Hechos 13

Bernabéta y Sauluta Espíritu Santu akranqan

1Antioquía iglesiachömi profëtakuna y yachatsikuqkuna kayarqan Bernabé, Yana Nuna niyashqan Simón, Cirenipita Lucio, Manaén y Saulupis. Manaéntawan rey Herodestam wamra kayaptin tsë wayillachö wätayarqan. 2Juk junaqnam Teyta Diosman markäkuqkuna ayunar alabëkäyaptin Espíritu Santu kënö nirqan: <<Bernabéta y Sauluta churayë willakïnïta willakur puriyänanpaq. Tsëpaqmi pëkunata qayarqü>>.

3Tsëmi ayunarir Bernabépa y Saulupa peqanman makinkunata churar Teyta Diosta mañakuyarqan. Tsëpitanam pëkunata despachëkuyarqan.

Chiprichö willakuyanqan

4Espíritu Santu tsënö kachaptinmi Bernabé y Saulo chäyarqan Seleucia markaman. Tsëpitanam barcuman lloqarkur Chipre islaman ewkuyarqan. 5Salamina markaman chärirmi sinagögakunachö Teyta Diospa willakïninta willakuyarqan. Marcos niyashqan Juanpis pëkunata yanaparmi purirqan.

6Chipripa pasar willakurmi Pafos markaman chärir Barjesús shutiyuq Israel nunata tariyarqan. Pëqa profëta tukuq brüjum karqan. 7Tsë brüjum Chipripa mandakuqnin Sergio Pauluta yanapar purirqan. Sergio Pauluqa alli yarpëyuq nunam karqan. Teyta Diospa willakïninta wiyëta munarmi Bernabéta y Sauluta qayatsirqan. 8Tsë brüjunam pëkunapa contran shärir Sergio Pauluta micharqan willakuyashqanta mana chaskinanpaq. Barjesústaqa brüju kaptinmi Elimas#13.8 Elimas ninanqa brüju ninanmi. niyaq.

9Tsënö michaptinmi Saulo piñarqan. (Saulupa juk kaq shutinmi karqan Pablo.) Tsëmi rikarëkur Espíritu Santupa poderninwan 10nirqan: <<¡Qamqa diablu munashqanta rurarmi Teyta Diospa contran këkanki! ¿Imëyaqtaq nunakunata engañar Teyta Diospa willakuqnin tukunki? 11Tsënö kashqëkipitam Teyta Diospa castïgunwan wisku tikrarir juk tiempuyaq atsikyë patsata rikankitsu>>.

Tsënö niptinmi tsë höra wisku tikrarirqan. Mëpapis ëwëta mana puëdirmi nunakunata rowakurqan janchayänanpaq. 12Wiskuyashqata rikëkurmi y Diospa willakïninta wiyashqanpita kushikurmi Sergio Paulo creyikurqan.

Pisidiachö këkaq Antioquía markachö willakunqan

13Tsëpitanam barcuman lloqarkur Pafos markapita Panfiliachö këkaq Perge markaman Pablo yanapaqninkunawan ëwayarqan. Tsëchö pëkunata jaqirïkurmi Marcos niyashqan Juan Jerusalénman kutikurqan. 14Perge markapita ëwarmi Bernabé y Pablo chäyarqan Pisidiachö kaq Antioquía markaman. Jamakï junaq kaptinnam sinagögaman ëwayarqan. 15Leykunata y profëtakuna qellqayashqanta leyir ushariptinmi sinagögachö mandakuqkuna Pabluwan Bernabé tëkäyashqanman juk nunata kachayarqan kënö ninanpaq: <<Wawqikuna, imallapis yachatsiyämänëkipaq kaptinqa yachëkatsilläyämë>>.

