Afocarifisi 17

Jataain ene cojoaeloroheri esineneein nenaa casetecaauruhane

1Nii caainsi laurinei cacha cairichaeranu curu muruaae amaaurera caainsini anjeraauru caje leinjiinte: “Chajaaune, naaonjoaain casetecanohinerichaain taa cucuana baca ichoae lauhequi ene cojoaelorohene coaarate ii que. 2Caa chauratane curuaanaa reeychurute, taa ene cojoaeloroheri aina ichaojeraquiin neeure. Chabana nitohanai ichaain ichaonaa naineniha cachane saijieein, rai nichao baaso aina cuaain satiin chauratane que nenacaauru ichao aasajeein osa que sarunajaelu”, nae canu rai nii anjera.

3Nii baihate, Cana Coaunera Suujue coaaratenojoin coaracaaunne jana, cacha areroo canu amae nii anjera. Nii janate, ecu niha leinjiin ataebinae tasionjoaain lanajaainne jana, nichoae laujuae leinjiin ene. Nii ataebinae tabaite, Cana Coaunera baijiaeraanu rijitiin jaberoco sacuritaain laenanohineein rai curuaa siriin, caainsiinei couturiin Lechooncaa rai jicho. 4Nii jana nii ene cajionete, lanajaain jichoajiojoai que jasisiin, oro caje ichanohin que corujuelequiin, jataain coretiin nenaa ajeri jaberoco que urerianohineein, jiquihaquiin nenaa perla, naaonjoainuri que urerianohine rai cajione. Oro caje ichanohin acau cooruhane jaa curu muruaae que biji achunecohin, nainecojoain rautaain coaanacaaojoaelanaala nenaa siri, nechu jataain leinjiin calani dadanacaaojoaelanaala nenaa amae nechu joaenreein cachaauru que ichaojeraquiin neosateein nihane jaun.

5Nitohaneeinte: “Babilonia nese tabai, ene cojoaeloroherihuru nebaneein satiin chauratane sacutaain itolere cachaauruhacha rautaai icharaneein nenaa”, naain laenanohineein curuaa siri nauri que, chabana coaaraa nitohanaine que airijiin.

6Nii baihane nainaaun, Cana Coaunera cachaneein rai nere beebejeraneein neeuruhane coreniha, chaaen Jesocurisito beebejeeuruhane coreniha ateinanohineein nenacaaurulu, naaonjoainuri coichana caaun ajiha nii ene cojoaeloroherine que. Nii jaunne coaarihanune rijijieein jataain cojoelatoon.

7Nii jaunte canu rai: “Chanuna jataain cojoelatohi. Tane ichei caa ene ichao coitucueraelanaala nenaa aina nii caainsiinei coturiin lechoonca jichohin- nii amaera ataebinae tabai, naaonjoainuri beete coitucuhi. 8Inoaenlute niqui ichoaelu nii iicha coarai necha aansai ataebinae tabai, nete inae nitaje. Nii jaunte, caohacha nitajeeriin nitajesihane ajiniha, nii chariji bana satonoelanaala nenaa atane jachu caje inicheein. Nii necoaaunaa cana rai chaurutanene jaa caje coaauneein Cana Coaunera coitucuurera curuaacuru siricha quiricha cuhane laenanohineein curuaa sirilanaala caa chauratane que nenacaauru cachaaurute, nii necha aansai ataebinae tabai cojoelatiin coaraa cuurureein, inoaenlu ichaohalu natiin inae nitajihane jaun. Nete inae nacoaauneein ichaoreein.

9Caute laen esinae rauhijiriin coaarareein niicha coitucuhi coitucuhin biha coitucuerane. Nii caainsiinei couturiite, caainsiinei ichatane ucuuno nii lauhaca ene cojoaeloroherine jaan beraneein aiha ne. Chaaen nii caainsiinei couturichurute nii caainsiinei reeycuru beraneein ainaa ne. 10Nii saoquii reeychurute inae chaque nelateein nedaaurene. Leinjiinchate jaiti itolere curuaanaaneein ne. Nii jana leeochate jaiti turuene. Nii acaauru caaijie nedanaa turuheneni inae turuhane bana coatiha carajaain nerinaain. 11Nii inoaenlu ichaonaa necha aansai ataebinaete, acaauru curuaanaa reeyneein acaauru fosaneineein nelu. Nete inae nitaje. Nii choae tacaain techu, nii caainsineein nenacaauru caje nenaa nelu. Nitohaneeinte, jataain caohachanainejeein raajenihane itajeranu ichajeein sacue.

12Nii lechooncaain jicho iicha coaraite, lechooncai reeycuru neein jaiti curuaanaaneein cocoainanohi nelanaala nenacaauru ne. Nete inae carajaelanaala, nii necha aansai ataebinae jiniichaain aihuruha reeychurune rijijieein cocoainanohi neeurureein. 13Nii lechooncai reeychurute, ita suujua rijitojoeein niicha ichana nainei ichaa nii necha aansai ataebinae tabaine coina cocoainaa cuurureein. 14Nitohaneeinte, nii Carenero Narejeen aina ita soha cuurureein. Nete acaauru amuritoha cureein nii Carenero Narejeen. Nii suujua rijijieein janijiin Cana Coaunera ranojoinurilu rai cachaneein nenacaauru aina, satiin curuaanaacuru curuaanaa neein, satiin reeycuru rai Reeyneein niha nii Carenero Narejeenne jaun”, nae carai nii anjera.

15Chaaen techu canu rai: “Nii lauhaca nii ene cojoaeloroherine jaan iicha coarai acaute, nenaanaja, cachaauru, nere que ereein nenacaauru, natane que ichaohin nenacaauru, naaonjoainuri beraneein ainaa ne. 16Jana nii necha aansai ataebinae tabai jicho lechooncaain iicha coaracurite, nii ene cojoaeloroheri que nejerateein, machorocoaain que jaolecohin, rai jaberoco quiin usihanau mocoorurichaaine jaan beraneein ainaa ne. 17Cana Coaunerate, acaauru suujua jichochoe, aca jerihane rijijieein niicha jerei ichaain, jiniiquiin ita suujua rijitojoeein, nii reeyneein cocoainanohineein neeuruhane jaan teeuruha nii necha aansai ataebinae raine coina. Nitohaneein jeriha Cana Coaunerane que tihane jaan que tiaajeein. 18Nii ene iicha coaraite, itolere amurijiriin nenaa Babilonia nese que satiin chauratane sacuritaain nenacaauru reeycuru amuritoeraneein nenaa beraneein ainaa ne”, nae carai nii anjera.

Currently Selected:

Afocarifisi 17: URA

Highlight

Copy

Compare