Levítico 23
23
Jiisat tsawan aina pachisa timau
1Yuus Moisésan chicharuk: 2“Israelita aina chicharkum: Wina emematrittsa iruuntai tsawantinka, nu tsawanta nuka wii pegkermamtikamu asamtai tuke iruuntsarmeke atinaitrume”.
3Seis tsawan takastarma. Antsu siete tsawanta nuigka ayamtai tsawan asamtai wina emematrakrum pegkesha takaschattarme. Atum tuig pujutnaittrum nu tsawanka pegker asamtai wina emematritnaittrume. 4Nu tsawanka pegker asamtai wina emematrakrum tuke iruuntsarmeke atinaitrume. 5Marzo nantu, catorce tsawan kintama nuigka, wina emematrakrum jiisat Pascua tutaiya nuka inagkain ataarma. 6Tura nu tsawanta nui, kashin tsawak quince tsawanta nuigka, wina emematruinak pan levadurajai pachimrachmaun siete tsawan yuawarti. 7Jiisat yama nagkammau tsawanta nuigka wii pegkermamtikamu asamtai, pegkesha takaschatnaitrume. 8Siete tsawanta nuigka wina anentak surakrum tagku aina maarum epettarme. Tura siete tsawanta nuigka wii pegkermamtikamu asamtai, tuke iruuntsa jiistamsarmeke atin ataarma. Turakrum nu tsawantinka pegkesha takasairpa.
Árak jut pachisa timau
9Yuus Moisésan chicharuk:
10Israelita aina chicharkum: Wii nita pujustinan nugkan anajmatawaitaj nui pujuinaksha, trigon arawar juwainaksha yama nagkamchak juuka irumra jigkamunka sacerdoten susarti. 11Nuna turamtai Kashin tsawak, ayamtai tsawan tsawakai sacerdote anenkan juki Yuusan ejétitnaiti. Nuna turakai Yuus shir anentsatnaiti. 12Yama nagkamchak árak juukmaun ejétta nuig, oveja chikichik uwí aramun nuwerman pegkeran maa epeak wina emematriti. 13Tura nuiyasha harina shir pegkeran cuatro kilos y medio aramun aceitejai pachimra takasmaujai epea ukugkuinak wina pegker amajtiarti. Tura nuiyasha ukartinan anenkan chikichik litron vinon itarti. 14Nu tsawanta nui, wina anentak itartakrumka pan, tura trigosha yuashtinaitrume. Atum tuig pujutnaittrum tura atumin uchiri ainasha nunaka turusarag umisarke artinaiti.
15Nu tsawanta nui kashin tsawak atata nuka ayamtai tsawantaiti. Nui anentak trigo juukrum ejéttarum nui nagkamsarum siete semana nekapmarum ejétarma. 16Tura siete semananum ayamtai tsawan tsawartata nuigka cincuenta tsawan jeattawai. Nu tsawan jeamtaigka inagnaku trigo yama juukmaun wina itartuawarti. 17Jiisat Pascuan inagkasar siete semanas ejéniar, kashin tsawainak harina shir pegkeran levadurajai pachimrar pan najanamun nita jeenian jimaran jukiar, tura nuiyasha inagnamunam árak juukmaurin cuatro kilos itawar winau atinan sacerdoten susarti. 18Pankan vinojai juinak, epenak wina shir enentaimtikrurtinan siete ovejan aishmag ainan chikichik uwí aramu ainan, chikichik vaca aishmag tsakatan, tura jimar carneron jukiarti. 19Nuiyasha nita tunauri aina tsagkurnartinan chikichik cabra aishmagkun epeawarti. Turawar yamaika ina tunaurigka tsagkurnarar agkanmakarji tusar jimar ovejan aishmagkun jukiartinaiti. 20Nu ainanka wii pujamunam sacerdote itawarmatai wii nuna pegkermamtikattajai. Turawarmatai nuka sacerdotenu artinaiti.
