1 Samuel 2
2
Aná kantamamu
1Tuma Aná kantamuk Yuusan aujeak:
“Yuusru,
wika amini enentaimkun shir aneajai,
Yuusru, winaka ame senchimtikrame.
Ame uwemtikruru asaakmin,
wika shir aneajai.
Tuma asan wina kajertin ainan
pachisnasha chichamainaitjai.
2¡Yuusru, ame imau Pegkerka atsawai!
¡Ina Yuusriya, ame ayamkartinaitam imauka pegke atsawai!
¡Amina nagkatamsauka chikichka atsawai!
3Chikichkiksha ememas chichamain ainatsui.
Chikichkiksha yachajai metekka chichamain ainatsui.
Yuusa nuketi, ashi nekauka.
Tura niyaiti shuar aina pegkerchau takainamurin iis waittan suka.
4Shuar senchirtin ainan senchirtinchau amajuk,
shuar senchirtinchau ainan senchirtin amajsauwaiti.
5Yaunchuk yumaintri nukap arujakmau,
yamaika chikichik pan yuataj tamaunam takak waitainawai.
Turasha yaunchuk tsukai waitujaku aina,
yamai waitainatsui.
Nuwa uchin jurechu ajakusha,
nuwa uchin juren aina nuna nagkasau yamai siete uchin jurenawai.
Turasha chikich nugkanmaya nuwa aina nukap uchin juren ajakaruka,
yamaika pegke uchirmachu ainawai.
6Yuuska jakatnun,
tura pujutnasha sukartinaiti.
Tura jakakrincha ina patai aina,
ikuumatainam ikurmasarmataisha
ataksha inantamki pujutan suramsatnaitji.
7Yuuska kuitrinchau amajkartinaiti,
turachkusha wiakchasha amajkartinaiti.
Ni sukartusmaun atankartuksha,
nigki ataksha imatiksag sukartinaiti.
8Nigka shuar kuitrinchau ainancha yainaiti.
Tura apu aina matsatmaunam eme anentsa iitai amajsam apujnaitme.
Shuar arantsa iitaiya nujai metek amajsam,
apu ainajai ekeemsati tusam arantsa iitai amajsam inainaitme.
Yuusa nuwaiti,
ashi nugkanam iruna nuna nerennurigka.
Tuma asa niyaiti ashi nugkanam iruna nuna iiyaaka.
9Shuar ninak nekaspapita tusa umira nuna tuig wekait nuisha kuitamnaiti.
Turasha shuar tunau ainaka jinuinawai,
tumawar waittanam wenawai,
chikichik shuar nina senchirijaigka,
ayamrumamaitsui.
10¡Yuus nina shuari ainan ijinattawai!
Nayaimpinam pujus nayaimpinmayan pem ainan ashammainan akuptuktatui.
Yuus shuar ainan nita takasmauri ainan iiras waittan susattawai,
Tura ni apu atii tusa etegkamunak nu nukap amajsattawai” tusa Aná tinaiti.
11Elcana, tura Anájai nina jeen yaakat Ramánam waketkiaruiti. Turasha uchi Samuelka Yuusan takarsattsa sacerdote Elíjai juakuiti.
Elí uchiri aina tunaun takasmau pachisa aujmatmau
12Elíka uchiri ainajaimak sacerdote ajakuiti. Turasha uchiri ainaka pegkerchau asar Yuusan arantus iijakcharu ainawai. 13Tumaina asar sacerdote aina uruk takamainaita nujai metekka takainachu. Tumainak israelita aina tunaun tsagkurnartasa tagkun maa inarkattsa pujurun sacerdote inatairi akupkamu tenedoran uuntan juki jeari, 14sacerdotenu atin juaji tusar namag shir narachunak tenedorjai ijuar jiir yarumaina. Turuinak israelita aina yaakat Siló jeawar Yuusan ememattasar wenanka waitkaina. 15Tura nuiyasha kuntina kuntuti tagku epetainam epeattsa pujurun sacerdote inatairi taa chicharuk: “Sacerdotenu atinka wina namag surusta wii inartuktajai. Sacerdoteka namag inaraamunka nakitawai” tusa tuina. 16Tuinakai shuar ayak: Jasta yama nagkamchakun Yuus timauwa turusnak kuntinan kuntutin epeatjai. Turamtai ame wakeramu jukita, tusa tinaiti. Takai sacerdote inatairi chichaak: Atsaa tutsuk yamaik surusta, nu surachkuminka atankittajme, tusa tinaiti. 17Tumaina asar Elí uchiri ainaka Yuus iismaka shir pegkerchaun takajakaruiti. Tura Yuus anajmata suamuncha arantus iitsuk nita wakeramun takajakaruiti.
