Éxodo 20

Yuus Moisésan chicham umiktin ainan diez susamu

1Yuus israelita ainan chicharuk: 2Atumin Yuusrinka wiyaitjai, atum Egipto nugkanam inaku waitkatai pujarmin jiiruitjarme. 3Chikich aina yuusrimtairi aina nuka ememattsuk, ima winak emematritarma. 4Nayaimpinam, nugkanam tura entsanam iruna nukesha ina yuusri atii tusarmeka najanarum, nu turachkurmesha nakumkarmeksha emematirpa.#1Co 10.14 5Nu aina nuka atumka ememattasrumka tikishmatrairpa, atumin Yuusrinka wiyaitjai, wika Yuus kajenaitjai. Tumau asan wika shuar wina chichamrun umirtichu ainanka, uchiri ainan, tiragke ainan, tura nuna tiragke ainancha waittan suwaitjai.

6Turasha wina chichamrun umirtin aina nu weantu ainanka tuke wait anennaitjai. 7Eme anentrusrum iirchayatrumka wina naar pachisrum chichakairpa. Shuar wina eme anentrus iirchayat, wina naarun pachis chichaakaigka waittan susattajai.#Mt 5.34-37 8Ayamtai tsawanta nuka kajinmatkirpa. Nu tsawanta nunaka ayamainak pujuinak wina ememattriarti, tusan tinaitjai. 9Ashi atum takastasa wakeramuka seis tsawan takastarma. 10Turasha ayamtai tsawantinka ayamratarma. Nu tsawanta nuka wina emematrutai tsawantaiti. Tuma asamtai atumin uchiri, atumin nawantri, atumin inatairi tura chikich shuar atumin jeen pujuinaksha pegkesha takascharti. 11Nayaimpin, nugkan, entsan tura nu ainanam iruna nunasha seis tsawan tumainnum ashi umikuitjai. Antsu siete tsawanta nuigka takaschauwaitjai. Tuma asan nu tsawannaka wina emematrutai tsawan atii tusan pegkernum chicharkauwaitjai.#Mr 2.27; Lc 6.5

12Atumi apari, tura atumi nukurisha chichame umirkatarma. Tumakrumka atum pujustinan nugkan anajmatawaitjarme nui pujakrumsha nukap uwí pujustinaitrume.#Ef 6.2-3 13Magkartuawairpa.#Mt 5.21-22 14Atumi nuwenchuka takasairpa.#Mt 5.27-30 15Kasamkairpa.#Ef 4.28 16Chikich pachisrumka pegkerchau chichakairpa, tura tsanumruraipa.#Ef 4.25 17Chikichnau ainaka wakerukairpa, tusa Yuus tinaiti.#Ro 7.7-14; 13.9-10; Stg 2.10-11

Israelita aina Yuusan ashamkamu

18Yuus Moisésan aujeak ipamat, tura kachu umpuamu uruka imatmaunam jina mukuinturiya numamtin mukuintak káshi jasu asamtai, shuar aina nuna ashamainak ikag wajasar ii iruntuina. 19Tumaina asar Moisésan jeari chicharainak: Yuus ijai chichakaigka jinaawaij, ame Yuusjai chichasam ujakratkata. Turawakmin Yuus timauka metek umiktatji, tusar tiaruiti. 20Tuinakai nitan Moisés chicharuk: Ashamkairpa, junaka tunaun takatsuk winak umirtukarti turamu asa, nekapramas iirmak jutikramarme, tusa Moisés tinaiti.

21Tusa tamasha nainnumka jeatsuk ikan iruuntsaru ainawai. Ima Moisésak Yuus pujamunam yuragkim utsaanar mukusa jas amaunam jeawaiti. 22Tumamtai Yuus Moisésan israelita aina ujaktinan pachis chicharuk: Nayaimpinam pujusnak wii chichamun antukarai. 23Yuus atii tusarum orojai turachkurmesha plata tutaijaigkisha najanarum emematirpa, antsu nuka turutsuk ima winak emematritarma.

Tagku aina maa patasa epetain najanatnun pachis Yuus Moisésan ujakmau

24Wina eme anentsa iirkurum tagku aina maa patasa epeatin najankurmeka, nugkajai najanatarma. Turarum oveja aina tura toro ainasha wina eme anentsa iirkurum nui epeatarma. Nu turakrum israelita aina tunauri tsagkurnar agkanmakatin warí wina surustasrum anajmamu ainaka tagku aina maa patasa epetainam ikuktarma. Nu nugkanam tagku aina maa patasa epetai najanatarma tusa takai nui najanatarma, turawakrumin wii taan atumin pegkernum yaigtasan taattajai. 25Kayanam tagku aina maa patasa epeatin najanattsa wakerakrumsha nunis aig tagkuka epeatarma. Antsu tsupiakrumka nuka tagku aina maa patasa epetai achattawai. 26Tagku aina maa patasa epetainam watai najanawairpa, nui wakrumin shuar aina misu waitmakairum.

Currently Selected:

Éxodo 20: hubDBL

Highlight

Copy

Compare