21Nu tsawanta nuka pegker asamtai atumka pegkesha takatsuk iruuntra wina emematrakrum, wii chicham umiktinan tinaitaj nu umiakrum atum tuig pujutnaittrum, tura atumin uchiri ainasha turusarag umikartinaiti. 22Tsawan árak juut jeamtai juuwakrumsha shuar kuitrinchau aina, tura chikich shuar ainasha juukar yuawarti tusarum ashika jutsuk kakekaru ainaka inaisatarma. Wii atumin Yuusri asan tajarme.
Iruuntrar trompetan umpuinak wina emematriarti timau
23Yuus Moisésan chicharuk: 24Israelita aina chicharkum, siete nantu yama nagkamchak tsawaarmatai ayamtai tsawantinka shuar aina takascharti timau asamtai ashi iruuntrar kachun umpuinak wina emematriarti.#1Ts 4.16; 1Co 15.52 25Takatsuk wina emematruinak anenkan tagku ainan maa epenak pujusarti.
Tsawan tunau tsagkurnartin pachisa timau
26Yuus Moisésan chicharuk: 27Nu nantutinig diez tsawaarmatai, nitan tunauri tsagkurnartin tsawan asamtai, yurumkan yutsuk pujusar, ina tunauri tsagkurkarturta tusar aujtusarti. 28Nu tsawantinka, wii nita tunaurin tsagkuru asamtai pegkesha takascharti. 29Nu tsawantin yaki yurumkan yutsuk pujus tunaur tsagkurturta tusa aujtuschat nuka atumiyagka jiiki akupkatarma. 30Nu tsawantin shuar takaka atumiyagka jiiki akupkatarma.
31Nu tsawantinka pegkesha takatsuk wii chicham umiktinan atumin tinaitjarum nu umiakrum atum tuig pujutnaittrum, tura atumin uchiri ainasha turusarag umikartinaiti. 32Nu tsawanta nuka ayamtai tsawan asamtai yurumak yutsuk pujusrum atumi tunauri tsagkurnartin pachisrum aujtustatrume. Nu nueve tsawan kintamtata nuigka diez tsawan atatui.
Aak aakmarmau pachisa timau
33Yuus Moisésan chicharuk: 34Israelita aina chicharkum, nu nantutinig quincetin aak ainan aakmarar matsamujakmauwa nu tsawantan enentaimtusar jiistamainak pujusar wina emematruinak siete tsawan pujusarti. 35Yama nagkamchak iruuntrar wina emematriartata nuka tsawan pegker asamtai pegkesha takascharti. 36Siete tsawan winau anentak ainan suruinak epeawarti, tura ocho tsawanta nuigka chikichik anenkan epenak ashi iruuntrar wina emematriarti. Tura inatai ainasha pegkesha takamtiksairpa. 37Nu tsawan aina nuka tsawan ayamtai asamtai, iruuntrar wina emematruinak anentak aina nunaka winau atinan epesarke atin arti. 38Nuiyasha ayamtai tsawanchau aina nuisha winau atinan nita enentaimsag itawar emematriarti. 39Nantu sieteya nui, quince tsawantin ashimnamunam, árak juukrum inagnakrum siete tsawan wina emematrittarme. Tumainak siete tsawantin tura ocho tsawantincha takascharti.
40Iruunmau tsawan nagkammaunam israelita aina, árak pegker neren ainan kanawentuk, kampanak ainan, entsa yantamnum álamo tutai nuke ainan itawarti. Turawar wii nitan Yuusri asamtai shir anenak siete tsawan wina emematriarti. 41Chikichik uwítin siete tsawan wina emematriarti. Nu tsawannaka nita uchiri ainasha turusag umikartinaiti. 42Nu tsawanta nuigka israelita ainaka nita aakmarmaunam siete tsawan, nita uchiri ainajaimak pujusarti. 43Tumainak Egipto nugkanam pujarin, ina Yuusri jiirmarmatai aya nugkanmag aakmarar pujuyaji, tusar nita uchiri ainan ujakarti, tusa Yuus Moisésan tinaiti. 44Nu tusa timau asa, Moisés israelita ainan nu tsawantin iruuntrarum Yuus ememattattrume tusa nitan ashi ujakuiti.
Currently Selected:
Levítico 23: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