16Tsëmi Pablo shärirkur nunakuna upälläkuyänanpaq makinta pallarkur nirqan: <<Israel nunakuna y Teyta Diosta mantsakuq mana Israel nunakunapis, yachatsiyanqaqta shumaq wiyayämë. 17Adorashqantsik Teyta Diosshi unë castantsikkunata akrëkur Egiptuchö forastëru këkäyaptinpis jatun nación tikrayänanpaq yanapanaq.#Éxo. 1.7. Tsëpitanash milagrukunata rurar Egiptupita jorqamunaq.#Éxo. 12.51. 18Chusku chunka (40) watanö chusyaq jirkapa purir mana cäsukuyaptinpis pacienciakunaqshi.#Núm. 14.34; Deut. 1.31. 19Tsëpita Canaánman chëkatsirnash tsëchö qanchis nacionkunata#Deut. 7.1. ushakäratsir herenciankuna qoykunaq.#Jos. 14.1. 20Egiptuchö kayashqanpita Canaánchö herenciankuna chaskiyanqanyaq chusku pachak pitsqa chunka (450) watanöshi pasanaq.

<<Canaánchönash profëta Samuel#1Sam. 3.20. kawashqan witsanyaq mandakuyänanpaq juezkunata Teyta Dios churanaq.#Jue. 2.16. 21Tsëpitanash mandakuqninkuna rey kananpaq nunakuna mañakuyaptin#1Sam. 8.5. Benjamín trïbu Cispa tsurin Saúlta churanaq.#1Sam. 10.21. Pëshi chusku chunka (40) wata rey kanaq. 22Tsëpitanash Saúlta jorqurir Davidtana rey kananpaq churanaq. Pëpaqshi Teyta Dios kënö ninaq: <Isaípa tsurin Davidqa shonqüpaqnömi këkan. Pëqa llapan nishqäkunatam cäsukunqa>.#1Sam. 13.14; 16.12-13; Sal. 89.20.

23<<Tsëpitanam Teyta Dios änikushqannölla rey David castapita salvamaqnintsik Jesús Israelchö yurirqan. 24Manaraq Jesús willakuptinmi Israel nunakunata Bautizakuq Juan willaparqan jutsa rurëta jaqir bautizakuyänanpaq.#Mar. 1.4; Luc. 3.3. 25Tsëpita wanunanpaq ichikllana pishikaptinmi Juan kënö nirqan: <¿Pï kashqätataq yarpäyanki? Manam noqatsu Cristo kä. Cristuqa qepätaran shamunqa.#Juan 1.20. Noqaqa llanqi watunta paskarinällapaqpis manam sirwïtsu>.#Mat. 3.11; Mar. 1.7; Luc. 3.16; Juan 1.27.

26<<Abrahampita miraq Israel wawqikuna y Teyta Diosta mantsakuq mana Israel nunakuna, noqantsikmanmi salvakunantsikpaq alli willakï chämushqa. 27Jerusalénchö täraq nunakuna y autoridäninkunaqa profëtakuna qellqayashqanta cada jamakï junaq sinagögachö leyirpis manam käyiyarqantsu Jesúspaq qellqayashqanta. Tsëmi profëtakuna qellqayanqanta cumplir Jesústa wanutsiyarqan. 28Jutsannaq këkaptinmi Pilatuta rowakuyarqan Jesústa wanutsinanpaq.#Mat. 27.22-23; Mar. 15.13-14; Luc. 23.21-23. 29Profëtakuna qellqayashqannöllam llapanpis pasakurqan. Wanuriptinnam cruzpita jorqurir pampayarqan.#Mat. 27.57-61; Mar. 15.42-47; Luc. 23.50-56; Juan 19.38-42. 30Tsënö kaptinpis Teyta Diosmi kawaritsimushqa. 31Tsëpitanam Galileapita Jerusalénman#Hech. 1.3. pëwan ëwaq discïpulunkunata atska kuti yuripurqan. Pëkunam Jesúspaq kanan willakïkäyan.

32<<Tsënöllam noqakunapis Teyta Diospa willakïninta willapëkäyaq. Unë castantsikkunata änikushqantam 33Teyta Dios cumplishqa. Tsënö cumplirqan Jesucristuta kawaritsimurmi. Ishkë kaq salmuchöpis Jesucristupaq kënömi qellqarëkan:

<< <Qamqa tsurïmi kanki.

Kanan junaqpitam tëtëki kä>.#Sal. 2.7.

34Jesucristo kawarimur imëpis manana wanunanpaq kashqantaqa Teyta Dios kënömi nikan:

<Davidta änishqä santu bendicionkunatam qamta qoykushqëki.

