1 Samuel 17

David Goliatan maamu

1Filisteo aina israelita ainajai maaniawartasa Judá weantu aina nugkeen yaakat Soco tutainam iruuntraruiti. Tuma Azeca Socojai iinias a nuna ajapeen nugka Efes-damim tutainam aakmarar matsataina. 2Tura Saúlsha israelita ainajai tumasag filisteo ainajai maaniattsa nugka Elá tutainam aakmarar iruuntraruiti. 3Tura nain paka amaunam filisteo aina chikich yantamnum matsatainai israelita ainaka chikich yantamnum matsataina. 4Tumamunam filisteo ainanmaya chikichik shuar maanitan yacha Goliat naartin tres metros ajakua nu jinnaiti. Nuka yaakat Gatnumia ajakuiti. 5Tura etsegkrutain jiirujai najanamun etsegkruk, tura iyashi ajaktinan jiru najanamun cincuenta y cinco kilo aramun nugkuaru ajakuiti. 6Tura nina makuin ajaktasa apuju jakua nusha jiiru bronce najanamu ajakuiti. Tumasag nagkirisha jiiru bronce najanamu ajakuiti. 7Tura nagkiri numirisha kampuram ajakuiti, tura nuna tsakarigka jiiru hierro chuchukeamu seis kilos arujakuiti. Tura nina yain chikichik shuar emak wujakuiti. 8Goliat israelita ainan wainak chicharuk:

Atumsha ¿urukamtai maaniattsarmesha ima nukapsha winarme? Wika filisteo shuaraitjai, atumka Saúlan inatairi ainarme. Tuma asamtai wii wajaj jui akaiki taa maaniatin, atum ainarum nuiya chikichik shuar etegkarum akupkatarma. 9Nu shuar maanitan yacha asa, wina mantuamtaigka wina pataar ainaka atumin inatairi artatui. Antsu wii nina maamtaigka atum ainatirmeka ina inatairi atattrume, tusa tinaiti. 10Yamai ju tsawanta jui Israel shuar ainatirmin seajrume: ¡Wijai maaniktin chikichik shuar akupkatarma! 11Takai antukar israelita ainaka nuna ashamainak maanimainchau nekapraruiti.

12Saúl puju jakua nu tsawantin yaakat Belénnum chikichik shuar Isaí naartin uuntach pujujakuiti. Nuna uchiri ocho arujakuiti. Nu aina nuiya David naartin pujujakuiti. 13-14Uchiri iwairi tres ajakua nuka: Eliab, Abinadab, tura Samá nu ainaka maaniamunam Saúljai wearuiti. Tura uchiri ekeu Davidka, 15Saúl nina suntaari aina matsatmaunam chichaman etseruk, tura apari tagkuri ainan kuitam ja pujau. 16Tuma pujaun, káshik agkuantaisha tuke tsawantin Goliat chichaak: Chikichik shuar wijai maaniatin etegka akupkatarma tusa cuarenta tsawan ta takua ejénaiti.

17Chikichik tsawantin Isaí nina uchiri Davidtan chicharuk: “Amina yatsum aina maaniamunam wearma nu, trigo shir inaraamu veinte litros jukim, tura diez pan jukim suwarta. 18Nuiyasha diez queso suntara apuri susatin jukita. Tura jeam nekata yatsum ainasha shirash matsataina, tura shir matsatainakka papiin aar akupturkarmatai nuna wainkan shirapi matsatainawa tusan nekatjai” tusa tinaiti. 19Tumai Saúl Davidta yachi aina nujai, tura ashi israelita aina nujai nugka Elá tutainam filisteo ainajai maaniak matsataina.

