Éxodo 3

Yuus Moisésan wantintukmau

1Moiséska nina weari Jetro sacerdote Madiánnumia ajakua nuna ovejari ainan kuitamin asa, yaruak aya nugkanmag wea weakua, Sinaí tura chikich naari Horeb tutainam jeawaiti. 2Tuma nui pujaun númi shikapchich kanakanarin ji keamunmaya, nuna ajapeentrinia Yuus wantintukuiti. Númi keayat esachkai ii wajatu. 3Tumak wainchataina wainja tu enentaimtau. Numisha keayatcha urukamtaig esatsu iistajai tusa werai, 4númi shikapchich keamunmaya Yuus untsuak: ¡Moisésa! ¡Moisésa! tusa tinaiti. Takai Moisés ayak jui pujajai, tusa tinaiti. 5Tusa tama imajaigka taawaipa. Ame wajam nuka wii pujau asamtai nugka shir pegkeraiti. Tuma asamtai ¡zapatoram ukuintrata! 6Tusa nuiyasha chicharuk: Amina uuntrum Abraham, Isaac tura Jacob nu ajakarua nu aina umiru jakmaunka wiyaitjai, tusa tinaiti.#Mt 22.32 Takai nuna antuk Moisés ashamak awenagka iimainchau nekapeak, yapin jaanchjai nukukuiti. 7Tumakai ataksha Yuus chicharuk:

Wii etegkamu aina Egipto nugkanam pujusar waitaina nuna shir wainjai, tura takatan inamin aina senchi inaku waitkainam chichaina nunasha anturkarjai. 8Tuma asan egiptonmaya aina waitkaina nuna agkanmamtikawaran nugka pegker uun amaunam, tura árak aramsha shir tsapainiar neren ainanam, entsa aina nukap irunmaunam tura tagku ainasha nukap pampain ainanam cananeo aina, hitita aina, amorreo aina, ferezeo aina, heveo aina tura jebuseo aina pujuina nui yaruakartasan taajai. 9Egiptonmaya aina shir senchi inaku waitkainam chichainan, anturkarjai. 10Tuma asamtai wii etegkamu aina ame jiirta, tusan faraón pujamunam Egipto nugkanam akupkatjame, tusa tinaiti.#Hch 7.30-35 11Takai Moisés Yuusan ayak: Wika apuchu asan, faraón pujamunam wena israelita ainanka jiimaitsujai, tusa tinaiti. 12Tutai Yuus ayak: Tutsuk wetá, wii amijaigka pujuttajai. Tuma asamtai wii etegkamu aina Egiptonam pujuina nu jiiram, nitajaimak ju nainnum wina emematrittarme, tusa tinaiti.

13Takai Moisés Yuusan chicharuk: Wina pataar israelita ainan jearin Yuus, ina uuntri aina umiru jakmauwa nu, akuptukmatai winajai, tusa tama nita inintainak, nusha yaa naartinaita tusa turutainakaisha ¿wari titajak? tusa tinaiti. 14Takai Yuus chicharuk: Wika “Tuke Puju” tutaiyaitjai.#Ap 4.8 Tuma asamtai israelita aina ininmainakaisha “Yuus Tuke Pujuwa” nu akuptukmatai winajai, tusam titá. 15Nuiyasha Yuus Moisésan chicharuk: Wii etegkamur aina jutiksam tiarta: Yuus Tuke Pujuwa nu, ina uuntri aina Abraham, Isaac tura Jacob nu aina umiru jakmauwa nu akuptukmatai taajai, tusam titá.#Lc 20.37-38 Tura atak chikich pujusartin aina nusha wina naarun pachisar tuke chichartin aina nuka nuwaiti. 16Wetá, tumam Israel shuar ainan apuri aina irumram chicharkum: Ina uuntri Abraham, Isaac tura Jacob nu aina umiru jakmau Yuus, wina wantinturak, israelita ainan, egiptonmaya aina senchi inainak waitkaina nuna wainjai. 17Tuma asan egiptonmaya aina waitkaina nuna agkanmamtikawaran nugka pegker uun amaunam, tura árak aramsha shir tsapainiar neren ainanam, entsa aina nukap irunmaunam tura tagku ainasha nukap pampain ainanam cananeo aina, hitita aina, amorreo aina, ferezeo aina, heveo aina tura jebuseo aina pujuina nui yaruakartasan taajai, tusa timayi, tusam titá.

18Takumin amee shuara apuri aina nekaspapi tawa, tusa turamiartatui. Tura nitajai iruuntram Egiptonam weme faraón jearim chicharkum: Tres tsawan aya nugkanmag jear, Yuus eme anentsa iiyakur tagku aina maa epeattsar wetatji, tusam titá. 19Turasha waitat suachmau asa, Egiptonmaya apu wetaarma tusa atumin turamchattarme nunaka shir nekajai. 20Turasha yaunchuksha wainkachmaun egiptonmaya ainan waittan susartatjai. Turam jinuinakai faraón atumin wetaarma tusa turamtatrume. 21Tura nuiyasha jutsuk weerum tau asan, egiptonmaya ainan, wii etegkamu ainan wait anentrarti tusan pegker enentaimtikrartatjai. 22Turamu asamtai israelita nuwa aina, egiptonmaya nuwa ainan, warí kuit tutaijai najanamu ainan, orojai najanamu ainan tura atumin uchiri aishmag aina, tura nuwa aina nugkurtinnasha jaanchin seawartatui. Turuinak egiptonmaya ainan yarurkartatui, tusa Yuus Moisésan tinaiti.

Currently Selected:

Éxodo 3: hubDBL

Highlight

Copy

Compare