Éxodo 15

Salvanqanpita Israel nunakuna Teyta Diosta alabayanqan

1Tsënam Moisésqa llapan Israel nunakunawan Teyta Diosta kënö alabayarqan#Apoc. 15.3.:

Teyta Diostam alabashaq.

Pëmi Egipto nunakunata, cawallunkunata y montaraqninkunatapis poderninwan lamarchö ushakätsishqa.

Tsëta musyarmi llapanpis käyikuyanqa poderyuq kanqanta.

2 Teyta Diosmi imëpis kallpatsaman.

Pëtam imëpis alabä.#Éxo. 14.13-14; Sal. 118.14; Isa. 12.2.

Diosnï kaptinmi alabashaq.

Pëmi awilükunapa Diosnin.

Imëpis pëllatam adorashaq.

3 Teyta Diosqa poderyuq soldädum.#Sal. 24.8.

Pëpa shutinqa Yahwehmi.

4 Teyta Diosmi Faraónpa soldädunkunata carrëtantawan lamarman jitarkushqa.

Allinnin kaq capitankunatapis Puka Lamarchömi shenqakëpa wanutsishqa.

5Lamar rurimanmi tullpukäyashqa.

Ruminöran ruriyaq hundikäyashqa.

6 Teyta Dios, puëdiq karmi allawka kaq makikiwan chikimaqnïkunata ushakätsirqunki.

7Alläpa poderyuq karmi contrëkikunata ushakätsirqunki.

Alläpa piñakuptikim tsaki oqsha rupaqnöraq pëkuna ushakäyashqa.

8Piñashqa pükëkuptikim ishkëman yaku rakikashqa.

Yaku laqchiqsarpis perqanöran shärirqan.

Lamar rurinchöpis yaku jinanchömi quedarishqa.

9Chikimaq nunakunam niyarqan:

<<Taripäyanqäyaqmi qatiyäshaq.

Imëkantapis qochirirmi rakinakuyäshaq.

Tsënö rurarirpis alläpam kushikuyäshaq.

Espädäwanmi wanutsiyäshaq>>.

10Tsënö niqkunata pükëkuptikim lamar ñoqtakurkushqa.

Bunyëpa bunyëkaq yaku rurinmanmi plömunöraq jeqakurkuyashqa.

11 Teyta Dios, qamnöqa ima diospis manam kantsu.

Qamnöqa manam pipis santu kantsu.

Espantëpaq kaqkunatam rurarqunki.

12Podernikiwan castigaptikim Egipto nunakunata patsa ñoqtarishqa.

13Salvanqëki nunakunataqa ankupashllapam pushëkanki.

Podernikiwanmi apëkanki täranqëki sagrädu wayikiman.

14Tsëta wiyarmi mëtsë nacionchö täraq nunakuna mantsakar tsuktsukyäyanqa.

Filisteo nunakunapis#Gén. 21.32-34; Éxo. 13.17. mantsakarmi karkaryäyanqa.

15Edomchö täraq capitankunapis mantsakëwanmi imanö këtapis puëdiyanqatsu.

Moabchö täraq mandakuqkunapis mantsakëwanmi tsuktsukyäyanqa.

Canaánchö täraq nunakunapis ima rurëtapis manam valorayanqatsu.

16Pëkuna alläpa mantsakäyätsun.

Imatapis rurëta mana puëdir mantsakashqa quedariyätsun.

Tsënö kayätsun salvanqëki nunakuna pasayanqanyaq.

17 Teyta Dios, täränëkipaq akrashqëyki jirkaman pushakalläyämë.

Tsëchö täränëkipaq kikikim alistarqunki.

18 Teyta Diosmi imëyaqpis rey këkan.

María qotsunqan

19Carrëtankunawan cawallunkunawan lamar chöpinpa Faraón shamïkäyaptinmi lamar yakuta kanqanman kutitsir Teyta Dios llapanta tsaparkurqan. Israel nunakunaqa tsakillatam pasayarqan. 20Tsëpitanam Aarónpa panin profetïsa María tinyanta tocar qallëkurqan. Tsëmi llapan warmikunapis panderëtankunata tocar kushishqa pëwan juntu tushullapa ëwayarqan. 21Tsëchömi María qotsurqan:

<<Teyta Diosta alabashun.

Pëqa llapantapis mantsakëpaqmi ushakätsishqa.

Cawallunkunatapis montaraqnintinmi lamarmanmi jitarkushqa>>.

Marachö asqaq yaku kanqan

22Tsëpitanam Moisés Israel nunakunata pusharqan Puka Lamarpita Shur ninqan chusyaq jirkamanpa ewkuyänanpaq. Kima junaq ëwarpis yakuta manam tariyarqantsu. 23Mara partiman chëkur yakuta tarirpis asqaq kaptinmi upïtapis munayarqantsu. Yaku asqanqanpitam tsë partipa shutin churayarqan Mara#15.23 Mara ninanqa asqaq ninanmi. nir.

24Tsënam nunakunaqa piñarnin Moiséspa contran shärir niyarqan: <<Kananqa ¿ima yakutataq upuyäshaq?>>

25Tsënam Moisésqa Teyta Diosta mañakurqan yanapananpaq. Mañakuptinmi Teyta Dios rikätsirqan montita. Tsë montipa rämanta yakuman jitarkuptinmi asqarqannatsu.

Israel nunakunata tsënö probarkurmi leykunata y estatütukunata käyitsir 26Teyta Dios kënö nirqan: <<Ninqäkunata cäsuyämaptiki, munanqänö kawayaptiki, mandamientükunata cäsukur llapan estatütükunatapis cumpliyaptikiqa Egipto nunakunata castigashqänöqa manam qeshyawan castigayashqëkitsu. Noqam qamkunata kachakätsiq Teyta Dios kä>>.

27Tsëpita ewkurnam Israel nunakuna chäyarqan Elim partiman. Tsëchö karqan chunka ishkë pukyukunam y qanchis chunka (70) palmërakunam. Tsë pukyukuna lädunchömi toldunkunata patsätsiyarqan quedakuyänanpaq.

Currently Selected:

Éxodo 15: qwhB

Highlight

Copy

Compare