Deuteronomio 6

Chicham yama nagkamchaku umimain pachisa timau

1Moisés ni shuar ainan chicharuk: Ju chicham umiktin aina juka, Yuus nugkan suramsattsa anajmatramawa nui jearum pujakrumsha umiktin asaakrumin jintintawarta tusa wina turutnaiti. 2Atum ainatirmeka chicham umiktarma tusa Yuus turammaun, wii yamai jintinjarum nuka araantusa iiyaakrum tuke umisrumke atin ataarma. Tura atumi uchiri aina, tura atumi tiragke ainasha nuna metek uminakka nukap uwí pujusartin ainawai. 3Tuma asamtai chicham umiktina nuka atumka metek umiktin ataarma. Nu metek umiakrumka Yuus ina uuntri ainan nugka pegker, árak aramsha shir tsapainiar neren ainanam, tura tagku ainasha nukap pampain ainanam pujusrum pampagtin ainarme tusa Yuus ina uuntri umiru jakarua nu turamnaitrum tumasrumek shir nukap pampagtin ainarme. 4Wina pataar ainata wii titatjarum nu antuktarma: Ina Yuusri, ii umirnaitaj nuka ima chikichkiti. 5Tuma asamtai ina Yuusriya nu ima senchi anetarma. Turakrum ima ninig enentaimsarum pujustarma, Yuus wakeramua nuke takastarma.#Mr 12.29-30; Lc 10.27 6Yuus timaun chicham umiktinan atumin ujajrum nu tuke aneaku atin ataarma. 7Tumakrum atumin jeen pujakrumsha, wekakrumsha, kanartasrum tepakrumsha tura káshik nantakrumsha atumin uchiri ainaka tuke ujatin ataarma. 8Chicham umiktin aina nu aarum atumin kunturin patakematarma, tura nijainumsha jigkamatarma. 9Nuiyasha atumi jeen waitirincha aartarma, tura yaakta waitirincha aartarma, tusa Moisés ni shuar ainan tinaiti.

Moisés ni shuar ainan Yuusa nuke umirkatin ataarma tusa timau

10Ina Yuusriya nu Abrahaman, Isaackan, tura Jacobon nu ainan nugkan ni weantu ainatirmin suramsattsa anajmatramawaitrum nui ejétamtattrume, nu nugkanam yaakat uun aina atum yaktamkashmau shir uun, tura nuiyasha shir pegkeraiti. 11Tura atum warí pegker aina sumakchamu pimasa wearmaunam, atum árak juuka irumrachmau ainan, atum taichmau yumirmatai aina yaunchuk ataukmau ainanam, tura nu nugkanmagka aja aina iruntatui. Atum ajama arakchamu uva aina, tura atum ajama arachmau olivo aina nusha juuka yuakrum shir ejemarum pujustatrume. 12Tumakrumsha atum egiptonmaya aina inaku waitkam pujautirmin Yuus jiirmaruitrum nu kajinmattsuk aneakuk ataarma. 13Tuma asamtai ina Yuusriya nu eme anentsa iiyakrum nigki umirkatin ataarma. Chikich aina antuinamunam atum umiktin pachisrum chichakrumka, Yuusa naari pachisan tajai tusarum titin ataarma. 14Tura nu nugkanam matsamsarmesha chikich shuar, nu yaakta yantamen matsataina nuna yuusrimtairigka atum ainatirmeka Yuusa iman enentaimtusrum iistin airpa. 15Yuus atumjai puja nuka anenmau asa winak eme anentrus iirainak umirtukarti tusa wakerinaiti. Tumau asa atum nekas yuuschauwa nu eme anentsa iiyakruminka atumin kajertamak ashi ijitmamainaitrume.

16Masá nugkanam Yuusan nekapu jaku aina numamtukka, “atumi Yuusri nekapsairpa”. #Ex 17.1-7 17Atumin Yuus wina chichamur umiktarma tusa aarmaun suramsamua nuka turusrumek metek umiktarma. 18Atumka pegker aina, tura Yuus shir enentaimtikmaina nuke takastarma, nu turakrumka Yuus ina uuntri ainan nekas susartinaitjai tusa anajmatawaiti. Nu nugka shir pegkera nui jearum pujakrumsha pegker pujustin ainarme. 19Nuiyasha ni tina turusag, atum wainmaunam atumi shuari ainancha jiirtinaiti. 20Chikich tsawantin, atumi uchiri aina chichainak: Yuuscha urukamtai ju chicham ainancha umiktarma tusasha turamnaitrum tusa ininmainakaigka, 21atum ayakrum: Ika yaunchukka Egiptonmaya apu aantra inaku waitkatai pujujakuitji. Turasha ina Yuus nina senchirijai inka jiirmaruitji. 22Egiptonmaya apun, tura ni shuar ainajaimak wainchatai ashammain ainan, Yuus nina senchirijai iwaintamu wainkauwaitji. 23Turasha ii ainatinka nu nugkanam pujarin jiirmar juramki, ina uuntri ainan nugkan anajmatawa nui ejétami nu nugkan suramsauwaitji. 24Tura suramsau asa Yuus chichartamuk: Wina eme anentsa iirkurum, ju chicham umiktin aarmau aina juka metek umiktarma, tumakruminka yamai iwáku nukap uwí pujarum antsag pujusarti tusan yaigtatjarme tusa ina Yuusri turamnaitrume. 25Chicham umiktarma tusa turamna nu metek umiakrumnaka, ina Yuusri atum takasmaun pachis chichartamuk: Atumka pegker takasu ainarme, tusa turamtinaitrume tusa Moisés ni shuar ainan tinaiti.

Currently Selected:

Deuteronomio 6: hubDBL

Highlight

Copy

Compare