Afocarifisi 9

1Nii janate, toroonfeta totiha anjera nesaoquine jana dede caje naluha uha arasijie chauratane choaaene jana coaraaun. Nii arasijie raite, cana asajai cochabi teeure. 2Nii cana asaae nenaa atane jachu bacuujua joaracaane janate, jelai caje mitue suruaa orono caje aihane tocohaneein. Nii suruaate nocohenaneein enoto teein, cujuanane maajeein nocohena neein te. 3Nii janate, nii suruaa caje mituhin chauratane sacuritaain riaaniha sisiincho semanaane jana, aiha Canaunne rijijieein cacha cunaitaane jaanu teeure rai. 4Nitohaneeinte letoanajaain, omane, ajaena, enuha, naaonjoainuri aasaaecuruhane caohateein, nii nauri que Cana Coaunera coujunaca siricha seecho que cojunacatenohine lanaala nenacaauru cunaitaauruhane coina aitocure nii sisiincho semanaa rai. 5Nete cachaauru atinaauruhane coina letononeeurene. Raujiaaincha cacha atinaelanaala cusihane, canau cusi rijitocojoaain cunaain saoqui ateein cacha cunaitaauruhane coina aitiin letononeeure. 6Nii cojoanonaa banate niqui onaa jerecurureein cachaauru, nete oorenereein jaiti ooruhane jaan que turuenihane jaun. 7Nii sisiinchoorute, sonaana que neeuruhane coina relanojoineein nenacaauru cabario tocorijianeein, oro caje nenaa comai tocohaneei que asihocoin cacha meri tocorijiane acaauru meri. 8Nii sisiinchooru couturi ujuite caratohanae ene couturi ujuhi tocohaneein. Rai catute aain tabai tocohaneein nenaa leeon catu tocorijiane. 9Acaauru jaberocote, coata que bujuaain ne. Jana acaauru itarote jataain mijiaaineein toni jiaauluuruha ne. Sonaana que neein caro tararaa cabarione jana tonihane rijitocojoaain toni. 10Jana rai cusite rai nuseei que ne, canaun cusi tocohaneein. Nii rai cusi que cacha cunaitaraneeinte neeurelu saoqui ateein. 11Nii sisiinchooru curuaanaate cana asaae atane jachu cuhane nenaa anjerane. Jana rai curuaate Ebereeo ere cuhane Abadoonne. Jana Curieco ere cuhanete, Apolihoonne.

12Nitohaneeinte situe nii necairichanaa nunuhe. Nete jaiti lanae coroatajai.

13Inae rai toroonfeta totiha nii anjera nesaotanene janate, Cana Coaunera acatiha oro caje nenaa rori altar que jenaain nenaa jicho caje toni eheeona. 14Nitohaneein toniinte:

“Nii jenaain anjeraauru ichoharaain nenacaauru jihaneeu. Acaaurute nucuhe tabai Eofarate auhaniha ichohanohineein neeure”, nae nii eheeona.

15Nitohaneeinte, nii jenai anjeraauru jianecure, cachaauru nichata neleru sohin jaooruhane coina. Nitohanei ichacuruhane coina jatoroaain neeuruhane bajaanaa, rai batene, cojoanonaa, naaonjoain que inae tihane jaun. 16Nii jana aonanaacaaunne janate, ecu neeure coroata fasha millonneein cabario choae cunacaauru soondarooru.

17Nii cabario choae nelaurianacaauru coaracaaunne janate, usi lanaro tocohaneein nenaa que bujuatenohinijiacoae acaauru nalarijiaauru. Nichata lauriinte coloe nii acaauru nelarijia que nenaa coata, beraurusiojoaain, lanajiojoaain, asofere tocohaneein, naaonjoaain. Jana nii cabariocuru couturite janolari couturi tocorijianihane jana acaauru ujuae caje mitue suraa, usi, asofere, naaonjoain. 18Nii cabariocuru ujuae caje cacha cairichaeranu que mitunaa suraa, usi, asofere, naaonjoaain caaunte nichata saain neleruhin ohacoaaure cachaauru. 19Nitohaneeinte rai nujuae cuhane, rai nuseei que, naaonjoaain nii nitohanei ichaane jaanu rai nelate sirichure nii cabariocuru. Nii rai nuseeite acano tocohane. Chaaen rai coturi quete cacha cunaitaaure. Arajiin cachaaurute ohe nii necairichanaa caaun.

20Nete acaauru cautecuru nii necairichanaa caje nichotenacaauru, enanetojoeein baaso ichacuruhane jianecurene. Nii jaunte, Moconajaeracuru bajaebajaecuruhane jianecurenihane jaun jerichanejeein oro caje nenaa ecaantooru, coata bronce caje nenaa ecaanto, coata plata caje nenaa ecaanto, ajeri caje nenaa ecaanto, chaaen enuha caje nenaa ecaanto, naaonjoaain bajaaebajaaecure, ichaohin, nerurujuaain, amuhin, ereein, notaain, naaonjoaauruhane que airijiin. 21Niheichu sonajaain jaohin, benane neein, nitohanai osa que nesaruhin nenaa naineniha cacha natiin namute quicha aina ichaohin niha natiin, baaso osa que nesaruhin, asijiauhin, naaonjoaain ichaaoruhane jianecuruhi.

Currently Selected:

Afocarifisi 9: URA

Highlight

Copy

Compare