Josué 3
3
Israelita aina Jordán entsanam katiarmau
1Kashin tsawaar shir káshikmasar Josué ashi israelita ainajai Sitimnumia jiinki, we wenakua Jordán entsanam jeawaruiti. Turasha katitsuk nuig aakan aakmarar pujusaruiti. 2Tumawar tres tsawan pujusar apu aina nita pujuinamunam jeariar 3israelita ainan chicharainak: Sacerdote Leví weantu aina Yuus chicham umikmau egkeamun arcan juki wena wainkurmeka atumsha jiintrarum nita ukurin wetaarma. 4Ika jintaka nekainatsji. Tumaina asar sacerdote aina Yuus ememattasa iruuntai aaknum, arca puja nuna jukiar wenakai, shir ijusrika wetsuk mil metros tumainnum wenai isha weartatji, tusar tiaruiti. 5Tiarmatai Josuésha nitan chicharuk: Yuus kashin nina senchirin iwainamu wainkatin asarum pegkermakatarma, tusa tinaiti. 6Tusa sacerdote ainan chicharuk: “Arca yanakrum jukirum shuar aina wainmaunam Jordán entsanam katigtarma”, tusa tinaiti.
Tusa takai sacerdote aina arcan yanakiar jukiar nita emkar wearu ainawai. 7Tumawarmatai Yuus Josuén chicharuk: “Eme anentsa iitai atii tusan yamai nagkamsan aminka israelita aina wainmaunam apu amajsattajme. Wii amina turamtai nitaka Moisésjai pujuyaj tumasnak amijai wii pujamuncha nekawartatui. 8Sacerdote aina chicham umiktin aarmau egkeamun arcan yanaki juki wena chicharkum entsa Jordánnum jearum entsanam amuwa wajastarma”, tusam tiarta tinaiti.
9Tusa tama Josué israelita ainan chicharuk: “Jui taatarma, tumarum ina Yuusri chichakai antuktarma. 10Yuus atum Canaán nugkanam jeawakrumin, cananeo ainan, hetita ainan, heveo ainan, ferezeo ainan, gergeseo ainan, amorreo ainan, tura jebuseo ainan ijinki weakai, Yuus ijai pujamu nekattarme. 11Yuus ashi nugkanam iruna nuna Yuusriya nuna arcarin, chicham umiktin egkeamua nuna jukiar entsa Jordánnum ikatiamu wainkattarme. 12Tumatin asarum chiki chikichik tribu aina nuiya chiki chikichik shuar etegkatarma. 13Yuus ashi nugkanam iruna nuna Yuusriya nuna arcarin sacerdote aina yanakiar jukiar wena entsa Jordánnum jeawar entsanam wajawartatui. Tumawarmatai entsa jaketsuk nujinmani pajamar asattawai”, tusa tinaiti.
14Tusa timatai sacerdote aina chicham umikmau egkeamun arcan juki wenakai, israelita ainasha entsa Jordánnum katiarartasa wearuiti. 15Tura árak juut tsawan jeakaigka tuke tumau asa, nujagkrua pakari ainanka ashi amur amaunam sacerdote aina arcan juki wenaka Jordánnum jeawar entsanam wajawaruiti. Tumamtai nita nawegka jinararuiti. 16Sacerdote aina entsanam najamawarmatai, entsa nujagkrua auka jaketsuk nujinmani pajamar yaakat Adam tutai Fortaleza Saretán tutaijai iinias amaunam imanai jeashat jeakuiti. Antsu entsa nugkani juakuka jakea jakeakua Nayants Jakau tutainam nagkankauwaiti. Tuma muku jasmatai israelita ainaka yaakat Jericójai iinias amaunmani katiararuiti. 17Sacerdote aina Yuus, chicham umikmau egkeamun arcan yanaki juki wena nuna yanas entsa Jordán kuyua muku jasmaunam nuna nakarin wajainai, israelita ainaka ashi katiararu ainawai.
Currently Selected:
Josué 3: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
