1 Samuel 12
12
Samuel Saúlan ame inamrata timau
1Samuel ashi israelita ainan chicharuk: Ashi atum seatmaunka turusnak umiakun atumi apuri atinnasha anaitukjarme. 2Tuma asamtai yamaika atumi apuri inatmartatrume. Wika uuntach jasu asan jemperurjai, tura wina uchir ainaka atumjai matsatainawai. Wika natsa asan nagkaman atumi apuri jasan taká takakuan tsawantan yamai ejéjai.
3Wii atumin tagkuri aina jurukmau akurmeka, tura wii waitkasmau akurmeka, tura chicham iwarturata tusa akirkau akurmeka yamai Yuusa emtin, tura atumi apurin etegkamua nuna emtin wii pegkerchau takasu akaigka turuttarma, tusa tinaiti. 4Takai nita aimainak: Inka pegkesha waittaka sukartuschauwaitme, tura chikichkiksha kasarkachuitme, tura chichaman iwarturati tusamkesha chikichkiksha kuitka sea jakchauwaitme, tusa tuina.
5Tusa tuinakai Samuel chichaak: Yamaika Yuusa emtin tura apu etegkamua nuna emtin wina iturchatur amaina nuka pegkesha wainkachurme, tusa tinaiti. Takai nita aimainak ame tame nuka nekasaiti, tusa tuina. 6Nuiyasha Samuel israelita ainan chicharuk: Egiptonmaya aina atumi uuntri aina waitkam matsatun Yuus Moisésan tura Aarónjai akuptuk jiirua nusha nekawai. 7Atum ima Yuusak nekaspapita tusarum umirtsuk atumi apuri atin seameakrum tunau takasu ainarum nuna nekamtikattajrume. Tura atumin uuntri ajaku ainan Yuus uwemtikattsa turawa nuna yamai nekamtikattajrume. 8Jacob nina patai ainajai Egipto nugkanam jeawar matsamsarmatai, nuiya shuar aina senchi waitkainam Yuusa yainkratkata tusar aujsaru ainawai. Tumainakai Yuus antuk Moisésan tura Aarónjai akuptukuiti. Turamtai ina uuntri ainan jiir ju nugkanam ikaunmawaiti. 9Turamaitiat nita Yuusri umirtanka inaisaruiti. Tumawarmatai nita shuari aina maaniamunam nepetkarti tusa Yuus timau asa Jabín Hasoran apuri ajakua nu nina suntaari ainajai. Tura filisteo aina, Moabnumia shuar aina nu maaniamunam nepetkau ainawai. 10Turawaram Yuusan aujainak: Baal najanamu, tura Astarté najanamusha emematkur tunau takasji. Wait aneasam ina shuari waitkarmaina nu nepetkam yaigkratkata. Turukratawakmin ame wakeramua nuke umiktaji, tusar tuina.
11Nuna tuinakai Yuus Jerobaalan, Barackan, Jeftén tura wina Samuelan nita shuari ainan nepettukar agkanmamtikawarti tusa akupturmakuitrume. Tu ayamrukmau asar ina uuntri ainaka shir matsamajakaru ainawai. Tura yamai atumsha nukap tsawan atumi shuari waitkascham agkan matsatrume. 12Atumi Yuusri nekayatrum, amonita aina apuri Nahas atumjai maaniatjai takai antukrum, atumek isha apurtin ami turam ni ayamrutmaktaji tusarum tinaitrume.
13Atumi apuri atin seamuitrum nuna, Yuus yamai atumin suramsaurme. 14Tuma asamtai yamai atumi apurijai umiktatrum nuka juwaiti: Yuusa nuke eme anentsa iiyakrum nigki umirkatarma. Tumakrumka pegker pujustatrume. 15Turasha ni umiktarum turammau umitsuk inaiyakruminka Yuus atumin tura atumi apurijai waittan amastinaitrume.
16Tuma asamtai shir matsamsatarma, Yuus atum ainatirmin wainchatai ainan nina senchirin iwainamu wainkattarme. 17Tura yamai tsawan aina nuka trigo juut asamtai yumi yutatsu nuka nekarme. Nu tuma asamtai nuna pachisan Yuusan wii aujsamtai, ni ipamtajai yumin yutumtikattawai. Turamtai atum ainatiram apu seamuitrum nu Yuus iismaka pegkerchau turawaitrum nu nekattarme, tusa tinaiti. 18Nuna tusa Samuel Yuusan aujsauwaiti. Turam Yuus ipamtan, tura yumijai akupkauwaiti. Turamtai shuar aina tura Samuelsha Yuusan ashamkaruiti.
19Tumaina asar shuar aina Samuelan chicharainak: Jinawaij tusar ashamainaji. Amina Yuusrum aujsata. Ina apuri atin seama wekasar nu nukap tunau jasji, tusar tuina. 20Tuinakai Samuel nitan chicharuk: Ashamkairpa. Atum nekas shir pegkerchau takasurme. Turasha yamaika Yuus umirtaka inaisairpa, nuka tumatsuk ima nigki umirkurum ememattarma. 21Yuusrimattsa najanamu atumin uwemtikramainchauwa nuka umiriajai tusarmeka pegkesha emematmaitsurme. 22Yuus winau arti tusa etegtamrau asa, ima nigki umirmaka inaitamsashtatrume. 23Tura wii atumin Yuusan pachisan aujchaknaka Yuusan tunaun takarkun tumamainaitjai. Tura asamtai pegker pujusar Yuus umirmaina nuna pachisan jintintattajrum nuka juwaiti: 24Yuus atumin pegkernum yainmaku asamtai, ima nigki enentaimtusrum ememattarma. 25Antsu pegkerchauwa nuke inaitsuk taká pujakrumka atumi apurijaigki waitat suam atatrume tusa Samuel israelita ainan tinaiti.
Currently Selected:
1 Samuel 12: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
