teyta Dios nirqan: 23<<Juntanki joqta kïluta mïrra montipa weqinta, kima kïlu canëlata, kima kïlu pukutaq cäñata 24y joqta kïlu casia montipa qarantapis. Tsëkunata pesanki Tinkunantsik Sagrädu Tolduchö këkaq pësakunawan. Nïkur kima litru pullanta olïvupita rurashqa aceitita alistanki. 25Tsë llapan ëllunqëkitam takunki perfümita ruraqkuna takuyanqannö. Tsëqa kanqa sagrädu aceitim. 26Tsë aceitita Tinkunantsik Tolduman y Pactu Baúlman jichanki. 27Tsënölla jichanki mësaman y inshinankunaman, candelabruman y inshinankunaman y inciensuwan sawmana altarman. 28Tsënölla jichanki sacrificiuta kayana altarman y inshinankunaman y lavatoriuman y täkuyänanman. 29Tsënö jichaptikim llapanpis sagrädu kanqa. Tsëkunata tenqiriqpis#30.29 Wakin nunakunaqa topariqpis niyanmi. sagrädum tikrarinqa.

30<<Sirwimaq sacerdötïkuna kayänanpaq tsë aceitita Aarónpa y tsurinkunapa jananmanpis jichapunki. 31Israel nunakunata ninki: <Kë sagrädu aceitita imëpis rurayanki imamanpis jichaptin sagräduna kananpaq. 32Ama pikunamanpis llutallaqa tsë aceitita jichayankitsu. Llutalla jichakuyänëkipaqqa tsë sagrädu aceititanö ama rurayankitsu. 33Pitapis tsë aceititanö ruraq kaqtaqa o pitapis llutalla jukman jichaq kaqtaqa Israel nunakunapita qarquyanki> >>.

Inciensuta ruratsinanpaq käyitsinqan

Éxodo 37.29

34 Teyta Dios yapëmi Moisésta nirqan: <<Juntanki estacte montipa weqinta, lamarchö caracolpa qaranta, gálbano montipa weqinta y inciensu montipa weqintapis. Tsë llapanta iwalllata juntanki. 35Tsë llapan juntanqëkiwan pukutaq inciensuta ruranki. Perfümita ruraqkuna takunqannö llapanta shumaq takunki. Tsëmanqa imatapis mastaqa ama takunkitsu. Tsë inciensu alläpa sagrädum kanqa. 36Pullanta shumaq qochqu aqarir Tinkunantsik Tolduman apar Pactu Baúlpa nöpanman churanki. Tsë inciensuqa sagrädum kanqa. 37Tsë inciensutanöqa ama ni pipis ruratsuntsu. Sagrädu karmi noqallapaq kanqa. 38Pitapis pukutänanpaq tsë inciensutanö ruraptinqa Israel nunakunapita qarquyanki>>.

Currently Selected:

Éxodo 30: qwhB

Highlight

Copy

Compare