18Turasha uchi Samuelka Yuusan umirujakuiti. Tura nigka sacerdote nugkutain jaanchin linojai aparmaun nugkujakuiti. 19Tura nina nukuri apari Yuus ememattasa iruuntai jeanam jea, tagkun maa epeak Yuusan ememattasa weakka uwí nukapek nina uchiri Samuel nugkurtinan ni najanamun jaanchin juki wejakuiti. 20Tura nina jeen wakettsuk Elí, Elcanan nina nuwe Anájai pegkernum chicharuk: Uchi anentak Yuus anajmata susaume. Nu turamu asa, ni amina uchiram artinnasha amasti, tusa tinaiti. Tutai nita jeen waketkiaruiti. 21Tura Yuus pegkernum yayámu asa Aná tres uchin aishmagkun, tura jimar nuwan uchirmakuiti. Samuelka Yuus kuitamam tsaka, tura ninak takaruk nuig pujau.
22Elíka shir uuntach jasuiti. Tuma pujau nina uchiri Israel shuar aina nita tunauri tsagkurnartinan tagku ainan maa epenan waitkainawai tamaun nekawaiti. Tura nuiyasha nuwa ainan Yuus ememattasa iruuntai jea pegkera nuna waitirin takainak matsatainancha takamainawai tamaun nekawaiti. 23Tuma nitan chicharuk: Atum pegkerchau takainamun ashi shuar aina ujatainan antajai. ¡Wait aneasrum nuninka airpa! 24Atum tu takámun antaj nuka shir pegkerchauwaiti. Tura nuiyasha chikich Yuusa nemarin aina atumin pachitmasar chichainancha antajai. 25Chikichik shuar, chikich shuaran pegkerchau takarkaigka Yuus iis ayamrumainaiti. Antsu pegkerchauwaiti tusa timaun nekayat takanka nu shuar tumaun ayamrumainka pegkesha atsawai, tusa tinaiti. Turasha nita apari tamasha anturkacharu ainawai. Nita pegkerchau takaina asarmatai Yuus nitanka jinawarti tusa wakerukuiti.
26Turasha Samuelka nu senchi tsaka. Tumakai Yuus tura shuar ainasha ni ima pegker taká asamtai shir enentaimtuina.
27Nu tsawantin Yuusa chichamen etserin Elín irarsatjai tusa jeawaiti. Tuma chicharuk: Yaunchuk amina uuntrun ajakaru ainan, apu faraón Egipto nugkanam takamtikuk waitka pujurmaun wii Yuusaitaj nuna wantintukam nekarawaru ainawai. 28Tura Israel weantu nuiyan shuar Leví weantunmayan wina sacerdoter arti tusan etegkawaruitjai. Tagku ainan maa epenak emematriarti, tura kugkuinan epenak, tura jaanch sacerdote nugkutaincha nugkurti. Tura israelita aina anenkan wina suruinak epeawartata nunasha yuawarti tusan amina uuntrun ajakarua nunasha tinaitjai. 29Wii tura aisha ¿urukamtai wii tu takastarma tusan tinaitjarum nusha umitskesha inaisaurme? Ameka wina nagkatasu amina uchiram eme enentaimta asam, Israel shuar aina wina anajmatruawar suruina nu pegker iisrum nukap jukirum yua yuakuarum nuwekurme.
30Yuus chichaak: Amina uuntrum Aarón ajakua nuna chicharkun, ame weantu aina sacerdote tuke arti tusan tinaitjai. Turasha yamaika ame, tura ame weantu artina nuka sacerdote achartinaiti. Wika yamaika wina eme anentruina nuna eme anentajai. Turasha wina nakitruina nunaka wisha nakitrattajai turamui. 31Ame weantu aina nuka yamai nagkamsagka sacerdoteka achartatui. Tuma asamtai ame weantu aishmag aina nuka uuntach jatsuk natsa ainayat jinawartatui. 32Wii chikich Israel shuar ainan pegkernum yayákai, ameka nu iisam ame waitakum kajetnaitme. 33Ujumak shuar ame weantu aina wina emematruinak, tagku ainan maa epen arti tusa etegkamu akusha, chikich aina takainakai iisar kajenak wake mesemar nekapenak útiartinaiti. Tura ame weantu ainaka uuntach jatsuk natsaitak jinawartatui. 34Amina uchiram jimara nu, Ofni, Fineesjai chikichik tsawanta nui mai jakattawai. Tumamtai nekaam nekaspapita tusam turuttatme.
35Chikich weantunmayan wina chichamrun metek umimainan iisan chikichik sacerdoten etegkattajai. Tura ni weantu ainan kuitamkattajai. Turamu asar nitaka wamak jinutsuk wii apu etegkamua nu chichamun umirkarti tusan yaigtatjai. 36Tura ame weantu aina jinachu aina nu sacerdoten jeari ishichik yutain turachkusha, kuitan seainak tikishmatar chichainak: Winasha takat takasa kuit juki sumaka yumain surusta tusa tiartinaiti tusa, Yuus tawai tusa Elín ujakuiti.
Currently Selected:
1 Samuel 2: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
