1 Samuel 16

Samuel Davidtan apu atin asamtai aceitejai muuknum ukattramu

1Samuel tuma pujau asamtai, chikichik tsawantin Yuus chicharuk: “¡Saúla iturchattri enentaimtakum wake mesemar pujakum waitu pujuipa! Ninka Israel shuar ainan apuri atii tusanka yamaika wakeratsjai. Ani pujutsuk aceite jukim Isaí jeen yaakat Belénnum wetá. Wii nina uchiri aina nuiyan israelita ainan apuri atii tusan chikichik etegkattajai” tusa tinaiti. 2Takai Samuel ayak: ¿Wisha uruk wetajak? Saúl nuna nekaa wina maantuawai tusan ashamajai, tusa tinaiti. Tusa takai Yuus chicharuk: Chikichik vaca tsakat jukim, juna maan Yuusan eme anentsa iiyakun epeattsan weajai tusam titá. 3Tuma jeam Isaí ipaata, tura ni uyuntamsamtai tagku maa epeakmin yáki apu atii nuna nekamtikattajme. Turamtai ame aceitejai muuknum ukatrattame, tusa tinaiti.

4Tama Samuel Yuus timaun metek umikuiti. Tura Samuel Belén jeamtai nuiya apu aina ashamaina asar jeari ininak: ¿Yaigkratkattsamek tame? tusa tuina. 5Tutai ayak: Atumin yaigtasnaka tachajai. Wika Yuusan eme anentsa iiyakun tagku ainan maa epeakun nuna namagken ajamnaisattsan taajai. Tuma asamtai umintsatarma, tumarum Yuusan eme anentsa iiyakun tagku ainan maa epeakai uyuntustarma, tusa tinaiti. Tusa Samuel Isaín, tura uchiri ainajaimak tunau takasmaurin pegkermamtika tagku aina maa epeatnunam nijaimak wuwaiti.

6Tuma jea Samuel, Isaí uchiri yama nagkamchak akinawa nuna Eliabpan wainkauwaiti, tuma enentaimuk: “Yuus apu atii tusa etegkamuka auwapita tu enentaimkai”, 7Yuus chicharuk: Ameka shuara iyashi iirsam etegkeame. Antsu wika shuaran enentaimtairin iirsan etegnaitjai, tusa tinaiti. 8Takai chikichnasha Isaí uchiri Abinadabpan Samuelan iwaintukaruiti. Turamtai Yuus Samuelan chicharuk: Apu atii tusan wii etegkamuka juchauwaiti tusa tinaiti. Tama Samuel Isaín chicharuk: Yuus apu atii tusa etegkamuka juchauwaiti tusa tawai tinaiti. 9Takai Isaí chikichnasha uchirin Samá naartinan itawaiti, turamtai Samuel chichaak: Junasha Yuus apu atii tatsui, tusa tinaiti. 10Takai Isaí nina uchiri ainan chiki chikichik Samuelan iwai iwaintakua siete uchiri aramunka ashi iwaintukuiti. Turasha Samuel chichaak: Ju uchi aina juiyanka chikichkinkisha Yuus etegkachai, tusa tinaiti. 11Tusa Samuel inagnamun Isaín iniak: ¿Amina uchiram chikichka atsawak? tusa tinaiti. Takai chikichik uchi tagkun kuitamuk pujawai, turasha nuka natsaiti, tusa tinaiti. Tusa takai Samuel chicharuk: Chikichik shuar akuptukam itaata nu tashkaigka tagku maa epeamua nuna namagkegka yuashtatji, tusa tinaiti.

12Takai Isaí, uchi utitarma tusa shuaran akuptukuiti. Tura nu uchika pegkeri ajakuiti. Nuna uchin itarmatai Yuus Samuelan chicharuk: Apu atii tusa wii etegkamuka auwaiti. Tuma asamtai aceite jukim muuknum ukattrata, tusa tinaiti. 13Takai aceiten juki yachi ainasha iimainamunam israelita ainan apuri atii tusa Davidtan muuknum ukattrauwaiti. Turamtai nu tsawanta nui nagkamas Yuusa Wakaní Davidtan yaigtasa taruawaiti. Tura Samuel nina jeen yaakat Ramánam waketkinaiti.

David arpan awatmau

14Yuus nina Wakanin Saúlan juruknaiti. Tura wakan pegkerchaun akuptukuiti. Turamu asa Saúlan wakan pegkerchauwa nu senchi waitka. 15Tuma asamtai nina inatairi aina chicharainak: “Yuus wakan pegkerchaun akupturmakmauwa nu senchi waitkarmawai”. 16Tuma asamtai wakan pegkerchau egkemtur waitkakai, nina inatairi aina Saúlan chicharainak: Wakan pegkerchau amina waitkarmakai weti tusa arpan awattin eamainaitji, tusar tiaruiti. 17Tuinakai Saúl nina inatairi ainan chicharuk: Arpan awattan nekau eakrum itartitarma, tusa tinaiti. 18Takai ni inatai aina nuiya chikichik Saúlan chicharuk: “Arpan shir awatnun Isaí uchirin yaakat Belén puja nuna nekajai, nuka maanitan yacha, chichamesha pegker, iimisha shir iwaramu, tura nuiya Yuusa nusha yayáwai” tusa tinaiti.

19Tusa tutai Saúl Isaín chichaman akuptak: “Uchiram David ovejan kuitamna nu akupturkata” tusa tinaiti. 20Nuna Isaí antuk uchiri Davidtan awetinaiti. Turak burronam pankan patar, vinon aimkamun, tura cabra tsakatan Saúlan akuptukuiti. 21Nuna yaruak David, Saúl pujamunam jeawaiti. Tumamtai Saúl shir anentas jukinaiti. Tura nina yain atinan anaikauwaiti. 22Tura Saúl Isaín chichaman akuptak: “Amina uchiram David shir amajtawai, tuma asamtai seajme wait aneasam inaitursata wina yaintuk pujusti” tusa tinaiti. 23Wakan pegkerchau Yuus akupkamu Saúlan waitkakai, David arpan juki awatu jakuiti. Nuna awatkai wakan pegkerchau Saúlan waitka ikukim shir pujujakuiti.

Currently Selected:

1 Samuel 16: hubDBL

Highlight

Copy

Compare