Hechos 16

Pabluta y Silasta Timoteo yanaqanqan

1Tsëpitanam Derbe y Listra markakunaman Pabluwan Silas chäyarqan. Listra markachömi juk discïpulu tärarqan Timoteo shutiyuq. Timoteupa tëtan mana Israel nuna kaptinpis mamäninqa Jesucristuman markäkuq Israel warmim karqan. 2Timoteo alli jövin kanqantam Listra y Iconio markakunachö täraq wawqikuna y panikuna parlayaq.

3Timoteupa tëtan mana Israel nuna kaptinmi pïmëpis musyayarqan Timoteo señalanni kashqanta. Tsëmi Pablo pushëta munar tsë kinrëchö täraq Israel nunakuna imatapis mana niyänanpaq Timoteuta señalatsirqan. 4Tsëpita markan markan purirmi wawqikunata y panikunata willapäyarqan apostolkuna y anciänukuna Jerusalénchö willanakur niyashqanta cumpliyänanpaq.#Hech. 15.23-29. 5Tsënöpam Jesucristuman shumaq markäkur wawqikuna y panikuna waran waran mirayarqan.

Macedonia nuna mañakuqta Pablo revelacionchö rikanqan

6Asia provinciaman willakuq ëwëta munayaptinpis Espíritu Santu manam permitirqantsu. Tsënam Galaciapa y Frigiapa pasakuyarqan. 7Misia partiman chärir Bitinia provinciapa ëwëta munayaptinpis Jesúspa Espïritun manam tsëpa ëwayänanta permitirqantsu. 8Tsëmi Misia partipa pasar Troas markaman chäyarqan. 9Juk paqasnam revelacionchö Pablo rikarqan Macedonia provinciapita juk nuna kënö mañakamuqta: <<Tëtë, Macedoniaman shamur yanapëkayämë>>.

10Revelación rikashqanta willayämaptinmi käyiyarqä#16.10 Troaspitam kë libruta qellqaq Lucaspis Pabluwan purir qallëkurqan. tsë markakunamanpis alli willakïninta chätsiyänäta Teyta Dios munashqanta. Tsëmi Macedoniaman ëwayänäpaq raslla alistakuyarqä.

Filipos markachö willakuyanqan

11Troaspita barcuwan ëwarmi Samotracia islaman chäyarqä. Waränin junaqnam Neápolis markaman chäyarqä. 12Tsëpitanam Filipos markaman chäyarqä. Filipos markaqa Macedonia provinciachö wakin markakunapita mas jatunmi këkan. Tsëchöqa Roma nunakunam täräyan. Juk ishkë junaqmi tsëchö quedayarqä.

13Teyta Diosta mañakuyänanpaq mayu kuchunchö imëpis ëllukäyanqanta musyarmi jamakï junaqchö markapita yarqur tsëman ëwayarqä. Tsëchö warmikuna ëllukashqa këkäyaqtam Teyta Diospa willakïninta willapäyarqä. 14Tsëchömi Tiatira markapita Lidiapis këkarqan. Pëqa granäti tëlakunatam rantikuq. Mana Israel warmi karpis Teyta Diosta cäsukuqmi karqan. Lidiata Teyta Dios käyitsiptinmi Pablo willapashqanta chaskikurqan. 15Pëpis y wayinchö täraqkunapis bautizakurirmi rowakur niyämarqan: <<Señor Jesucristuman markäkuq mayiki këkaptïqa wayïchö posadakuyänëkipaq shayämï>>.

Tsënö niptinmi wayinman ëwayarqä.

Pabluta y Silasta carcelman llawitsiyanqan

16Juk kutim Teyta Diosta mañakuq ëwëkäyashqächö supëpa munëninwan suerti qatiq shipashwan tinkuyarqä. Tsë shipashmi patronninkunata atska qellëta ganatsirqan. 17Pëmi Pabluta y noqakunata qatiyämar qayaripa imëpis nirqan: <<¡Kë nunakunaqa puëdiq Teyta Diostam sirwiyan! ¡Pëkunam käyitsiyäshunki imanö salvakuyänëkipaq kashqantapis!>>

18Tsënö waran waran qatiyämaptinmi Pablo piñakur shipashchö këkaq supëta kënö nirqan: <<¡Kë shipashpita yarqunëkipaqmi Jesucristupa shutinchö qamta niq!>>

Tsënö niptinmi tsë höra supë yarqurqan.

