Génesis 45

José wika atumi yachiyaitjai timau

1Tama José útmain nekapu asa nina inatairi ainan chicharuk: ¡Juiyagka ashi jiintratarma! tusa tinaiti. Takai inatai ainasha jiintraruiti. Tumawarmatai nui juak wika atumin yachiyaitjai, tusa tinaiti.

2Tusa senchi útnaiti. Tuman egiptonmaya aina antukaruiti. Tura faraónkan jeen pujuinancha ujakaruiti. 3José yachi ainan chicharuk: Wika Joséyaitjai. ¿Aparsha pujumka? Tusa takai senchi ashamkar aikcharuiti. 4Tumainakai José nina yachi ainan chicharuk: Wait aneasrum wini tantatarma tama jeariaruiti. Tumawarmatai chicharuk: Atumi yachi Joséyaitjai. Atum winaka Egipto nugkanam surutkauwaitrume.

5Turuta akurmesha wait aneasrum wake mesemar enentaimirpa. Tura makumattajipi tu enentaimirpa. Atumka suruttsurminig, tsuka tepeatnun Yuus nekau asa, winaka juni akuptukuiti. 6Tsuka tepeamu jimar uwí jeayi. Turasha tsuka tepea ju nagkamastinka cinco uwí juakai. Nu uwítin árak aramsha tsapaichartatui. 7Tsuka tepeatin asamtai trigo irumnarti, tura tsuka tepeamtaisha shuar ainaka nuna yuina asar pampagkarti tusa, atumka suruttsurminig Yuus winaka nekarawaiti. 8Turuta asa faraónkan apariya numamtuk amajtus, tura faraónka jeen irunun kuitamin atii tusa, egiptonmaya ainan apuri amajtusuiti. 9Wári waketkirum ina apari ujakrum, amina uchiram José chichaak: Yuus winaka egiptonmaya ainan apuri amajtusuiti. Turuta asamtai megkaatsuk wári taati turammayi, tusarum ujattruktarma, tusa tinaiti.

10Nina uchiri ainan, tiragke ainan, tagkuri ainan, tura ninu ainanka ashi yaruak Gosén nugkanam tiijuch pujusti. 11Tumamtai patai ainan, tura ninu ainanka tsukai waittsarai tusan yutai ainan susartatjai. Tsuka tepea ju nagkamastinka cinco uwí juakai, tusa José turammayi tusarum ujattruktarma, tusa tinaiti. 12Wii atumjai chichaamunka, wina yatsur Benjamínsha waitkayi. 13Tuma asarum Egipto nugkanam apu jas pujumai, tura atum jui wainkaurum nu pachisrum ashi ujaktarma. Wári werum wina apar itaatarma, tusa tinaiti.

14Tusa José nina yachi Benjamínjai pagkunaikar útiaruiti. 15Tura yachi chikich ainajaisha pagkunaik útiaruiti. Tumawar Joséjai shir chichasaruiti. 16José yachi aina kaunkarai tamaun faraón antuk, nijai takau ainajai shir aneasaruiti. 17Tuma faraón Josén chicharuk: Amina yatsum aina, burrorin yutain aentskar Canaán nugkanam wakettrarti. 18Tumawar apan, tura pataim ainancha jui ikaankarti. Turawarmatai Egipto nugkan pegkeran susartajai, tura yutaincha pegker ainan susartajai. 19Nuwe ainan, uchi ainan, tura nita aparincha jukiar jui itaawarti tusam carrete aina susam akupkarta. 20Nitanu ainan ikuinaksha wake mesemar enentaimcharti. Nita ikukmaurin nagkasau Egipto nugkanam ariartatui, tusa tinaiti.

21Tama carrete ainan, jinta wesa yuatnun, 22yapajmamatnun nugkutai ainan chiki chikichik susaruiti. Antsu Benjamínnaka trescientos kuitan, tura nugkutaincha cinco susauwaiti. 23Tura warí ainan, trigo ainan, jinta winisa yuatnuncha pan ainan veinte burro ainan aentskar 24aparin akuptak, yachi ainan chicharuk: Jinta wesarum kajernaikairpa, tusa tinaiti.

25Egiptonmaya jiinkiar, Canaán nugkanam nita apari pujamunam jeawaruiti. 26Tumawar José wainkamji. Nigka egiptonmaya ainan apuri jas pujumai tusar aparin ujakaruiti. Tuinakaisha nekaspapi tuinawa tichauwaiti. 27Turasha José timaun imatiksag ujakaruiti. Turuinak amina juramkitnun carrete ainan José akupturmakmai tusa tamaun nisha nuna wainak, uchir pujau asampapi juna akupturaya tusa shir aneasuiti. 28Tuma chichaak: Wina uchir nekas iwáku pujawapi, tuma asamtai iwáku pujaj juik wena wainkatjai, tusa tinaiti.

Currently Selected:

Génesis 45: hubDBL

Highlight

Copy

Compare