20Tumainai David uminas tsawak káshikmas, chikich shuaran ame oveja aina kuitamata tusa ikuak nina apari yutai aina susamun juki yachi aina matsatmaunam wuwaiti. Tuma nita matsatmaunam jeajkama filisteo ainajai maaniawartasa uminas untsumainamunam jeawaiti. 21Israelita aina filisteo ainajai maaniawartasa mai metek igkuniak irunmaunam jeawaiti. 22Tuma yutai aina juki weamunka, shuar nagki maanitai ainan, tura yutai ainan kuitamuk pujaun ame kuitamata tusa ikuki, yachi ainan pegkerash matsataina tusa inias nekattsa jeawaiti. 23Tuma yachi ainan jeari aujeak wajai, Goliat maanitan yacha yaakat Gatnumia ajakua nu filisteo aina irunmaunmaya jinki yaunchuk nagkama israelita ainan atsaneak tujakua tumasag chichan David anturkauwaiti.

24Nu shuaran israelita aina wainkar ashamak tsekear, 25chichainak: ¡Shuar maanitan yacha jinki au iistarma! ¡Israel shuar ainatin atsantamak tayi!. Yáki auna nepetkat nunaka, warí shir akik ainan, wina nawantrun nuatkati tusan susattajai, tura nuiyasha nina patai ainaka apunu kuit akikmatai aina nunaka akikmakchattawai, tusa apu timayi tuina.

26Tuinakai David chichainamun shir antukchau asa, ninii ayaamas irunun iniak: Filisteo Israel shuar ainan atsanuk waitka auna chikichik shuar maamtaisha ¿apusha warina sumainaitjai tawa? filisteo Yuusnauchu aina nusha, ¿ya asaya Yuus etegkamu ainan pegkerchausha chicharusha wekawa? 27Takai yaunchuk timauwa turusag Goliatan maaka warí ainan apu susattajai tusa timayi, tusa ujakaruiti.

28Tusa takai Davidtan kajerak Eliab chicharuk: ¿Amesha oveja ainasha ya apujtukmea tamsha tusha wekame? Wika ame shir enentaimkachuitam nunaka shir nekajai. Ameka ina shuari ainajai maaniamu iistasam taume, tusa tinaiti. 29Takai David ayak: “Wii aya inimaj nuisha, ¿wari pegkerchauna takasja?” tusa tinaiti.

30Takai yachi ainan ikuki, chikich ainancha turusag inia. Takai nitasha yaunchuk timaunak turusag ujakaruiti. 31Tu David inimuu wekakai chikich aina antukaru Saúlan ujakaruiti. Turam Saúl Davidtan taati tusa untsukuiti. 32Tura David, Saúlan jeari chicharuk: “Apu ameka ishichkisha ashamkaipa wii nijaigka maaniattajai” tusa tinaiti. 33Tamaitiat Saúl, Davidtan chicharuk: “Atsaa, ameka uchiich asam nijaigka maanimaitsume. Nigka uchichik asag maanitan yacha ajakuiti” tusa tinaiti.

34Takai David Saúlan chicharuk: Apu wika wina aparnaun tagkun kuitamrinaitjai. Tumau asan, uun yawa turachkusha osoksha ovejan asai juki weakaigka, 35patatukan nina weneyan atannajai. Tura wina asattaj takaigka jagkenam achikan turachkuncha ushukrutairjai awatin mainajai. 36Numamtuk au filisteo shuar Yuusnauchu ayat, Yuus etegkamuri ainan atsaneak wishiku puja auna maattajai, tusa tinaiti.

37Nuiyasha chichaak: Uun yawa, chaijai maawaig tusa Yuus ayamturu jakua numamtuk yamaisha filisteo maawaig tusa ayamrutkattawai. Takai Saúl Davidtan chicharuk: “Takumka wetá, Yuus pegkernum yainmakti” tusa tinaiti.

38Nuna tusa ni etsegkrakmaurin jiiru bronce najanamun etsegkrumtikauwaiti, nugkutai jirujai najanamuncha anugkrauwaiti. 39Tura kuchiincha ikichnum netuawaiti, turamaitiat kijin asamtai nujaigka wekamainchau nekapea asa, Saúlan chicharuk: Juka kijin asarmatai kakaaran maanimainchau nekapeajai, tuma asan junisnak wetajai tusa tinaiti. 40Tusa nina ushukrutairin, tura chigki maatairin juki, nuiyasha cinco kayan shikapach ainan wampachrin egkea juki, Goliatjai igkuniaktasa wuwaiti.