19Tsëmi shipashpa patronninkuna qellëta manana ganayänanpaq kashqanta käyikur Pabluta y Silasta prësu tsarïkur autoridäkuna juzgayänanpaq pläzaman apayarqan. 20Autoridäkunaman chëkatsirmi niyarqan: <<Kë Israel nunakunam marka mayintsikkunata piñëkätsiyan. 21Israel nunakunapa costumbrinkunata rurayänanpaqmi markantsikchö yachatsikuyan. Noqantsikqa Roma nuna kar manam tsë costumbrinkunata rurashwantsu>>.

22Tsënö niyaptinmi llapan nunakuna Pablupa y Silaspa contran shäriyarqan. Tsëmi autoridäkuna niyarqan Pablupa y Silaspa ratashninkunata qoturatsir wilukïkuyänanpaq. 23Tsëpitanam carcelman llawiratsir prësukuna täpaq wardiata niyarqan shumaq täpananpaq. 24Tsënö niyaptinmi mas ruri kaq calapösuman llawïkatsir chakinkunata cëpuman#16.24 Cëpuqa rakta tablapita rurashqam karqan. Tsëchömi nunata chakipita karpis, makipita karpis y kunkapita karpis prësurätsiyarqan. Cëpuchöqa prësukuna alläpam jipayarqan. ullutsirqan.

25Pullan paqasnö këkaptinmi Pabluwan Silas Teyta Diosta mañakur alabayarqan. Tsëtam wakin prësukunapis wiyayarqan. 26Tsë höram juklla patsa alläpa kuyur carceltapis kuyutsiptin llapan punkukunapis juklla kichakäyarqan y prësukuna wataräyashqan cadënakunapis paskakäyarqan. 27Prësukuna täpaq wardianam riyarkamur punkukuna kicharëkaqta tarirqan. Tsëmi prësukuna safayashqanta yarpar espädanwan wanutsikïta munarqan. 28Tsëta rikarmi Pablo qaparipa nirqan: <<¡Ama wanutsikïtsu! ¡Llapäkunam këkäyä!>>

29Tsëmi aktsita mañakurir Pabluwan Silas këkäyashqanman raslla yëkur puntankunaman karkaryëkar qonqurikïkurqan. 30Carcelpita jorqaramurnam tapurqan: <<Tëtakuna, salvakunäpaq ¿imatataq ruräman?>> nir.

31Pëkunanam niyarqan: <<Señor Jesucristuman creyikï. Pëman creyikurqa qampis y wayikichö täraqkunapis salvakuyankim>>.

32Tsëpitanam tsë wardiata y wayinchö täraqkunatapis Señor Jesucristupa willakïninta willapäyarqan. 33Tsë paqasmi wardiaqa Pablupa y Silaspa qaran pashtashqankunata paqapur jampipurqan. Tsëpitanam pëpis y wayinchö täraqkunapis bautizakurir 34wayinman pushëkur mikïta qararqan. Teyta Diosman creyikuyänanpaq käyikushqanpitam wayinchö täraqkunawan alläpa kushikuyarqan.

35Waränin qoyanam Pabluta y Silasta kachariyänanpaq autoridäkuna wardiakunata kachayarqan. 36Tsëmi prësukuna täpaq wardia Pabluta kënö nirqan: <<Autoridäkunam willakatsiyämushqa qamkunata kachariyänaqpaq. Kananqa kushishqana ewkuyë>>.

37Pablunam wardiakunata nirqan: <<Roma nuna këkäyaptïmi manaraq juzgayämar llapanpa nöpanchö wiluyämashqa y kë carcelman llawitsiyämashqa. Kananqa ¿pakëllapa kacharayämëtaku munëkäyan? ¡Jorqayämänanpaq kikinkunaraq shayämutsun!>>

38Tsënö nishqantam wardiakunaqa autoridäkunata willayarqan. Roma nuna kayashqanta musyëkurmi autoridäkuna mantsakäyarqan. 39Tsëmi Pablo y Silas kaqman ëwëkur perdonta mañakuyarqan. Tsëpitanam carcelpita jorqurir rowayarqan tsë markapita ewkuyänanpaq. 40Carcelpita yarqurirmi Lidiapa wayinman ëwayarqan. Tsëchö wawqikunata y panikunata willapärirmi Filipos markapita ewkuyarqan.

Currently Selected:

Hechos 16: qwhB

Highlight

Copy

Compare