Éxodo 25

Sagrädu Tolduta rurayänanpaq y ofrendata ëlluyänanpaq käyitsinqan

Éxodo 35.4-9

1Sinaí jirkachö këkaptinmi Moisésta Teyta Dios nirqan: 2<<Israel nunakunata ninki ofrendata noqapaq apayämunanpaq. Ofrendata apamïta munaqkunaqa llapan shonqunwan apayämutsun 3qorita, qellëta, broncita, 4azul, granäti y puka millwa jïlukunata, llanulla putskashqa lïnu jïluta, chiwapa aqtsanpita putskashqa jïlutapis. 5Jina apayämutsun pukaman tiñishqa üsha pergashta, fïnu qarakunata, acacia qeruta, 6candelabru rawrananpaq aceitita, sagrädu aceitimanpis inciensumanpis takutsiyänanpaq pukutaqkunata,#Éxo. 30.23-25. 7ónice rumikunata y wakin kuyëllapaq rumikunatapis. Tsë rumikunaqa kayanqa sumo sacerdötipa efodnintawan pechëranta#Éxo. 28.6-30. adornayänanpaqmi.

8<<Tsë ofrendata apayämunqankunawan Sagrädu Tolduta ruratsinki. Tsënöpam pëkuna täkuyanqanchö imëpis täräshaq. 9Tsë täränäpaq Sagrädu Toldutapis inshinankunatapis llapanta ruratsinki rikätsinaqpaq kaqtanölla.

Pactu Baúlta ruratsinanpaq käyitsinqan

Éxodo 37.1-9

10<<Acacia qerupita ruratsinki juk baúlta. Tsë baúlpa largunmi kanqa juk metru chunka centïmetru. Anchunpis altunpis kanqa joqta chunka pitsqa (65) centïmetru. 11Jananpa y rurinpa qori püruwan laqatsinki. Tsënölla llapan kuchunpa qoripita rebëtita rurarir tumariq churatsinki. 12Qoripita chusku argöllata rurarkatsir churatsinki chuskun chakinkunaman, ishkëta baúlpa juk kaq lädunman y ishkëtana baúlpa juknin kaq lädunman. 13Acacia qerupita ishkë mantëkunata alistatsinki. Tsë mantëkunatapis qoriwan laqatsinki. 14Nïkur tsë mantëkunata argöllakunapa uchkunpa pasatsinki baúlta puritsiyänanpaq. 15Tsë mantëkunata patsätsinqëkiqa jinanllachöna kakunqa. Tsëpitaqa ama jorqutsinkinatsu. 16Tsë baúlman churanki pactu rurashqantsikta cumpliyänëkipa kaq mandamientukunata.

17<<Baúlpa tsapananta qori fïnupita ruratsinki. Largunam kanqa juk metru chunka centïmetru y anchunam kanqa joqta chunka pitsqa (65) centïmetru. 18Tsënölla martilluwan tsaktëllapa ishkë querubinkunata qoripita ruratsinki. Nïkurna baúlpa tsapanan ishkan kuchunkunaman shätsinki. 19Tsapanantawan querubinkunataqa ruratsinki juk piëzallata. Juk kaq querubín kanqa itsuq kaq lädunchö y juk kaqna kanqa allawka kaq lädunchö. 20Tsë ishkan querubinkunam sipsankuna#25.20 Wakin nunakunaqa älankuna niyanmi. kichashqa frenti frenti baúlpa tsapananta rikaräyanqa. Tsënöpam ishkankunapa sipsankuna baúlpa tsapananta tsaparäyanqa. 21Tsë baúlpa rurinman pactu rurashqantsik mandamientukunata churëkur tsapananwan tsaparkunki. 22Pactu Baúlpa tsapanan jananchö ishkë querubinkuna chöpinpitam willashqëki Israel nunakunata imata ninëkipaq kaqtapis.

Tanta churakuna mësata ruratsinanpaq käyitsinqan

Éxodo 37.10-16

23<<Tsënölla acacia qerupita mësata ruratsinki. Tsë mësapa largunmi kanqa isqun chunka (90) centïmetru. Anchunnam kanqa chusku chunka pitsqa (45) centïmetru y altunnam kanqa joqta chunka pitsqa (65) centïmetru. 24Tsë mësapa jananta, rurinta y chakinkunatapis qoriwan llapanta laqatsinki. Kuchunkunapapis qoripita rurashqa rebëtita tumariq churatsinki. 25Tsënöllam qanchis centïmetru anchuta listonta tumariq churatsinki. Tsë jananmannam qoripita rurashqa juk rebëtita churatsinki. 26Tsënölla chusku argöllakunata qoripita ruraratsir mësapa chuskun chakinkunaman churatsinki. 27Tsë argöllakuna churarätsun chakinpita rebëtinman tinkuraqchö. Tsë argöllakunapa ishkë mantëkuna pasatsun mësata puritsiyänanpaq. 28Mësata puritsikuyänan mantëkunatapis acacia qerupita rurarkatsir qoriwan laqatsinki.

29<<Tsë mësapaq qori pürupita ruratsinki plätukunata, wishllakunata, järrakunata y puyñukunata. Tsë järrakuna y puyñukunaqa vïnuta altarman winayänanpaqmi kanqa. 30Nöpächö kananpaq tsë mësaman tantata imëpis churatsinki.#Lev. 24.5-8.

Candelabruta ruratsinanpaq käyitsinqan

Éxodo 37.17-24

31<<Tsënölla candelabruta qori pürupita martilluwan tsaktëllapa ruratsinki. Tsë candelabrupa täkunan, chakin, cöpankuna y wëtankunapis juk piëzalla kayätsun. 32Tsë candelabruqa joqta rikrayuqmi kanqa. Kima rikranmi juk kaq lädunpa y kima kaqnam juk kaq lädunpa kanqa. 33Cada rikrakunachö kima wëtakunata ruratsinki. Tsë wëtakuna kayätsun almendrupa wëtannö. 34Candelabrupa chakinchöpis katsun chusku wëtankuna. Tsë wëtakunapis kayätsun almendrupa wëtannö. 35Cada rikran tinkuraqchö katsun juk wëta. 36Wëtankuna y rikrankunapis juk piëzalla katsun. Llapanpis qori pürullapita martilluwan tsaktëllapa rurashqa katsun.

37<<Candelabrupa qanchis mechërunkuna ruratsinki. Tsë mechërukunata candelabrupa puntankunaman juktayan churatsinki nöpanman atsikyänanpaq.#25.37 Nöpanman atsikyarqa qori mësachö këkaq chunka ishkë tantakunamanmi atsikyarqan. Tsëta musyanëkipaq leyinki Éxo. 40.22, 24. 38Mëchapa qetyanta limpiayänanpaq taksha alicätikunapis y uchpan juntakunan taksha plätukunapis katsun qori pürupita. 39Tsë candelabruta y llapan inshinankunata ruratsinki kima chunka kima (33) kïlu qoripita.

40<<Llapanta ruratsinki kë jirkachö rikätsishqaqtanölla.#Hech. 7.44; Heb. 8.5.

Currently Selected:

Éxodo 25: qwhB

Highlight

Copy

Compare