Tsë änishqätam imëpis cumplishaq>.#Isa. 55.3.

35Tsënöllam juk salmuchöpis kënö qellqarëkan:

<Santu sirwiqniki kaptïmi sepultürachö ayä ismunantapis munankitsu>.#Sal. 16.10.

36<<Manam kikinpaqtsu David tsënö qellqarqan. Davidqa Teyta Dios munashqanta cumplirir wanukuptinmi unë castankuna pamparäyashqanchö pëpapis ayan ushakarqan. 37Tsënö kaptinpis Jesústaqa Teyta Diosmi kawaritsimushqa. Tsëmi pëpa ayanqa sepultürachö ushakashqatsu.

38<<Wawqikuna, nishqäta shumaq käyikuyë. Jesucristo rëkurmi jutsantsikkunata Teyta Dios perdonamantsik. 39Llapantapis pëman markäkuq kaqtaqa jutsannaqtam Teyta Dios chaskin. Moisés qellqashqan leykunata cumplishqanpitaqa manam pipis salvakuntsu. 40Paqtam profëtakuna qellqayashqanchö nishqannö qamkunatapis pasayäshunkiman. 41Pëkuna qellqayashqanmi kënö nikan:

<< <Mana creyikuqkuna, alläpa mantsakäyë.

Alläpa mantsakëpaq kaqkunata ruranäpaqnam këkä.

Imanö ruranäpaq kashqanta willayäshuptikipis manam creyiyankitsu> >>.#Hab. 1.5.

42Sinagögapita Pablo y Bernabé yarquriyaptinmi [mana Israel nunakuna] rowayarqan juk kaq jamakï junaqpis yapë yachatsiyänanpaq. 43Pabluwan y Bernabéwanmi Israel nunakuna y Diosta cäsukuq mana Israel nunakunapis atskaq ëwayarqan. Pëkunatam Pablo kallpatsirqan ankupäkuq Teyta Diosman imëpis markäkuyänanpaq.

Mana Israel nunakunatana willapäyänanpaq ninqan

44Juk kaq jamakï junaqnam tsë markachö cäsi llapan nunakuna Diospa willakïninta wiyëta munar sinagögaman ëllukäyarqan. 45Atska nunakunata rikëkurmi wakin Israel nunakuna Pabluta chikir parlashqanta manakaqpaq churayarqan.

46Tsëmi Pabluwan Bernabé mana mantsakushpa niyarqan: <<Israel nunakuna kayaptikim Teyta Diospa willakïninta qamkunata puntata willapäyarquq. Tsënö willapäyaptiqpis wiñë kawëta manam chaskikïta munayankitsu. Mana chaskikuyaptikim mana Israel nunakunatana willapäyäshaq. 47Pëkunata willapänantsikpaqmi Teyta Dios nishqa:

<< <Jinantin nacionkunapaqpis aktsi kanëkipaqmi churarquq.

Tsënöpam jinantinchö nunakuna salvakuyanqa> >>.#Isa. 49.6.

48Tsënö parlayashqanta wiyarmi mana Israel nunakuna kushikur Teyta Diosta alabayarqan. Tsënöpam wiñë kawëta tariyänanpaq Teyta Dios akrashqankuna llapanpis Jesucristuman markäkuyarqan.

49Tsëmi Teyta Diospa willakïninta Pabluwan Bernabé markan markan willakuyarqan. 50Tsënö willakuyaptinmi pëkunapa contran sharkuyänanpaq Teyta Diosta cäsukuq alli rikashqa warmikunata y reqishqa nunakunata Israel nunakuna willapëkuyarqan. Contran shärir tsë markakunapita qarquyaptinmi 51chakinkunachö këkaq polvuta tapsikurir#Mat. 10.14; Mar. 6.11; Luc. 9.5; 10.11. Iconio markamanna Pabluwan Bernabé ewkuyarqan. 52Jesucristupa discïpulunkunaqa#13.52 Discïpulukunapaq parlarqa Jesucristuta chaskikuqkunapaqmi parlëkan. Espíritu Santupa poderninchö karmi kushishqa kawakuyarqan.

Currently Selected:

Hechos 13: qwhB

Highlight

Copy

Compare