Rut 1
1
Elimelec nina nuwe nina uchiri ainajaimak Moab nugkanam pujustasa wemau
1-2Judá nugkanam, yaakat Belén tutainam shuar Elimelec naartin pujujakuiti. Nuna nuwe Noemí naartin ajakuiti. Apu aina, Israel shuar ainan ina jakarua nu uwítin tsuka tepeawaiti. Tuma asamtai Moab nugkanam pujustasa weak, nina nuwen, tura nina uchirin Mahlón naartinan, tura chikich uchiri Quilión naartina nujai mai juki wuwaiti. Tuma nui jea Moab nugkanam pujusaruiti.
3Turasha nui pujus Noemí aishri Elimelec jakauwaiti. Tumamtai nigka uchiri aishmag jimarjai juakuiti. 4-5Tuma nui uun jasar moabita nuwajai, uchiri mai nuwenawaruiti. Uchiri nuwegka Orfá, tura chikich uchiri nuwegka Rut naartin ajakuiti. Tumawar nui diez uwí tumain pujusar, nina uchirisha Mahlón tura Quiliónsha jakauwaiti. Tumamtai Noemí aishrinchau, tura uchirtinchau juakuiti.
Noemí Rutjai yaakat Belénnum wemau
6Chikichik tsawantin Noemí Moabnum pujus, Yuus ni shuar israelita ainan wait anenta asa, yumin yutumtikamtai árak ainan arawar jukar yuinawai tamaun antukuiti. 7Tura Judá nugkanam waketkittsa wakerukuiti. Tuma asa uchiri nuwe ajakarujai nita pujuinamunmaya jiinki wearuiti. 8Turasha jinta wesa Noemí nina uchiri nuwe ajakarun chicharuk: Atumin nukuri pujamunam waketkitarma, wina tura wina uchirsha wait anentrau asaakrumin Yuus atumnasha wait anentramrati. 9Tura ataksha aishrinawar pegker pujusarti tusasha nigki atumnasha yainmakti tusa mai kugkuasuiti. Turawaram mai útiaruiti.
10Tura chichainak: Atsaa, waketkishtatji isha amina nugkemin winittsar wakeraji, tusar tiaruiti. 11Tuinakai Noemí nitan chicharuk: Wina nawantur ainata waketkitarma, ¡atumka wii weamunmagka winimaitsurme! Atumin nuatramainnaka uchirmamaitsujai. 12-13Wika uuntach asan yamaika aishrinmaitsujai, tura aishrinancha uchirmamaitsujai. Ju káshia juig wii aishrinan uchirmakmataisha tsakarmatai nujai aishrinatjai tusarum pegkesha nakamainchau ainarme. Tuma asamtai waketkitarma. Yuus wii waittsatnun surusai. Antsu atum waitakrumin nu senchi wake mesemar nekapmainaitjai, tusa tinaiti.
14Takai ataksha útiaruiti. Tuma Orfáka tsatsarin kugkuas ikuak nukuri pujamunam waketkinaiti. Turasha Rutka wakettsuk tsatsarinig juakuiti. 15Tumamtai Noemí Rutan chicharuk: Orfáka nina yuusrimtairin ememattasa yaaktarin waketkiyi. Tuma asamtai amesha nijai waketkita, tusa tinaiti.
16Tutai Rut ayak: Wait aneasam waketkita tusamka turutipa. Ame weam nui wisha winittajai, tura ame tuig pujustaam wisha nui pujustatjai. Tura amina pataim ainasha wina pataar artatui. Tura Yuus ame umirtairmia nusha wii umirtai atatui. 17Ame tuig jakatnaitam wisha nuig jakan ikuntsattsan wakerajai. Wii jatsuk amijai tupakaigka Yuus waittan surusti tusan wakerajai, tusa tinaiti.
18Noemí, Rutan nijai wetasa wakeramun nekawaiti, tura nuiyagka waketkita tusagka tichauwaiti. 19Tuma wear Belénnum jeawaruiti. Tuma Belénnum wayaamtai nuwa aina chicharainak: Ju Noemí aya nuchaukait, tusa tuina.
20Turasha nitan ayak: Noemí turutirpa, Mara turuttarma,#1.20 Noemí ta nunaka shir anen taku tawai tura Mara ta nunaka kajen taku tawai. Nunaka Yuus ashi senchirtina nu wina waittan shir senchi surusai taku tinaiti. 21Wika juiyagka shir nukap jukin wuwaitjai. Turasha Yuus tu wakeruku asamtai, pegke jutsuk waketkin taajai. Yuus ashi senchirtina nu waittan surusu asamtai, Noemí tusarmeka turutirpa, tusa tinaiti. 22Noemí, Moabnum pujau Rutjai wearua nuka cebada juut nagkamnamunam yaakat Belénnum jeawaiti.
Currently Selected:
Rut 1: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.