Hechos 20

Macedoniaman y Acayaman Pablo ëwanqan

1Tsëpitanam discïpulukunata qayëkatsir Teyta Dios munashqannö imëpis kawayänanpaq Pablo kallpatsarqan. Despidikurirnam Macedonia provinciapana ewkurqan. 2Tsë provinciachö markan markan purirmi Jesucristuman markäkuqkunata kallpatsarqan.

Tsëpitanam Greciaman#20.2 Greciapaq parlarqa Acaya provinciapaqmi parlëkan. Acaya provinciachömi Corinto marka karqan. chärir 3kima killa tsëchö täkurqan. Tsëpita Siriaman barcuwan kutikunanpaqna këkarmi mäkurqan Israel nunakuna pëta wanutsiyänanpaq parlayashqanta. Tsëmi barcuwan ëwananpa rantin chakillapana Macedonia provinciapa pasarqan. 4Pëta yanaqarmi ëwayarqan Pirrupa tsurin Sópater, Aristarco, Segundu, Gayo, Timoteo, Tíquico y Trófimupis. Sópaterqa Berea markapitam karqan. Aristarcuwan Segunduqa Tesalónica markapitam kayarqan. Gayuqa Derbe markapitam karqan. Timoteo, Tíquico y Trófimunam Asia provinciapita kayarqan. 5Pëkuna puntarmi Troas markachö shuyäyämarqan.#20.5 Kë libruta qellqaq Lucaspis Pabluwanmi purirqan. 6Levadürannaq Tanta Mikuna fiesta pasariptinmi Filipuspita barcuwan yarquyarqä. Pitsqa junaqta Troasman chärirmi nöpaqkunata taripëkur juk semäna tsëchö kayarqä.

Euticuta Pablo kawaritsimunqan

7Domingu junaqmi wawqikunawan y panikunawan ëllukäyarqä Santa Cënata mikuyänäpaq. Waränin qoya ewkunan kaptinmi pullan paqasyaq Pablo yachatsikurqan. 8Yachatsikushqan cuartuchömi atska chiwchikunata sendiyarqan. 9Tsë cuartuqa kima kaq pïsuchömi karqan. Ventänanchömi juk jövin Eutico shutiyuq tëkarqan. Unëpa Pablo yachatsikuptinmi tëkashqanchö punukar ventänapita jeqakurkurqan. Tsëmi wanushqatana pallarirkuyarqan. 10Pablo urarpurnam tsë jövinta mellqakurkur wawqikunata y panikunata kënö nirqan: <<¡Ama mantsakäyëtsu! ¡Kawëkanmi!>>

11Ëllukäyashqan cuartuman kutirirnam Santa Cënata mikuyarqan. Patsa warashqanyaq yachatsikurirmi Pablo ewkurqan. 12Tsë jövintanam kawëkaqtana wayinman pushayarqan. Kawarimushqanta rikarmi llapanpis kushikuyarqan.

Troaspita Miletuman Pablo ëwanqan

13Troas markapita Asón markayaq chakillapam Pablo ëwarqan. Noqakunanam barcuwan puntäkuyarqä Asónchöna Pabluta ëlluyänäpaq. 14Asónchö ëllukärirnam llapäkuna barcuwan Mitilene markaman ewkuyarqä. 15Mitilenipita ewkurnam waränin junaq Quío nishqan isla lädunpa pasayarqä. Tsëpita waränin junaqnam chäyarqä Samos islaman. Tsëpitanam [Trogilio markachö jamakurir] juk junaqtaraq Mileto markaman chäyarqä. 16Pentecostés fiestapaq Jerusalénman imëkanöpapis chëta munarmi Asia provinciachö qanyëta Pablo munarqantsu. Tsëmi Éfesuman mana chashpana ewkuyarqä.

