Rut 2
2
Rut cebadan juuktasa Boozan ajariin wemau
1Noemí aishri Elimelec ajakua nu weantu, Booz naartin shir wiakach pujujakuiti. 2Tura chikich tsawantin Rut Noemín chicharuk: Cebadan juwainamunam wetajai. Tuman nita ashi juutsuk ikuinamun ukunam wekasan, wisha juukan utitjai, tusa tinaiti. Tama tsatsarisha chicharuk: Takumka weme juukam utita, tusa tinaiti. 3Tutai we cebadan juwainak pujuinamunam jeaa nita ukurin nisha cebada juwaku ikukmau ainan juwak pujusuiti. Nu ajaka Booznau ajakuiti. 4Nu tsawantin Booz Belénnum pujau jeawaiti. Tura cebadan juuwak pujuinan chicharuk: Yuus atumin pegkernum yainmakarti, tusa tinaiti. Takai nitasha ayainak: Amincha Yuus yainmakti, tusa tiaruiti.
5Tuma Booz takatan inamnu apurin chicharuk: ¿Au nuwasha tuiyampaita? tusa tinaiti.
6Takai takatan inamnu apuri ayak:
“Moabnumia nuwa Noemíjai taama nuwaiti. 7Wisha juwainak yujainamunam ukunam wekasan cebada ashi juinachmaun juuktajai tusa seatmayi. Tura nigka káshik nagkama ayamtsuk yamaikisha taká pujawai”, tusa tinaiti. 8Takai Booz Rutan jeari chicharuk:
“Chikich ajanam weme árak juutsuk, juig juakam aminu amaina nu juukta. 9Wina inatair ainan, ju nuwa waitkasairpa tusan tiarjai. Tuma asamtai, kitamakmesha wina takartin aina shikikmau entsa muitsnum pujuina juiya umarta”, tusa tinaiti.
10Tutai eme anentas iiyak tsuntsumaa Boozsan chicharuk: Chikich nugkanmaya aisha ¿urukamtai wait anentrame? tusa tinaiti. 11Tama Booz ayak: Amina aishrum jakau aig, tsatsaram shir anentsam kuitamkum amina apa, amina nuku tura nugkemsha ikukim, ii ainatin nekakratchayatam ijai pujustasam taawaitam nunasha nekajai. 12Atash nanapejai nina uchirin etektuk kuitamna numamtuk yainkati tusam Israel umiru jakmauwa nu Yuus eakuitme. Tura asaakmin ame takasmaunam Yuus akirmakti, tusa tinaiti. 13Takai ni ayak: Ame wina wait anentrame, ame wina turutam nu shir enentaimtikrawai. Wika imanchau aig shir amajtame, tusa tinaiti.
14Yurumak yuta jeamtai, Booz Rutan chicharuk: “Taata tumam jui, pan vinagrenam inijaram yuata” tusa tinaiti. Tutai Rutcha inatai ainajai ekemsauwaiti, tura Booz pankan yuati tusa susauwaiti. Turam yua shir ejémaruiti, tura nuiyasha ampinturuiti. 15-16Rut ataksha cebadan juuktasa weakai, Booz nina inatairi ainan chicharuk: Yamaika juuwakrumsha akaketkarum jukti tusarum ikutarma. Turakrum nukap jukiti tusarum atum juuwamusha akakekrum ikutarma. Ju nuwa cebadan juuwak wekakaisha waitkasairpa tusa, tinaiti. 17Rut Boozsan ajariyan káshik nagkama cebadan juwa juwakua etsa akatmak, cebada akarmaka veinte kijintri nagkaiki aramun juukuiti. 18Tuma Rut cebadan juukmaurin nukap juki tsatsarin inaktustasa wuwaiti. Tura yuaku ampirmaurincha tsatsarin susauwaiti. 19Turam tsatsari chicharuk: ¿Yamaisha tui takasu asamea ima nukapsha itame? Amina shuar wait anentramak nukap suramsa nunaka, nincha Yuus pegkernum yaigti, tusa tinaiti. Takai Rut tsatsarin chicharuk: “Shuar Booz naartina nuna takatrinig takasjai” tusa tinaiti. 20Takai Noemí ayak: “Yuus nincha pegkernum yaigti. Nu shuarka ina patai ainancha wait anentu jakuiti. Tura asa incha yainmamainaitaj nuka niyaiti. Nu shuarka ii weantuiti tuma asa ina yainmak aitkarmaji” tusa tinaiti.
21Takai nuiyasha Rut chichaak: “Juakam wina inatair ainajai metek cebada juut inagnakta tusa turutui” tusa tinaiti. 22Takai Noemí Rutan chicharuk: “Nuka pegkeraiti, inatai ainajai juakam takasta. Turasha waitkarmasarai chikich ajanmagka weepa” tusa tinaiti. 23Rut kashi kashinig cebadan juuwa pujau tura nina tsatsarisha nuig pujau, cebada juwamu ashimnakmatai nisha inaisauwaiti.
Currently Selected:
Rut 2: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.