Números 24
24
1Turasha Balaam Israel shuar ainan Yuus pegkernum yayámun nekau asa, nuiyagka Yuus wari turuttig nuna nekatjai tusagka tichauwaiti. Nunaka tumatsuk aya nugkanmani iima wajau. 2Tuma wajas Balaam Israel shuar ainan wainkau, tuma iima wajaun Wakan Pegker pujursau. 3Turam Balaam atak atinan pachis chichaak:
“Wika Beoran uchiri Balaamaitjai,
wika Yuus wakera nunaka shir nekajai.
¡Wii chichaman etserkai antuktarma! 4Wika Yuusa Wakaní wini pujau asamtai,
Yuus ashi senchirtina nu, wina ni wakeramurin iwainturuk tura chicham etserkatnun sura nuna shir nekajai.
5¡Jacobo, uchiri ainan aakri ainaka shir pegker ainawai!
¡Israelan, aakrigka shir pegkeraiti!
6Kampanak aina uun tepawa numamtinaiti,
entsa yantamen árak aina arakmau irunna numamtinaiti.
Yagkur Yuus arakmau aina irunna numamtinaiti,
¡entsa yantamen cedro aina irunna numamtinaiti!
7Israel weantu ainanmagka entsasha nukap atinaiti.
Nita umartin tura árak aina ukatkatnusha imanisag atinaiti.
Nita apurigka Agagnumia apun nepetkatnaiti.
Tura nitaka senchirtinak artinaiti.
8Yuus Israel shuar ainan Egipto nugkanam pujuinan jiirua nuka,
vaca aishmagkri nina kachurijai ayamrumauwa numamtuk, nita ainanka pegkernum yayáwai.
Turamu asa nita shuari ainanka nepetiartatui.
Nita shuari ainanka nagkijai iju mainak ukunchin kupiriartinaiti.
9Israelita aina ayamainak tepenakka león ayamak tepena numamtuk tepeartinaiti.
Nitanka pegkesha ishintamain ainatsui.
Amina pegkernum chichartamainaka nitasha pegkernum chicharam artatui.
Amina pegkerchaunam chichartamainaka nitasha pegkerchaunam chicharam artatui”, tusa Balaam tinaiti.
Yuus israelita ainan pachisa timaun Balaam etserkamu
10Nuna takai Balac antuk senchi kajek, uwejen awatas Balaaman chicharuk:
“¡Aminka wika nita aina pegkerchau chicharkata tusan untsukan itaamjame! ¡Turamaitiatam tresa imajnia pegkernum chicharkaume! 11Tuma asam ¡yamaika jeemin waketkita! Wika aminka shir nukap akiktajme tusan timajme. Turasha Yuus nuna nakitawai tusam nita aina pegkerchaunam chicharkachume, tusa tinaiti. 12Tama Balaam Balackan chicharuk: Wika amina inatairam chichaman etserin ainan chicharkun: 13Atumin apuri nina pujusa inamtairin oron, tura plata tutain piakun surakaisha wiki enentaimsankeka tichattajai, antsu Yuus wakeramunak titatjai tusan timajai. 14Ayu, wika nugkaruin waketkittajai. Turasha eke wetsuk ju shuar aina amee shuar ainan turawartata nuna pachisan ujaktajme”, tusa tinaiti.
15Tusa Balaam atak atinan pachis chichaak:
Wika Beoran uchiri Balaamaitjai,
wika Yuus wakera nunaka shir nekajai.
¡Wii chichaman etserkai antuktarma! 16Wika Yuusa Wakaní pujurtau asamtai,
Yuus ashi senchirtina nu,
tura Yuus ashi nagkakartakua nu ni wakeramurin winaka iwainturuk,
chicham etserkatnun sura nunaka shir nekajai. 17Yuus wina iwainturka nuka eke nagkamatsui, nuka atak nagkamaktinaiti.
Jacob weantu ainanmaya chikichik apu jastinaiti.
Nu apuka ya etsanna numamtin atinaiti.
Tuma nita shuarincha nepettinaiti. Turak Moabnumia ainan apurincha maatnaiti,
tura Set weantu ainancha ashi maatnaiti.
18Israel shuar ainaka Edomnumia shuar ainancha nepetkatnaiti,
Seír nugkanam nita shuari aina pujuina nunasha nepetkar, nugkan nita jukiartinaiti.
Tura nita shuari ainanka ashi nepetkatnaiti.
19Jacobnumia nina shuarin nepetin chikichik shuar atinaiti.
20Nuna tusa inaiyak Amalec shuar ainan yaaktarini iimas Balaam atak atinan pachis chichaak:
“Amalecita ainaka araantusa iitai, tura ashi chikich ainan nagkasau senchirtin ainawai.
Turasha iman akusha ashi ijiniam atinaiti”, tusa tinaiti.
21-22Nuiyasha quenita ainan pachis atak atinan chichaak:
Caín weantu ainata:
“Atumi jee pegker takasa umikmau akusha,
tura muchignum ekeni jean shuar jeammaina numamtuk atum ajamaka uwemtai pegker ainakaisha
Asirianmaya shuar aina atumin achirmak yarurmainak,
jea pegker umikmau ainakaisha jijai ekemartin ainawai”, tusa tinaiti.
23Tura inagnamun Balaam atak atinan pachis chikichnasha chichaak:
“¡Ayawa! ¿Yuus waittan ashammainan sukartustina nuisha
yáki iwákusha pujutnaita?
24Chiprenmaya barco ainajai suntar aina kaunkar Asirianmaya ainan, tura Heber weantu ainancha ashi ijinawartinaiti”, tusa tinaiti.
25Nuna tina ashi umik Balaam nina jeen waketkinaiti. Tura Balacsha nina jeen waketkinaiti.#2Pe 2.15-16
Currently Selected:
Números 24: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