41Tumai Goliatcha maaniaku ajamaktinan takaku Davidtan igkugtasa wea, chikichik shuar nina yain emak maaniaku ajamaktinan juki weakai nigka ukunam wujakuiti. 42Tura Goliat Davidtan iikma natsa pegkerin wainkauwaiti. Turasha arantsagkesha enentaimtus iischauwaiti. 43Tuma asa Davidtan numin takus wajaun wainak wishikiak chicharuk: “¿Wika yawakaitaj númi juruki winitam atinnasha?” tusa nina yuusrimtairin naarin pachis Davidtan pegkerchau chicharkauwaiti. 44Jui taata, tumawakmin amina maan chuag ainan, tura yukartin ikamia aina nuna amina iyashmin ayurawartajai, tusa tinaiti.

45Takai David Goliatan ayak: Ameka nagki, tura kuchii nu aina jukim winame, antsu wika aminka Israel shuar ainan Yuusri ashi senchirtina nuna naarijai winitjame. Ameka, Yuus etegkamu israelita suntar aina atsaneakum wishikiame. 46Tuma asamtai amina maati tusa Yuus yainkattawai. Tura amina maan muukmin tsupiktatjai, tura iyashmin, amina suntarum aina jinawartata nuna iyashijaimak chuag aina, kuntin yukartin ainajaimak yuawartatui. Turamtai ashi nugkanam shuar aina Israel shuar ainan Yuusri ashi senchirtin chikichkia nuna nekawartatui. 47Ashi jui iruntrum nutiram, israelita ainan Yuusriya nuka senchirtin asa, ni etegkamu ainanka kuchiijainchu, tura nagkijainchu ayamrukai tusar ashi nekawartatui, tusa tinaiti.

48Tamaitiat Goliat Davidjai maaniktasa werinaiti. Tumakai Davidcha nijai maaniattsa tsekenki jearnaiti. 49Tuma David kayan wampachnumian jusa chigki maatairijai Goliatan nagkia nijainum tukuwaiti, turam Goliat jaka iyaaruiti. 50-51Tumamtai tsekenki nigka kuchiin achiakchau asa nina kuchiirinak juruki iju maawaiti. Tura muuken tsupirkauwaiti. Nigka kuchin achiakchayat ima chigki nagkitairijaig maawaiti. Turamtai nu maanitan yacha maantuamu asa filisteo aina nuna wainkar sapijmainak tsekeararuiti. 52Tumawarmatai israelita aina Judá weantu ainajai senchi untsumkar filisteo ainajai maaniami tusar patatukar mai mainakua nita yaaktarin Gatnum tura Ecrón ajakua imanai ejéniaruiti. Tura jinta Saaraimnum nagkama juaki Gatnum, tura Ecrón wetainmasha filisteo aina jinaka tepet tepet jea.

53Tura israelita aina, filisteo ainan patatukar ijina waketrauwaiti. Tumawar filisteo aina jeen shiakar waríri ainan ashi yarutkaruiti. 54Turawarmatai David Goliatan muuken juki Jerusalén ejénaiti. Antsu nagkiri ainanka nina jeen jukinaiti. 55Yaunchuk, David Goliatjai maaniktasa weakai Saúl suntara apurin Abner ajakua nuna iniak: “¿Ausha yana uchirimpaita?” tusa tinaiti.

56Takai Abner ayak: “Wina apuru pegke nekatsjai” tusa tinaiti. Takai apu Saúl chicharuk: “Nekas tame inimsam nekata” tusa tinaiti.

57David, Goliatan maa muuken tsupik juki winaun, Abner juki Saúlan ejétinaiti. 58Turamtai Saúl iniak: “Amesha yana uchiriyaitmea ujatkata” tusa tinaiti. Takai David ayak: “Wika apu amina inatairin Isaí Belénnum pujuwa nuna uchiriyaitjai” tusa tinaiti.

Currently Selected:

1 Samuel 17: hubDBL

Highlight

Copy

Compare