Éfesuchö anciänukunata Pablo käyitsinqan

17Mileto markaman chärirnam Éfesuchö täraq anciänukunata Pablo qayatsirqan. 18Chäriyaptinnam nirqan: <<Qamkuna musyayankim kë Asia provinciaman chämushqä junaqpita patsa imanö kawashqätapis. 19Israel nunakuna conträ shäriyaptin jiparpis waqarpis Señor Jesucristuta llapan shonqüwanmi sirwirqü. 20Teyta Dios munashqannö kawayänëkipaq kaqtaqa nunakunapa nöpanchöpis y wayikikunachöpis llapantam yachatsiyarquq. 21Israel nunakunata y mana Israel nunakunatapis yachatsirqü jutsankunata jaqirir Señornintsik Jesucristuman markäkuyänanpaqmi.

22<<Kananqa Espíritu Santu pushamaptinmi Jerusalénman ëwëkä. Tsëman chäriptï ima pasamänanpaq kaqtapis manam musyätsu. 23Më markaman ëwaptïpis Espíritu Santum musyatsiman carcelman llawitsiyämänanpaq y jipatsiyämänanpaq kashqanta. 24Tsëta musyarpis manam llakikütsu. Noqaqa wanushqäyaqmi Señor Jesucristo nimashqannö [kushishqa] willakushaq Teyta Dios ankupäkuq kashqanta.

25<<Qamkuna kaqchö këkar Teyta Diospa mandakïninpaq willakunqäta wiyamaqkuna, kananpitaqa manam mëqëkipis rikäyämankinatsu. 26-27Teyta Diospa willakïninta llapantam qamkunata willapäyarquq. Tsëmi mëqëkitapis Teyta Dios juzgar condenayäshuptiki jutsayuqnatsu kashaq. 28Tsënö këkaptinqa paqtam jutsata rurayankiman. Anciänukuna kayänëkipaq Espíritu Santu churëkäyäshuptikiqa mitsikuq nuna üshankunata alli mitsishqannö Teyta Diospa iglesianta#1Tim. 3.15. shumaq rikäyanki. Pëmi iglesianta rantinanpaq kikinpa yawarninta ramarqan.

29<<Noqa musyämi ewkuptï llutan yachatsikuqkuna mallaqashqa löbunöpis shayämunanpaq kashqanta. Pëkunaqa llutankunata yachatsikurmi Teyta Diosman markäkuqkunata pantatsiyanqa. 30Tsënöllam qamkunapitapis llutan yachatsikuqkuna yurir discïpulukunata#20.30 Discïpulukunapaq parlarqa Jesucristuta chaskikuqkunapaqmi parlëkan. creyitsita munayanqa. 31Tsënö kananpaq këkaptinqa shumaq cuidakuyë. Yarpäyë kima watanpin paqaspapis junaqpapis jukniki juknikita waqariryan yachatsiyashqaqta. 32[Wawqikuna,] kananqa ankupäkuq Teyta Diospa makinllamannam jaqiriyaq. Pëpa willakïninqa puëdiqmi këkan shumaq käyitsiyäshunëkipaq. Tsënöpam llapan salvashqa kaqkunawan juntu herenciata#Col. 1.12; 3.24; Tito 3.7; Heb. 10.34; 1Ped. 1.4. chaskiyanki.

33<<Noqa manam pipa qellëninta, qorinta ni ratashnintapis munaparqütsu. 34Musyayashqëkinöpis wanashqäkunapaq y noqawan puriqkuna wanayashqankunapaqpis kikïmi uryarqü. 35Tsënöpam qamkunata yachatsiyarquq noqanö uryar pishipakuqkunata yanapayänëkipaq. Señor Jesucristupis nirqan: <Imatapis chaskir kushikushqantsikpita mas kushikïpaqmi këkan pitapis yanapashqantsik> >>.

36Pablo tsënö yacharatsirmi pëkunawan qonqurikur Teyta Diosta mañakurqan. 37Mañakur ushariptinmi llapanpis waqar pëta waqurkur mutsayarqan. 38Pëta manana rikäyänanpaqna niptinmi alläpa llakikuyarqan. Tsëpitanam ewkunanpaqna barcu kaqyaq pushayarqan.

Currently Selected:

Hechos 20: qwhB

Highlight

Copy

Compare